Read Sangtam Naga ESTHER 6 Bible Online

ESTHER 6 - Sangtam Naga bible

ESTHER 6

¹Hütsü romang tsü Yangthsaba yüpseh mütsicho, achotsü abinü yanglih khiyu thrahcho tsü hiro abi te khiyonung yuzeng jücho.

²Arühnü khicho la tsü khüta Mordekainü Bigthana e Teresh nyüh Yangthsaba yüpji nyahrü axangmicho nyühnü Yangthsaba süsohnung rah külüpcho tsü zehcho.

³Yangthsabanü tsingdhengcho, “Hütsü nengdang Ihsanü Mordekai khüta jiyü liro?” Arühnü lalingcho, “Abi nengdang tusü nguchi müle.”

⁴Yangthsabanü tsingdhengcho, “I pohki adirüti hila khürü mülio?” Hütsütade tsü Haman zürochi yacho; abi roba tsü Yangthsaba te rungnüm liba ahohsesing la tsü Mordekai hosehsohng pü tsingdhengnung rocho.

⁵Hütsüde dikehrütinü lalingcho, “Haman hila nüh shirünyo yingle.” Yangthsabanü yocho, “Züro Ih shirüsohng.”

⁶Achotsü Haman zürocho ko Yangthsabanü abi te yocho, “Ihnü khütang adhichi jünyo nyüh khüdu lile. Hivi nengdang Ihnü tu nguchinung?” Haman-nü alasih la lümdhengcho, “Yangthsabanü hidoi adhichi jünyüba tsü südo thsanung? Ipu du thsaririe.”

⁷Achotsü abinü Yangthsaba te lalingcho, “Hiba nyitsarü nengdang nüpunü khyüba Yangthsaba jengki hirosohng.

⁸Nüpu kuri chah lahsohnung lah jengki hirosohng.

⁹Ko hivi tsü nü pohki adirü khüdu khyang jengkijüsohng ko kuri chah tsü pümsohpü yangdi lang la no rachisohng. Arüh wüde anüba khyang tsü hita züdesohng: ‘Yangthsabanü dhichinung lümba nyitsarü khyang abinü khüta jiyüro dhingdheng!’ ”

¹⁰Achotsü Yangthsabanü Haman te yocho, “Zahta jengki ko kuri tsü rungnüm ko hivi tsü Jihudarü Mordekai khyang jüng. Nühnü yoba lüpcho tsü abi khyang nguching. Abi Yangthsaba pümji lang züduba trahtri la püm ngunung.”

¹¹Achotsü Haman-nü jengki ko kuri tsü hirocho ko hütsü Mordekai khyang khyüsohcho. Kuri chah tsü Mordekai pümsohcho ko Haman-nü nüpü yangdi yanglong la arüh wüde; “Yangthsabanü dhichinung lümba nyitsarü khyang, abinü khüta jiyüro dhingdheng,” pü züde wücho.

¹²Hütsüpü Mordekai Yangthsaba pümji lang züduba trahtri lang thali wücho, ta Haman ashahchonü akumüshüpü kuh lang thalicho.

¹³Abinü abi chah tikehcho apüm anitpü ko ashangrüti te yocho. Hütsüde abükyü ko ashangrütinü abi te yocho, “Nüh Mordekai te khülunung adikehrüe. Abi Jihudarü khüdue, nühnü abi mükohnung. Abinü nüh kohriri.”

¹⁴Arüh chota yade Yangthsaba kuhla axangmichoti Esther thsüti lang Haman nünung rocho.