Read Sangtam Naga ESTHER 7 Bible Online

ESTHER 7 - Sangtam Naga bible

ESTHER 7

¹Achotsü Yangthsaba e Haman nyüh Esther te anyüpiu thsüti tsunung wücho.

²Yongkha yong pümde Yangthsabanü abükyü te anyüpiusü tsingdhengcho, “Ade, Yangthsalatpü Esther, nüh tu khyünyüro? I te young! I yanglih achangsho mii nü khyang jünung.”

³Yangthsalatpü Esthernü lalingcho, “Nüh adibongnü I kihchicho jünung lümkhang, Ih akihchiba tsü, Ih ko I nyitsarü akang linyüre.

⁴I nyitsarüti ko Ih amüpsehnung iko. Ayurü thsanung icho-duelang tu müthsa, Ihnü sahmüthsanung ko nü khyang alongmüzi müjünung; ta ihrü riri achangrü due.”

⁵Hütsüde Yangthsaba Xerxesnü Esther te tsingdhengcho, “Sünü hita nguchinung kohcho? Hiba nyitsarü tsü khüde liro?”

⁶Esthernü lalingcho, “Ihrü rorüh, ihrü dhsümthserü tsü hivi motsing Haman lile.” Hütsüde Haman-nü Yangthsaba ko Yangthsalatpü nyüh chah drüseh dhengcho.

⁷Yangthsaba tsü zichüro shemüsucho ko dongkhu tbü lang chüducho. Yangthsabanü hi ngang abi khingchiririepü Haman-nü müdhepehcho, achotsü yangthsalatpü Esther te abi akang khümchoung pü kihchinung nyehlicho.

⁸Apu jangjang mülang chingnung Esther pümji chah thsürang mükhukeh yade, Yangthsaba tbü langnü kuh lang thali zürocho. Hütsü ngu Yangthsabanü züde yocho, “Hiba nyitsarünü Ipu bete ko Ipu Yangthsaba kuh lanü yangthsalatpü khing thsangnyangnung müküprü do?” Yangthsabanü hi müchozah-e, axangmichotinü ro Haman ku müshütijücho.

⁹Hütsüde arüh yola nyüh khüdu anengnü Harbonanü yocho, “Haman-nü akuh la Yangthsaba khümchobong Mordekai hohsehnung ahohsesing mii külüp lile. Hütsü athsenglang khehap dhünyang lile.” Yangthsabanü yuzeng jo yocho, “Hütsüla tsü Haman hohsehng.”

¹⁰Hütsüta Mordekai hohsehnung külüpba ahohsesing la tsü Haman apu hohseh süsohcho. Hütsüpü du Yangthsaba zichürocho nyehlicho.