Read Sangtam Naga NÜCHEHCHO 13 Bible Online

NÜCHEHCHO 13 - Sangtam Naga bible

NÜCHEHCHO 13

¹ABÜDONGBAnü Mosa te yocho,

²“Aukhurü adhrerü atümung I khyang müsacheh jüng, tunüo aukhurü Israelrü adhrerü atümung ko akhu mütrücho kanglungrü atümung I yo lile.”

³Mosanü müyurü te yocho, “Hiba nyümong hi lümkehng; nührü ayurüthsa liba Ijip lanü nüchehba nyümong. ABÜDONGBAnü abi zii amülah la nührü nüchehba nyümong tsü hi. Bhüpza yohcho hümthse mütsunung.

⁴Akhudiba, Abib choo, chünye nührünü Ijip pehjücho.

⁵ABÜDONGBAnü nührü jümürüti te Kananrü, Hit-rü, Amor-rü, Hivrü ko Jebusrü lih hi nührü khyang jünungepü yuchüm nyengchoko. Khode abinü nührü hütsüba nyikih ko thsakukih pohyaba lih la tsü noronang, nührünü kang mükhu akhudiba choo chah hiba thsüti hi müzeh mung.

⁶Nyümong dhünyeh nührünü bhüpza müyohba hümthse tsung ko dhünyeh nyümong tsü ABÜDONGBA dhichi thsüti khüdu lieng.

⁷Nyümong dhünyeh nührünü bhüpza yoh külüpcho hümthse tu tütsu; nührü lih khüdesü bhüpza mahkhang bhüpza yoh külüpcho hümthse tülisoh.

⁸Khode thsüti tsü dikehnang, nührü tsuzarü te nührünü nguchiba hi nührünü Ijip lih pehjüde ABÜDONGBAnü tu nguchicho hütsü nengdang nguchirepü changnah young.

⁹Hi müzehcho khu nü khehla, mahkhang nü kikhang chah lango rahkehpücho kyo amüdhethsa linung; hi khu ABÜDONGBA yuzeng yangchinung ko khinung lümkehsohnung, tunüo ABÜDONGBAnü Abi zii amülah la nührü Ijip lih lanü nüchehko.

¹⁰Kang mükhu hiba thsüti hi athrochehcho nyümong la mung.

¹¹“Nührü ko nührü jümürüti te ABÜDONGBAnü yuchüm nyengchocho Kanan lih lang tsü nührü noronung. Khode abinü hütsü nührü khyang jünang,

¹²nührünü ABÜDONGBA khyang aukhuba tsü amübü jüng. Nührü kanglungrü chahnü akhu mütrücho apung tsü ABÜDONGBA yo,

¹³ta nührünü abi chahnü thali sanza jüpü, gadu apunglü khyülinung kohle. Nührünü gadu tsü thali mülihchonyükhang, ahong tsü xisahjüng. Nührünü nührü tsurü aukhuba tsü lihchoung.

¹⁴Aronung la, hütsü tu adüzüo pü tsingdhengkhang, nühnü abi te, Ijiprü khehla ayurü suro lanü ABÜDONGBAnü Ihsa khümchochoepü young.

¹⁵Khode Ijip Yangthsabanü alasih müküp Ihsa mütsisohcho, ABÜDONGBAnü Ijip lih la, nyitsarüsü ko kanglungrüsü aukhuba müpsehcho. Hütsünü Ihsanü akhu mütrücho apung kanglungrü kangmübü jürede tsuzarü aukhurülü lihchehlire.

¹⁶Hiba hi lango alümkehnung Ihsa khehla mahkhang kikhang chah müthsühkehcho kyole; hi khu ABÜDONGBAnü abi zii amülah khu Ijip lanü Ihsa nüchehchoepü lümkehsohre.”

¹⁷Khode Ijip Yangthsabanü müyurüti tsü tsisohcho; Filistia lang wüba lang tsü amünyeh-u thsanye, ABÜDONGBAnü hütsüba lang tsünü arüh münücho. Tsingrangbanü lümcho, “Nyitsarütinü khata mütohde arüh lasih thsamüla Ijip lang müthalisohnyüre.”

¹⁸Hütsünü, abinü arüh Amoh Kihdi yang lipilih khu amükanglangnü nücho. Israelrü tsü khata nengdang küdangpü licho.

¹⁹Josefnü Israelrü khyang yuchüm nyengchosohcho kyo, Mosanü Josef rüh tsü bicho. Josefnü yocho, “Khode Tsingrangbanü nührü khümchonang, hiba müdüm lanü nührünü Ifü hitsieng.”

²⁰Israelrünü Sukot pehjüpü ro lipilih chihpü Etham la nyehkehcho.

²¹Anyümong ABÜDONGBAnü arüh belang nyükhi dongdinü ko aromang michang dongdinü nücho, hütsünü arühnü aromang ko anyümong tsehcho.

²²Anyümong nyükhi dongdi ko aromang michang dongdi tsünü müyurü tenü müzacho.