Read Sangtam Naga ESTHER 8 Bible Online

ESTHER 8 - Sangtam Naga bible

ESTHER 8

¹Hütsü nyümong tsünü yangthsaba Xerxesnü yangthsalatpü Esther khyang Jihudarü rorüh Haman kuthsi apüm jücho. Esthernü Yangthsaba te Mordekai tsü abükyü jünirüepü yocho, hütsütinü Yangthsaba licho la Mordekai züronung mülacho.

²Yangthsabanü ashingsing kehba abi imüshi khyüchehcho (Haman chahnü khyüliba) ko Mordekai khyang jücho. Esthernü Mordekai tsü Haman kuthsi michah dhengyehsohcho.

³Hütsüpü anyüpiu Esthernü Yangthsaba jingte tra chichinü kihchicho. Abükyünü abi te Jihudarü nyüm Agag trah lanü Haman-nü rah amütsa nguchicho tsü yatijüngpü kihchicho.

⁴Yangthsabanü abükyü lahpi hon ja tsü dhimüsucho, hütsünü abükyünü shemüsu yocho,

⁵“Nüh adibongnü lümkhang ko nühnü Ih müikhang, ko hi nü te athsalangepü lümkhang, yanglih la Jihudarü apüm changsohnung Agag trah lanü Hammedatha tsurü Haman-nü shuba yuzeng tsü yatinung yuzeng jüng.

⁶Hiba achangba I nyitsarü michah rode ko I jünirü mapsehde Ihnü khüta rangchonung?”

⁷Hütsüde Yangthsabanü Yangthsalatpü Esther ko Jihudarü Mordekai te yocho, “Dheng, Jihudarü nyüm rah külüpcho nengdang Ihnü Haman hohsehsohko, ko abi kuthsi Esther khyang jüko.

⁸Ta Yangthsaba nengla amüdhethsa shingkehpü yuzeng jücholü mülihnung mükoh. Ta nühjünü Jihudarü te nühjü lümcho yo thrahnung kohle; ko hütsü nühjünü I neng lanü thrah amüdhethsa shingpü jünung kohle.”

⁹Hiba hi choo asangu Sivan choo mükyüpü asang nyümong tikehcho. Mordekainü Yangthsaba athrahrüti dsinü India lanü Ethiopia chii yanglih 127 la Jihudarü, governorti, yangthsarüti ko adirüti atümung yang vathrah thrahsohcho. Vathrah tsü yanglih mükhu te arüh yula ko palu thrahtsenü, ko Jihudarü tesü arüh yula ko arüh thrahtsenü thrahcho.

¹⁰Mordekainü vathrah tsü Yangthsaba Ahaserus nengla thrahpü yangthsaba ashingsingnü shingcho. Hütsü kuri atsayauba chah pümpü shemüsu wü jüsohcho.

¹¹Hiba vathrah la tsü yangdi mükhu la Jihudarünü arühbürü akang tsungtinung shulüm amülung kangchehpü khatanung Yangthsabanü mülajücho zehcho. Yanglih khürü la ahung khürünü thsunohrü bipü arüh bekhang, arühnü arüh te khatanung ko arüh tsurü nitpürü changjünung kohle; arühnü sehseh kingthrümnung ko arüh kuthsi khyünung kohle.

¹²Hiba yuzeng tsü choo dhüre anyüuba Adar choo nyümong dhüre-asang Persia yanglih apüm la Jihudarü kyüsehnung yuzeng jüba nyümong tinü mülacho.

¹³Jihudarünü rungnümpü hütsüba nyümong rode arüh rorüh nyüm rühyangnung rungnüm linung yanglih mükhu nyitsarü atümung te yuzeng roh-i müdhesohnung yocho.

¹⁴Yangthsabanü mülacho kyo Yangthsaba kuri nürühnü khütang tsaya shemüsucho. Hiba yuzeng tsü yangdiba Susa lasü müdhesohcho.

¹⁵Mordekai Yangthsaba kuh lanü yangthsarü jengki apuleh ko athru, anyahrüm anana fükhüm ko hon kuthri thripü shemüsucho. Hütsüde Susa yanglong la akünyang yuva ko züdechonü jengcho.

¹⁶Hütsü Jihudarü nengdang akünyang ko akyahshang, alongphi ko akoh nyümong thsacho.

¹⁷Yangdi ko yanglih apüm la khüdederü Yangthsaba yusi tsü khicho, Jihudarünü akünyangnü thsüti tsu mungcho. Aparü mii adrong Jihudarü kangcho, tunüo adelü arühnü arüh drücho.