Read Sangtam Naga NÜCHEHCHO 15 Bible Online

NÜCHEHCHO 15 - Sangtam Naga bible

NÜCHEHCHO 15

¹Hütsüde Mosa ko Israelrünü ABÜDONGBA te khi hi thsacho: “Ihnü ABÜDONGBA te khi thsanung, tunüo abinü ahechi akoh nguko; abinü kuriti ko hütsüri chah pümrüti kihdi la dhsangsehsoko.

²ABÜDONGBA tsü rezeh I tsungtirü; Ih khümchobong tsü Abi lile. Abi I Tsingrang ko Ihnü Abi senung, Iu Tsingrang ko Ihnü Abi dicho nengdang khi thsanung.

³ABÜDONGBA tsü rothrungrü; ABÜDONGBA tsü Abi neng.”

⁴“Abinü Ijiprü rothsarü ko arüh kuri kariti kihdi la züdu dhsangsehsocho; anüchirü atsaubati Amoh kihdi la dhsangsehsocho.

⁵Kihdi asohnü arüh tingticho; lung kyo ajongnah la shohyohtsicho.”

⁶“ABÜDONGBA, Nü kheh tsalangthring tsü zii la adrünung kehle. hütsünü arorüh zangzang thsangnyangjüre.

⁷Nüh Adibong Akohba la nühnü Nü rorüh kohko; Nü rihlong drüre ko arüh manying kyo tahpehre.

⁸Nühnü kihdi michah mehcho ko kih tsü athseng khangpücho; hütsü züdi kyo müchongkhüti yacho; kihdi la asoh-uba tsü lung kyo kangcho.

⁹Arorühnü yocho, ‘Ihnü arüh iiwünung ko arüh rangnung; Ihnü arüh kuthsi changjünung ko I khyünyücho apüm khyünung; Ihnü I nohsheng tohchehnung ko arüh licho apüm khyünung’.

¹⁰Ta ABÜDONGBA, Nü sah khüdupi chide, Ijiprü dhsangsehkhangcho; arüh adrünung kih la imüluh kyo shohyohtsicho.”

¹¹“ABÜDONGBA, tsingrangti yola Nüh kyo sü liro? Nüh kyo Amüsa la anyemüyangnung sü liro? Sünü Nüh kyo thsayahiya ko akohba nguchi nguchinung?

¹²Nühnü Nü kheh tsalang müyungchücho, ko alihnü ihrü rorüh münyücho.

¹³Nüh anyengchocho la yuje cho, Nühnü khümchocho müyurü nücho; Nü renü amüsa lih yang arüh norocho.

¹⁴Yuchotinü hütsü yuchicho, ko adrüchonü dhridhricho; Filistiarü alümxünü jengcho;

¹⁵Edom langnürüti drümüyangcho; Moab athrungrüti dhridhrire; Kananrü suhzahpehko.

¹⁶Adrü aringnü arüh jengcho, Arühnü Nü re ngure, O ABÜDONGBA, Nü nyitsarü, Nühnü ayurü suro lanü lehcheh müthehbati shehkhu mütside, drüseh yare.

¹⁷Nühnü arüh norore ko Nü zong la arüh lisohre. ABÜDONGBA, Nühnü Nü kuh thsanung throchehba müdüm, Nüpunü thsaba Nü Amübükuh.

¹⁸Nüh, ABÜDONGBA, achangka müli Yangthsaba linung.”

¹⁹Israelrü kihdi khu alih akung la tsehcheh tsicho. Ta khode Ijiprü kuri kari, kuriti ko anürü kihdi la tsü züducho, ABÜDONGBAnü kih tsü thali rosohcho ko arüh tingticho.

²⁰Aron nirü azikehlarü Miriamnü abükyü tambourin bicho ko khingkurüti atümungnü abükyü khanglang tambourin thsa nyiichicho.

²¹Ko Miriamnü arüh khyang khi thsacho: “ABÜDONGBA te khi thsaang, tunüo abinü ahechi akoh nguko; Abinü kuriti ko anürüti kihdi la thsangsehsohcho.”

²²Hütsüpü Mosanü Israelrü tsü Amoh kihdi lanü Shur lipilih lang norocho. Arühnü akungaselih khu nyümong asang tsehcho, ta kih müngucho.

²³Hütsüpü arühnü Mara dsiba müdüm chii rocho, ta hütsüba kih tsü khura khachonü arühnü müyongchehcho. Hütsünü hiba te Mara pü dsicho.

²⁴Müyurünü Mosa te jümjüm yocho, “Ihsa tu yongnung?”

²⁵Mosanü ABÜDONGBA te khahkhah dangkhidangnangcho, ko ABÜDONGBA nü abi te sing khüdu ngusohcho, ko hütsü abinü kih la tsü yohcho; ko kih tsü ayongnung tsa kangpehcho. Hütsüla ABÜDONGBAnü arüh alinung nengdang yuzeng jücho, ko abinü hütsüla arühsü thsatsodhengcho.

²⁶Abinü yocho, “Nührünü I lümcho khyo ko I yuzeng yohpo I yocho nyikhang, Ijiprü chah chihsohba dhsara tunüsü nührü mükhingchisohnung. Ih nührü kyangjübong ABÜDONGBA.”

²⁷Hütsü lanü arühnü kihna dhüre-anyüh ko sedong nyühre liba Elim chii rocho; ko arühnü hütsüla kih shündhün müdongcho.