Read Sangtam Naga NÜCHEHCHO 12 Bible Online

NÜCHEHCHO 12 - Sangtam Naga bible

NÜCHEHCHO 12

¹ABÜDONGBAnü Ijip la Mosa e Aron nyüh te chotacho.

²“Hiba choo hi nührü nengdang kang la akhudiba choo linung.

³Israel hung apüm te hiba athülaba müdhesohng: Hiba choo adhüreu nyümong nyitsarü mükhunü abi kukhi nengdang sanza mahkhang mizaza khüdu khyüng.

⁴Kanglungrü tsü üpümshünü tsukhangnung kukhi tsü zarakhang, nyitsarü müipinü khüdoi tsunung hütsü dükeh abi ko abi kurümrü te changtanung kohle.

⁵Nührünü san mahkhang miza khüdu khyünung kohle, ta hütsü kang khüdu za apung ko tu achomükeh thsanungbae.

⁶Hütsüpü, choo la nyümong dhüre-müyüu romang tsü, Israel hung apümnü kanglungrü tsü müpsehnung.

⁷Arühnü kuh khüila kanglungrü tsü tsunang hütsülalü trahtri bekhüm anyüdinglang ko amunglang chah tsü ashüh khyücheh münohng.

⁸Hütsü romang shuh tsü ruhnung ko singvarova akha ko Bhüpza müyohpü hümthse te tsunung.

⁹Hütsü ashühnü mahkhang kih la chongpü tütsu, ta athah, ajing ko bohnying zeh ruhpü tsung.

¹⁰Nührünü hütsü tusü nyangnyü khüu yingcheh tüyohbü; khürü nyingkhang hütsü tahpehng.

¹¹Nührünü hütsü dhsüthsa tsung, tunüo nührü shitseh nengdang jing la jingkhüm ko khehla ja binung küdangnungbae. Hiba hi Ih, ABÜDONGBA hechinung Phungkhu Thsüti lile.

¹²“Hütsü romang Ijip lih bongnü nyitsarü ko kanglungrü anyüding aukhuba ko akhu mütrücho kyüsehnung, ko Ijiprü tsingrangti khingchinü lahkhu tsinung. Ih ABÜDONGBA lile.

¹³Trahtri bekhüm chah ashüh tsü nührü licho amüdhethsa linung. Khode Ihnü ashüh tsü ngunang, Ihnü nührü bongkhu tsinung ko Ihnü Ijiprü khingchide nührülü müdhsakehjünung.

¹⁴Nührünü hiba nyümong hi Ih, ABÜDONGBAnü tu nguchicho hütsü amünbüchünung ayah nyümong kang müzeh mung. Aronung shang apüm la hi müzeh bichieng.”

¹⁵ABÜDONGBAnü yocho, “Nyümong dhünyeh nührünü Bhüpza yohcho hümthse tütsu, bhüpza müyohcho hümthse du tsung. Akhudiba nyümong nührü kuh lanü bhüpza pehng, tunüo khürünü hiri nyümong dhünyeh kahla bhüpza yohcho hümthse tsukhang, abilü I nyitsarü yola mükhiyohnung.

¹⁶Akhudiba nyümong ko dhünyeh-uba nyümong nührünü ashimükhong lieng. Hiri nyümong la chongkyanung chah khu apa tu nguchi tünguchi.

¹⁷Hiba thsüti hi mung, tunüo hiba nyümong Ihnü nührü hung Ijip lanü nüchehcho. Aronung shang apüm la nührünü hiba nyümong hi thsüti mung.

¹⁸Akhudiba choo nyümong dhüre-müyü romang tinü mükyüpü khüdu romang chii, nührünü bhüpza yoh külüpcho hümthse tusü tütsu.

¹⁹Nyümong dhünyeh nührü kuhla bhüpza müyohpünungbae, tunüo abüdongrü thsanye shuparü thsanye, khürünü bhüpza yoh külüpcho hümthse tsukhang, abilü I nyitsarü yola mükhiyohnung.”

²⁰

²¹Mosanü Israel la azibarü atümung dsinü arüh te yocho, “Nührü kukhi la Phungkhu Thsüti müzehnung shulüm, nührü atümungnü sanza mahkhang mizaza khüdu-khüdu khyüng.

²²Hyssop müphungo khyo kanglungrü shüh zehba mütpah-tbhü la tsü thsang ko trahtri bekhüm ko athahlang tsü müyühng. Ko mütsingsede nührü süsü kuh lanü tüchüdu.

²³ABÜDONGBAnü Ijiprü müpsehnung Ijip lih bong tside, Abinü nührü trahtri chah ashüh tsü ngunung ko nührü mümüpsehnung. Asüba Riwürü tsü nührü kuhla müzürosohnung.

²⁴Nührü ko nührü tsuzarütinü hiri yuzeng lede bichieng.

²⁵Khode nührünü anyengchocho lih la tsü züdunang, hiba ayahmübü hi nguching.

