Read Sangtam Naga NÜCHEHCHO 1 Bible Online

NÜCHEHCHO 1 - Sangtam Naga bible

NÜCHEHCHO 1

¹Jakob tsurüti abi yola Ijip lang arüh kukhi zeh würüti tsü:

²Reuben, Simeon, Levi, Juda,

³Isakar, Zebulun, Benjamin,

⁴Dan, Naftali, Gad ko Asher.

⁵Jakob chahnü trahchocho ajowürü atümungnü arüh nyühre thsacho. Abi tsurü Josef tsülü Ijip la lijungcho.

⁶Lilinü Josef, amungrü ko hütsüba shang la lirüti sükhangpehcho,

⁷ta arüh chahnü trahchocho Israelrü khütango kangcho ko arüh mükhilong ko rezeh suhcheh Ijip lih tsü arühnü jengcho.

⁸Hütsüde Josef mümüdheba yangthsarü khüdu Ijip la Yangthsaba kangcho.

⁹Abinü müyurü te yocho, “Israelrü hiri mükhilong ko rezeh suhchehba hi Ihsa nengdang dhsürü lile.

¹⁰Khata chürokhang arühnü Ihsa rorüh lahpi zeh Ihsa te khatanung ko tsipehnung. Arüh adrong mükangsohnung lang khürü yangchibae.”

¹¹Hütsünü Ijiprünü arüh khingchi nguchisohnung arüh michah anüchirü yohpücho. Israelrünü Farao Yangthsaba khyang pithom ko Rameses yangditi shih kang külüpjücho.

¹²Ta Ijiprünü Israelrü alaa sehchili, arüh alaa adronguba kang yanglih jeng sohjengcho.

¹³Ijiprünü Israelrü drüchonü alaa du arüh khang ayurü kangsoh arüh akang mütsa bichicho.

¹⁴Arühnü arüh tsü kuh thsaba la ko luh la nguchisohcho ko müchomang arüh bichicho.

¹⁵Hütsüpü Yangthsabanü Ibrilarü zatbüde trorü Shifra ko Pua nyüh te yocho.

¹⁶“Khode Ibrilarünü azarü nümüsunang, akhunga tsü adhrerü thsakhang müpsehng ko khingkurü thsakhang tümüpseh.”

¹⁷Ta atrorü tsünü Tsingrangba drüchonü Yangthsaba yu tsü münyicho ko adhrerü suronye mümüpsehcho.

¹⁸Achotsü Yangthsabanü khingkurüti tsü dsinü yocho, “Tuepü nührünü hita nguchiro, tuepü azarü tsü mümüpsehro?”

¹⁹Arühnü yocho, “Ibrilarü hi Ijiplarü roh-i mah; arühnü khütang müla surore, ko ihjü wü müchie suropehpü lire.”

²⁰Ko atrorü khingkurüti tsünü Tsingrangba drüchonü abinü arüh müi arüh kukhi tsa yohpüjücho.

²¹Hütsüta Israelrü tsü mütozah suhcheh ko rezeh kangcho.

²²Achangkathsa Faraonü müyurüti khyang yuzeng jücho “Ibrirü adhrerü surocho atümung Nile Yongkhi la müyehchüng, ta khingkurülü lisohng.”