Read Sangtam Naga NÜCHEHCHO 14 Bible Online

NÜCHEHCHO 14 - Sangtam Naga bible

NÜCHEHCHO 14

¹Hütsüpü ABÜDONGBAnü Mosa te yocho,

²“Israelrü te ximüla Baal Zefon amünyeh, Migdol e Amoh Kihdi nyüh kahla Pi Hahirot bete müdongnung young.

³Yangthsabanü Israelrü tsü hütsüba lih la lipilihnü mükangtipü rümchi rachilepü lümnung.

⁴Ihnü abi lasih müküpsohnung ko abinü nührü iironung ko Yangthsaba ko abi rothsarü michah Ih akoh tsünü I khyang adhichi hirojünung. Hütsüde Ijiprünü Ih tsü ABÜDONGBA pü müdhenung.” Israelrünü arüh te yocho kyo nguchicho.

⁵Khode Farao te müyurüsü tsikopü yocho, abi ko abi thsazirünü arüh lasih thsamüla yocho, “Ihsa hi tu nguchicho? Ihsanü Israelrü tsisohko, ko Ihsa ayurü mülipehko!”

⁶Yangthsabanü abi khata kuri kari ko rothsarüti thridhrongcho.

⁷Abinü abi nyübong kari atsauba thsih dhüroh te anüchirü zeh shemüsucho.

⁸ABÜDONGBAnü Yangthsaba tsü alasih müküp kangsohcho ko abinü Israelrü ABÜDONGBAnü müsi mülah tsiyaba tsü iiwücho.

⁹Ijiprü rothsarü kuri, kuri kari ko anüchirü zehnü arüh iiwücho ko arüh Amoh kihdi shündhün Pi Hahirot ko Baal Zefon la müdong lide ro iiphücho.

¹⁰Khode Israelrünü Yangthsaba ko abi rothsarüti arüh iiro ngucho, arühnü drümüyang ABÜDONGBA te züdecho.

¹¹Arühnü Mosa te yocho, “Ihrü nengdang Ijip la kong mülicho do? Nühnü ihrü lihpi hila süsohnung norochoe ang? Nühnü ihrü Ijip lanü nüchehba hi tu nguchicho dheng?

¹²Hita tikeh ririepü müshemüsudenü ihrünü müyocho do? Ihrünü nü te ihrü hita Ijiprü yurüthsa pehjüng pü müyocho do? Lipilih hila sünung tenülü hütsüla ayurü thsanung tsü atsaubae.”

¹³Mosanü lalingcho, “Tüdrü! Drengdreng yang, ko chünye nührü khümchonung ABÜDONGBAnü tu nguchinang nührünü ngunung; nührünü Ijiprü hiri khodesü thali müngunung.

¹⁴ABÜDONGBAnü nührü shulüm khatajünung; nührü yah-a du lieng.”

¹⁵ABÜDONGBAnü Mosa te yocho, “Tuepü I te arüku nengdang tra kihchiro? Müyurü te bekhu tsiengpü young.

¹⁶Nü ja tsü kihdi michah dhimüsu bi yang. Kih tsü changsahnung ko Israelrü kihdi khu akung la tsehcheh tsinung.

¹⁷Ihnü Ijiprü tsü arüh lasih müküpsoh nührü ii züdusohnung ko Ihnü Yangthsaba, abi rothsarü, abi kuri kari ko anürüti michah akoh ngunung.

¹⁸Khode Ihnü arüh kohnang, Ijiprünü Ih tsü ABÜDONGBA epü müdhenung.”

¹⁹Tsingrangba riwürü, sü Israel rothsarü bekhu wücho, shehli arüh akhanglang wücho.

²⁰Ko nyükhi dongdi tsüsü Ijiprü ko Israelrü kahla zürocho. Nyükhi tsünü Ijiprü nengdang marürahsohcho, ta Israelrü nengdanglü visohcho, hütsünü rothsarüti tsü ama ayung khüdunü khüdu shündhün müwüchehcho.

²¹Mosanü kihdi michah akheh dhimüsucho ko ABÜDONGBAnü kihdi tsü nyüchüro nyübongnü dee zi füsohcho. Hütsü müyüp fücho ko kihdi tsünü alih akung kangcho.

²²Kih tsü changsahcho ko anyüdinglang kih dengzi chongcho ko Israelrü kihdi la tsü alih akung lanü khu tsicho.

²³Ijiprünü kihdi la tsü arüh kuri, kuri kari ko anürüti atümung zeh arüh ii züducho.

²⁴Tsingsenung thsade ABÜDONGBAnü Ijiprü chah michang ko nyükhi dongdi khu dhengchahchücho ko arüh lümdhamasohcho.

²⁵Arüh atsi mütsasohnung abinü arüh kuri kari jing lahrangsohcho. Ijiprünü yocho, “ABÜDONGBAnü Ihsa nyüm Israelrü nengdang khatajüle. Ihsanü hilanü tsinung.”

²⁶Hütsüde ABÜDONGBAnü Mosa te yocho, “Kihdi michah nü kheh dhimüsung ko Ijiprü, arüh kuri kari ko kuri nürüti michah kih tsü thali pohnung.”

²⁷Achotsü Mosanü kihdi michah akheh dhimüsucho ko tsingsedelü kih tsü asusuh pohcho. Ijiprünü kih la tsünü tsinung müküpcho, ta ABÜDONGBAnü kihdi la arüh dselicho.

²⁸Kih tsü thali ronü kuri kari, anürüti ko Ijiprü rothsarü Israelrü kihdi chii iiroba atümung tsü mülümticho; ko arüh süsü münyingcho.

²⁹Ta Israelrülü kihdi anyüdinglang kih dengzinü chongtipü alih akung la tsehcheh tsicho.

³⁰Hütsü nyümong ABÜDONGBAnü Ijiprü kheh lanü Israelrü khümchocho ko Israelrünü kihbekhüm la arüh sükhang jo ngucho.

³¹Khode Israelrünü ABÜDONGBAnü Ijiprü Abi zii amülah khu kohchehcho ngucho, arühnü ABÜDONGBA ko Abi dikehrü Mosa chah yudsicho.