Read Sangtam Naga NÜCHEHCHO 10 Bible Online

NÜCHEHCHO 10 - Sangtam Naga bible

NÜCHEHCHO 10

¹Hütsüde ABÜDONGBAnü Mosa te yocho, “Wüng ko Farao shirüng; Ihnü arüh yola thsayahiya hiri nguchide yangthsaba ko abi thsazirü lasih müküpsohcho,

²ko nührünü nührü tsuzarü ko shümtsurü te thsayahiya hiri nguchide Ihnü khüta Ijiprü dohsohcho, hütsüri yosohnung shulüm Nührü atümungnü Ih tsü ABÜDONGBA epü müdhenung.”

³Achotsü Mosa e Aron nyühnü wü Farao te yocho, “ABÜDONGBA, Ibrirü Tsingrangnü hita yore, ‘Nühnü khüdoi nyahli I yocho münyinung? I nyitsarünü Ih mübünung shulüm arüh wüsohng.

⁴Nühnü imohdukhang, Ihnü nü yanglih la atu khengqu müthehchünung.

⁵Arüh khütango ronü alih lüptinung. Shurünü müp-pü anyingcho singdong miinü arühnü tsukhangnung.

⁶Arühnü nü Yangthsaba kuh ko nü thsazirü kuh ko müyurü kuh apüm jengnung. Arüh tsü nührü jümürünü ngucho apüm tenü amütsaba thsanung.’ ” Hütsüpü Mosanü Yangthsaba tenü ximüla tsicho.

⁷Yangthsaba thsazirünü abi te yocho, “Hiba nyitsarünü khüdoi nyahli Ihsa khyang chongcha jünung? Israelrünü wü arüh Tsingrang ABÜDONGBA mübünung thsa arüh wüsohng. Ijip thsangnyang liba hi nühnü müngurü mah-o?”

⁸Achotsü Yangthsaba yanglang Mosa e Aron nyüh nüli rocho ko abinü anyüh te yocho, “Nührü wünü nührü Tsingrang ABÜDONGBA mübünung kohle. Ta yujeba sürü wünungo?”

⁹Mosanü lalingcho, “Ihrü tsuzarüti ko azirüti ihrü apüm wünung. Ihrü tsurü ko tsularüti, San ko miza ko misüti nünung, tunüo ABÜDONGBA nengla thsüti khüdu linung.”

¹⁰Yangthsabanü yocho, “Khingkurü azarülü khodesü münüsohnungepü Ihnü ABÜDONGBA nengla yuchümre. Nührünü nyümnung rah külüpcho tsitsa ngure.

¹¹Nührünü mübünyükhang, adhrerü du wü ABÜDONGBA mübünung kohle.” Hütsüta yopü Mosa e Aron nyüh Yangthsaba tenü iipehcho.

¹²Hütsüde ABÜDONGBAnü Mosa te yocho, “Ijip lih la khengqu pohsohnung nü kheh dhimüsung. Shurü iha lanü nyingcho ko chicho apüm tsukhangjünung.”

¹³Hütsünü Mosanü aja dhimüsucho, ko ABÜDONGBAnü nyüchürolangnü nyübong chürosoh hütsü nyümong ko hütsü romang müyüp füsohcho. Nyangnyü khüulü hütsünü khengqu pohchehsohcho.

¹⁴Arüh atii atiinü ro alih apüm mülümphacho. Hiba khengqu atii tsü atsicho la müngudhengcho ko müngudhengnung arangcheh licho.

¹⁵Alih tsü arühnü nyahthrüm lüpticho; shurünü müpnying apüm ko singdong chah singsih apüm zeh arühnü tsukhangcho. Ijip lih apüm la singdonglidong tuchahsü amüyah tusü münyingjücho.

¹⁶Hütsüde Yangthsabanü dhsüthsa Mosa e Aron nyüh dsinü yocho, “Ihnü nührü Tsingrang ABÜDONGBA ko nüh nyüm amünyi shitpahko.

¹⁷Adesü I münyi pehjüng ko nührü Tsingrang ABÜDONGBA te I chahnü hiba asüba akhingchi khyümüinung kihchijüng.”

¹⁸Mosanü Yangthsaba tenü za wü ABÜDONGBA te kihchicho.

¹⁹Ko ABÜDONGBAnü nyüchüro nyübong tsü nyüzüdu nyübong khütang zi kangsoh khengqu tsü fübülung Amoh Kihdi la füyohchücho. Ijip lih apüm la khengqu khüdusü nying mülicho.

²⁰Ta ABÜDONGBAnü Yangthsaba lasih müküpsoh, Israelrü tsü mütsisohcho.

²¹ABÜDONGBAnü hütsüde Mosa te yocho, “Ninglang thring nü kheh dhimüsung ko Ijip lih apümlang amarürah khüdunü shütinung.”

²²Mosanü ninglang thring akheh dhimüsucho ko Ijip lih apümlang nyümong asang marürah kangpehcho.

²³Ijiprü arüh khüdunü khüdu müngutacho ko hütsü shikhe sünüsü abi kuh müpehjücho. Ta Israelrülü arüh licho la atsingse licho.

²⁴Yangthsabanü Mosa dsi yocho; “Nührünü wü ABÜDONGBA mübünung mülare; nührü khingkurü azarü mii wünung mülare. Ta nührü san, miza ko misülü hila du pehjüng.”

²⁵Mosanü lalingcho, “Dheng, ihrünü ABÜDONGBA khyang kangmübü ko trüp-mübünung shulüm nühnü kanglungrü jüng.

²⁶Ihrü kanglungrü ihrü yola nübae; tusü pehjo mütsinung. Ihrü Tsingrang ABÜDONGBA mübünung ihrü jangjangthsa kanglungrü tsü thronungbae. Ko ihrü wü hütsü müchide, kangmübü khütari khyo abi mübünungnang ihrünü mii mümüdhe.”

²⁷ABÜDONGBAnü Yangthsaba tsü lasih müküpsoh, abinü arüh mütsisohcho.

²⁸Abinü Mosa te yocho, “I tenü shehkhu tsieng! I khyang nü tsah thali tüngusoh! Ihnü khüi nyümong nüh ngunang, nüh sünung!”

²⁹Mosanü lalingcho, “Nühnü yocho kyo, nühnü khodesü Ih thali müngunung.”