Read Sangtam Naga ESTHER 4 Bible Online

ESTHER 4 - Sangtam Naga bible

ESTHER 4

¹Khode Mordekainü anguchicho apüm nyisicho, abinü ajengki rehnahcho ko tavi kangkeh müyahshü müpipü yangdi lang la khütang züde tra

²Yangthsaba kuhla züduba trahtri chii rocho. Ta müyahshü müpipü züdunung mümülachonü abinü müzüducho.

³Yanglihti apümlang khüdederü Yangthsaba yuzeng müdhesohcho, hütsüri la Jihudarü yola meshü amülah licho. Arühnü kongnü mesho tracho ko adrongubanü tavi kangkeh müyahshü müpipü alih la pümcho.

⁴Khode Esther kulilarüti ko axangmichotinü Mordekai nguchicho abükyü te yocho, abükyü dee wahcho. Abükyünü müyahshü tsü mülihnung shü apa khürü Mordekai khyang jüchücho, ta abinü mükhyüchocho.

⁵Achotsü abükyü dikehnung yangthsabanü throchehba axangmicho Hathak dsinü Mordekai tsü tu khütachonang tsingdhengnung müthehcho.

⁶Hathaknü yangdi long la Yangthsaba pümji lang züduba trahtri lang tsü Mordekai yang wücho.

⁷Mordekainü abi te abi chah tu tikehcho ko Jihudarü apüm kyüsehkhangnung Haman-nü thsi khüdoi yanglih thsibong la yohjünung nyengchocho hiri apüm yocho.

⁸Abinü Hathak khyang Jihudarü changsohnung Susa lanü shuhba yuzeng tpah-o jücho. Hütsü hiwü Esther khyang jünung ko suro apüm yonung ko Yangthsaba yang wünü anyitsarü te chomang pü kihchinung Mordekainü yochücho.

⁹Hathaknü hütsüta nguchicho,

¹⁰ko Esthernü thali yusi hi Mordekai yang hiwünung jücho:

¹¹“Yangthsabanü müdsipü khingkurü nye adhrerü nye sünü abi pümji la züdunang, abi tsü sünung. Hütsü yuzenge; adirü chahnü dikeh müyurü atümungnü hütsü müdhele. Hiba yuzeng lanü tsiphunung lang khüdu du lile: Yangthsabanü khürü chah abi hon ja dhimüsujükhang, hütsüvi du müsüsohnung. Ta adelü choo-o yangthsabanü Ih müdsire.”

¹²Khode Mordekainü Esther yusi yuchicho,

¹³abinü abükyü yang amüzahnung hi müthehcho: “Nüh Yangthsaba kuhla lichonü Jihudarü aparü tenü alaa nüh khümcho lilepü tülüm.

¹⁴Hitari shikhe la nühnü sahmüthsa likhang, ninglangnü Jihudarü yang atroba ronung ko arüh khümchonung, ta nühlü sünung ko nü jümürü trah changkapehnung. Ta hitari shikhe khüdu nengdang nüh yangthsalatpü kangsohchosü kümüdeo!”

¹⁵Esthernü Mordekai yang alalingba hi müthehcho:

¹⁶“Wüng ko Susa la lirü Jihudarü atümung dsibülung; ko kongnü I shulüm dangkhidangnangjüng. Nyümong asang romang asang tu tütsuyong. Ih ko I kulilarütisü hütsüta nguchinung. Hütsüpü, yuzengnü mümüla nye, Ihnü Yangthsaba yang wünung. Hütsü nengdang Ih sünye tu müthsa.”

¹⁷Hütsüpü Mordekainü wünü Esthernü abi te tu nguchinung yocho hütsü nguchicho.