²⁶Nührü tsuzarütinü nührü te, ‘Hiba ayahmübü hi tu adüzüo?’ pü tsingdhengkhang,

²⁷nührünü hita laling, ‘Hiba hi ABÜDONGBA dhichinung Phungkhu Thsüti kangmübü lile, tunüo abinü Ijip lih la Israelrü kuhlü bongkhu tsicho. Abinü Ijiprü müpsehcho, ta Ihsalü rikicho.’ ” Israelrünü mükhukeh mübücho.

²⁸Ko arühnü wü ABÜDONGBAnü Mosa e Aron nyüh te yuzeng jücho kyo nguchicho.

²⁹Yürüptülung la ABÜDONGBAnü Ijip la aukhurüti atümung, Yangthsaba pümji khyünung liba Yangthsaba tsurü chahnü dikeh shukuh la arangyoh la lirü tsurü miinü müpsehcho ko akhudiba mütrücho kanglungrüsü apüm müpsehcho.

³⁰Hütsü romang, Yangthsaba, abi thsazirü ko Ijiprü atümung jesucho. Ijip lih apümlang trakhitrayo amülah licho, tunüo kuh khüdu la dusü aukhuba mümüpsehpü mülicho.

³¹Hütsü romang tsünü Yangthsabanü Mosa e Aron nyüh dsiro yocho, “Tsipehng, nüh ko nührü Israelrüti! I limih pehjüng; nührünü tsingdhengcho kyo, wüng ko nührü ABÜDONGBA mübüng.

³²Nührü san, miza ko misüti nüpü tsieng. Ko I nengdangsü dangkhidangnangjüng.”

³³Ijiprünü arüh limih pehjüpü dhsüthsa tsinung kihchicho; arühnü yocho, “Nührü mütsikhang ihrü atümung sükhangnung.”

³⁴Achotsü müyurütinü Bhüpza müyohcho hüm ko hüm ruhfüh arüh shü lanü tümpü arüh pakyarü chahnü dhicho.

³⁵Israelrünü Mosanü yocho kyo nguchicho, ko Ijiprü te arüh hon ko taripi kohro ko arüh jengki chingcho.

³⁶ABÜDONGBAnü Ijiprü khyang nyitsarü apüm khyang jengreng jüsohcho ko arühnü chingcho apüm jüsohcho. Hütsüta Israelrünü Ijiprü kuthsi hitsicho.

³⁷Israelrünü jingnü Rameses lanü Sukot yang shemüsucho. Arüh khingkurü azarü mükhipü adhrerü dunü hajar thsih dhüro-o thsacho.

³⁸Arüh yola aparüsü khütango ko san, miza ko misü adrong zeh wücho.

³⁹Arühnü Ijip lanü hiba hüm la tsünü Bhüpza müyohpü hümthse külüpcho, tunüo thohdhünü arüh Ijip lanü iipehchonü arüh tsangdhi mürungnümpahcho mahkhang bhüpza yoh hüm mükülüp-pahcho.

⁴⁰Ijip la Israelrü kang 430 licho.

⁴¹Kang changka nyümong, ABÜDONGBA nyitsarü atümung Ijip pehjücho.

⁴²ABÜDONGBAnü Ijip lanü arüh nüchehnung jümyaba bekhyah tsü aromang thsacho; hiba romang tsü aronung shang apüm la Israelrünü dhengyanung müsachehjücho.

⁴³ABÜDONGBAnü Mosa e Aron nyüh te yocho, “Phungkhu Thsüti yuzeng hiri linung: Shuparü Phungkhu Thsüti tsuyongba mütsunung,

⁴⁴ta nühnü lihcho ayurünye müjüp-pehkhang, tsunung kohle.

⁴⁵Amüshu lirü ko amülihcho shehsherü sünüsü hi tsunung mükoh.

⁴⁶Tsuyongnung apüm tsü achongkyaba kuhla tsünü tsukhangnung athsalang; dongkhu mühitsinung. Ko kanglungrü rüh tsü tusü tüthsangnyang.

⁴⁷Israel hung apümnü hiba thsüti hi müzehnung,

⁴⁸ta amümüjüp-pehrü sünüsü hi tsunung mükoh. Nührü yola lirü shuparü khüdunü Phungkhu Thsüti müzeh la zehnyükhang, nühnü arüh kukhi la adhrerü atümung akhu müjüp-pehjüng. Hütsüpü du abi tsü Israelrü shutsakhung kyo khiyohnung ko thsüti la tsü zehnung kohle.

⁴⁹Hiba yuzeng akyokyo tsü shutsakhung Israelrü ko nührü yola shuparü chah bichinung.”

⁵⁰Israelrü atümungnü ABÜDONGBAnü Mosa e Aron nyüh te tu yocho hütsü nyi bichicho.

⁵¹Hütsü nyümong ABÜDONGBAnü Ijip lanü Israelrü yucho nüchehcho.