Read Sangtam Naga ESTHER 9 Bible Online

ESTHER 9 - Sangtam Naga bible

ESTHER 9

¹Adar Choo dhüre-asang nyümong, Yangthsabanü züdeba tikehnung nyümong, arorühnü Jihudarü tsü arüh khehla züronungepü longdiba nyümong tsü ro chihcho. Ta Jihudarünü uthring arüh kohcho.

²Yanglih yangdi atümung la Jihudarü kukhiti la arüh thsakehjünung rorüh rühyangnung arüh shimükhong licho. Atümunglang nyitsarütinü arüh dro licho ko sünüsü arüh nyüm müyacho.

³Yanglih papa la thsazirüti, governorti, yangthsarüti atümungnü Jihudarü trocho tunüo arühnü Mordekai drücho.

⁴Mordekai tsü Yangthsaba kuhla tase amichahba ko yanglih la tase lile ko tase alaa kanglepü yangdi apümnü müdhecho.

⁵Hütsünü arüh rorüh te Jihudarünü arüh nguchinyücho nguchicho. Arühnü nohshengnü arüh kyüsehcho.

⁶Susa yangdiba la dusü Jihudarünü nyüh thsih münga kyüsehcho.

⁷Arüh yola Jihudarü rorüh Hammedatha tsurü Haman tsuzarü arüh dhüre zehcho: Parshandatha, Dalphon, Aspatha, Poratha, Adalia, Aridatha, Parmashta, Arisai, Aridai ko Vaizatha. Ta kohrolü zang mükhyüjücho.

¹¹Hütsü nyümong tsünü Susa la khüdoi kyüsehcho hütsü Yangthsaba te yusi müdhesohcho.

¹²Achotsü abinü Esther te yocho, “Susa la dunü Haman tsurü dhüre zeh nyüh thsih münga kyüsehko. Yanglih papa la khüdoi nguchipü linung! Ade nühnü tu khyünyüro? Hütsü jünung. Apa tuturü khyünyüro, I te young, hütsü jünung.”

¹³Esthernü lalingcho, “Nüh adibongnü lümkhang, Jihudarü khyang Susa la chünye roh-i atusü nguchisohng. Ko Haman tsurü dhüre me tsü ahohsesing la tbengpüsohng.”

¹⁴Yangthsabanü hütsüta nguchinung mülacho ko Susa la yuzeng tsü jücho. Haman tsurü dhüre me tsü tbengpücho.

¹⁵Adar cho dhüre-müyüu nyümong Susa la Jihudarünü shibülunglipü apa nyüh thsih asang yangdi la tsü kyüsehcho. Ta adesü arüh kohrolü müzangkhyü.

¹⁶Yanglih papa la Jihudarü tisü amülung kangchehpü arühbürü khümchonung khatacho. Arühnü arüh thrünyirü nyüh hajar nyührepü münga kyüsehcho. Ta arühnü kohrolü müzangkhyüjücho.

¹⁷Hütsü Adar choo dhüre asang nyümong. Nyümong khüu dhüre-münga nyümonglü arühnü mükyüsehcho, ta thsüti nyümong khüdu kangsohcho.

¹⁸Ta Susa la liba Jihudarünü thsüti tsü dhüre-münga nyümong tsü licho, tunüo dhüre-asang ko müyü tsü akyüsehba nyümong licho.

¹⁹Hütsünü yangdizati la liba Jihudarütinü Adar choo nyümong dhüre-müyü tsü akünyang nyümong, thsüti tsuba ko tsuyongnung Jiyü jüta mungba nyümong thsare.

²⁰Mordekainü hiri atikehcho thrahcho ko Persia yanglih ashu ko amünyeh apümlang Jihudarü atümungte,

²¹Adar choo dhüre-müyü ko dhüre-münga tsü kang mükhu amü nyümong kang mungnung yocho.

²²Hiri nyümong la Jihudarünü arühbürü jangjang arorüh kohcho; hiba choo la awah ko alongri lanü akünyang ko alongphi shikhe kangcho. Hiri nyümong la thsüti khyo mungnung ko khüdunü khüdu khyang ko ailümrü khyang tsuyongnung jiyü jüta mungnung yocho.

²³Hütsüta Jihudarünü Mordekainü thülacho kyo nguchicho ko akhanglang hiba hi kang müthe mungba thsüti khüdu kangcho.

²⁴Agag trah lanü Hammedatha tsurü, Jihudarü rorüh Haman-nü Jihudarü changsohnung arüh nyüm abinü rah külüpcho ko arüh changsohnung abinü zii thsadhengcho. (Hi te “purim” pü dsire.)

²⁵Ta Esthernü Yangthsaba yang wücho ko Yangthsabanü yuzeng khüdu müthehcho khüi khu Haman-nü Jihudarü nengdang külüpcho rah la apu hohcho, abi ko atsurüti ahohsesing la xohsehcho.

²⁶Hütsünü hiba chühmü te Purim pü dsire. Mordekai vathrah ko arüh chah tikehcho khu,

²⁷Jihudarünü arühbürü, arüh chahnü trahchochoti, ko sü Jihudarü kangnang Mordekainü thülacho kyo hiri nyümong anyüh kang mükhu mungre.

²⁸Aronung shang apüm yanglih ko yangdi apüm la Jihudarüecho apümnü hiba Purim nyümong anyüh hi khyücho mungnung yuzeng külüpcho.

²⁹Hütsüpü Abihail tsulatpü yangthsalatpü Esthernü Mordekai te zeh Purim nengdang Mordekainü akhulang thrahcho vathrah chah tsü lahkeh abükyünü tase apüm jo vathrah khüdu thrahcho.

³⁰Vathrah tsü Jihudarü atümung yang thrahcho ko Persia yanglih la yanglihti 127 khyang chahla jücho.

³¹Jihudarü apüm te atbachi ko akhümcho longdijo, ko arühnü longyo kong mungba yuzeng külüpcho kyo arüh ko arüh chahnü trahchochotinü Purim thsüti tsü akyang mungnung thongucho. Hi Mordekai ko Esther anyüdingnü yuzeng jücho.

³²Purim nengdang tsitsachi Esther yuzengnü alohcho la thrahsohcho.