Read Sangtam Naga ESTHER 5 Bible Online

ESTHER 5 - Sangtam Naga bible

ESTHER 5

¹Esther kongba nyümong asangu la abükyünü yangthsalatpü jengki yohcho ko wünü Yangthsaba kuh yonglang züdu Yangthsaba pümji lahpi aromih pipü yacho. Yangthsaba ayonglang yangthsarü pümji la trahtri lahpi abe pipü pümcho.

²Khode yangthsabanü yangthsalatpü Esther ya ngucho, abükyünü abi yanglih ngucho ko abinü abükyü lahpi abi hon ja dhimüsucho. Achotsü abükyünü wünü ja amüle tsü thahpücho.

³Yangthsabanü tsingdhengcho, “Yangthsalatpü Esther, tuo? Nüh tu khyünyüro I te young, ko I yanglih achangsho mii nü khyang jünung.”

⁴Esthernü lalingcho, “Nüh adibongnü künyangkhang, Haman nühjü shomülang Ihnü rungnümcho thsüti la dsiyohnyüre.”

⁵Achotsü Esther shirü thsanung Yangthsabanü Haman te zah ronung yuzeng jücho. Achotsü Yangthsaba e Haman nyüh Esther thsüti la wücho.

⁶Yongkha yong pümde Yangthsabanü abükyü te tsingdhengcho, “Nüh tu khyünyürünang I te young. Nühnü I yanglih changsho-o ching nye Ihnü nü khyang jünung.”

⁷Esthernü lalingcho,

⁸Nüh adibongnü I kihchicho jüekhang, atusü Haman nühjüding I thsüti la rosohnyüre. Hütsütade I thsütah nü te yonung.

⁹Hütsüde Haman tsü thsüti la tsünü dee künyang tsicho. Ta Yangthsaba trahtri te Mordekai yacho, ko abi lahkhu tside abi khyang jengreng müjücho ngu Haman-nü Mordekai te dee zichürocho.

¹⁰Ta apu jangjang rangcho kuh lang wücho. Hütsüpü abinü abi shangrüti akuhlang dsicho ko anitpü Zereshsü arüh yola dsiyohcho.

¹¹Abinü arüh bete abi licho, atsurü khüdoi licho, khüta Yangthsabanü abi pümji amichahba jücho ko khüta Yangthsaba pohki adirüti aparü tenü abi alaa ayingba, hütsüri nengdang müthseh yocho.

¹²Haman-nü yorü, hütsü du mahpü, “Yangthsalatpü Esthernü Yangthsaba ihjü müleng thsüti la dsiyohcho ko atusü thali dsiyohre.

¹³Ta Yangthsaba pümji lang züdulang trahtri la Jihudarü Mordekai tsü püm tashi hiri apüm I nengdang tu mah.”

¹⁴Achotsü anitpü ko ashangrüti atümungnü hita yocho, “Nühnü ahohsesing athsenglang khehap dhünyang külüpm! Atunyang hütsü chah Mordekai hohsehsohnung Yangthsaba te tsingdheng, ko künyangseh thsüti lang tsü züdung.” Haman-nü hütsü lümlong atsaepü lüm ahohsesing tsü külüpcho.