Read Sangtam Naga NÜCHEHCHO 11 Bible Online

NÜCHEHCHO 11 - Sangtam Naga bible

NÜCHEHCHO 11

¹Hütsüpü ABÜDONGBAnü Mosa te yocho, “Ihnü adelü Ijip la Farao ko müyurü chah akhingchi khüdu du jünung. Hütsü khanglang abinü nührü tsisohnung. Yutsatsa, abinü nührü hilanü iipehnung.

²Ade Israelrü te chotang ko arüh atümung te, arüh kurümrü te hon ko taripi kohro chiingpü young.”

³Ijiprünü Israelrü jengreng drüsohnung ABÜDONGBAnü nguchiko. Yutsatsa, thsazirü ko müyurünü Mosa tsü nyitsarü dee amülah-epü khichire.

⁴Mosanü hütsüde Yangthsaba te yocho, “ABÜDONGBAnü yore, ‘Yürüptülung la Ih Ijip lih lahkhunung,

⁵ko Ijip la aukhuba atümung sünung, Yangthsaba pümji mülihnung thsiking khyüba Yangthsaba tsurü chahnü dikehpü ayularü tsurü fürü thsürü miinü. Akhu mütrücho kanglungrü apüm sünung.

⁶Ijip lih apüm la khodesü mütikehcho ko mütikehnung trakhitrayo amülah linung.

⁷Ta Israelrü ko arüh kanglungrü chahlü füzanü mii mühungchinung. Hütsüde Ih, ABÜDONGBAnü Ijiprü ko Israelrü kahla, changcheh külüpjüchoepü nührünü müdhenung.’ ”

⁸Mosanü zika yocho, “Nührü thsazirü atümungnü I jingte ro mükhukehnung ko I müyurü nüpü tsipehng pü I te kihchinung. Hütsü khanglang, Ih tsinung.” Hütsüpü Mosanü khütang zichüro Yangthsaba pehjo tsicho.

⁹ABÜDONGBAnü Mosa te yocho, “Ijip la Ihnü thsayahiya alaa nguchisohnung Faraonü mütozahnü yocho münyinung.”

¹⁰Mosa e Aron nyühnü Yangthsaba bete thsayahiya hiri apüm nguchicho, ta ABÜDONGBAnü Farao lasih müküpsohcho ko abi lih lanü Israelrü mütsisohcho.