Read Sangtam Naga NÜCHEHCHO 16 Bible Online

NÜCHEHCHO 16 - Sangtam Naga bible

NÜCHEHCHO 16

¹Israel hung apüm arühnü Ijip pehjüpü choo anyüu nyümong dhüre-münga la, arühnü Elim lanü shemüsu ro Elim e Sinai nyüh kahla Sin akungaselih chihcho.

²Hütsüba akungaselih la arüh atümungnü Mosa e Aron nyüh te jümjüm yocho,

³“ABÜDONGBAnü ihrü Ijip la tsünü müpseh pehba thsako. Hütsüla ihrünü pümpü shuh ko apa ihrü tsunyücho tsuba thsako. Ta nühnü ihrü kongsehsohnung hiba akungaselih la noroko.”

⁴ABÜDONGBAnü Mosa te yocho, “Ade Ihnü ninglangnü nührü atümung nengdang tsang longsohnung. Nyitsarünü nyümong mükhu wü hütsüba nyümong kükyü du throbülungsohng. Hütsüta arühnü Ih athülaba bichiro mübichiro arüh thsatsodhengnung.

⁵Adhüroh-u nyümong arühnü lede tenü anyüshi alaa khyübülung zahkehsohng.”

⁶Achotsü Mosa e Aron nyühnü Israelrü atümung te yocho, “Shomülang nührünü Ijip lanü nührü nüchehba tsü ABÜDONGBAnüepü müdhenung.

⁷Anyangnyü nührünü ABÜDONGBA zehcho ahechi atsingse khu müdhenung. Abi nyümcho ko Abi nyüm nührü jümjümcho Abinü yuchiko, tunüo Ihsa Abinü thülacho khanglang du würe.”

⁸Hütsüpü Mosanü yocho, “ABÜDONGBAnü anyüzehlang nührü khyang atsunung shuh jünung ko anyangnyü nührü tsuxah tsang jünung, tunüo Abi nyüm nührü jümjüm Abinü yuchiko. Nührünü ihrü nyüm jümjümde nührünü ABÜDONGBA nyüm jümjümre.”

⁹Mosanü Aron te yocho, “Müyurü apümnü ro ABÜDONGBA bete yanung young, tunüo Abinü arüh jümjüm yuchiko.”

¹⁰Aron-nü müyurü apüm te chotade, arühnü akungaselih lang tsü ximüla dhengcho ko dhrongyengnü ABÜDONGBA ahechi atsingse nyükhi la chürocho.

¹¹ABÜDONGBAnü Mosa te yocho,

¹²“Ihnü Israelrü jümjüm yuchiko. ‘Yingrüm tside arühnü atsunung shuh ngunung ko anyangnyü arüh tsuxah tsang ngunung. Hütsüde, arühnü Ih, ABÜDONGBA tsü arüh Tsingrangepü müdhenung.’ ”

¹³Anyüzehlang arüh müdongba jeng mümüyüh rümyohcho ko anyangnyü arüh mükang yingkih licho.

¹⁴Khode yingkih tsü asah kangcho, akungaselih la tsü lango ajengpa ko mülung mülung kang licho. Hütsü ii kyo licho.

¹⁵Khode Israelrünü hütsü ngucho, hütsü tunang arühnü mütsüpchonü arüh-e arührü tsingtacho, “Hi tuo?” Mosanü arüh te yocho, “Hiba hi ABÜDONGBAnü nührü khyang atsunung jüchoba Manna tsang lile.

¹⁶Nyitsarü müipi palu kükyü, kukhi la khiyoh müipi liter anyüh-nyüh du throbülungnung ABÜDONGBAnü yuzeng jüre.”

¹⁷Israelrünü hita nguchicho, khürünü alaa ko khürünü müchi throbülungcho.

¹⁸Khode arühnü kyah-dhengcho, sürünü alaa khyübülungcho arüh alaa mülicho, ko sürünü müchi khyübülungcho arühsü amüchi müthsacho. Nyitsarü müipi abürü kükyü du khyübülungcho.

¹⁹Mosanü arüh te yocho, “Sünüsü hütsü atu shulüm tüyohbü.”

²⁰Ta khürünü Mosa yu münyipü khürü riki yohpücho. Nyangnyü khüu hütsü müsi züdu asüh xümcho, ko arüh te Mosa zichürocho.

²¹Hütsüta nyangnyü mükhu nyitsarü müipi palu kükyü khyübülungcho ko khode nyüthung kangcho, alih la nying liba tsü zünah pehcho.

²²Adhüroh-u nyümong tsü arühnü anyüpinü alaa nyitsarü müipi liter müyü yü khyübülungcho. Tsutpu la azibarüti atümungnü ro hütsü nengdang Mosa te yocho,

²³ko abinü arüh te yocho, “Atu Amüsa akyahshang nyümong ko hütsü abi khyang müsacheh jüng pü ABÜDONGBAnü mülajüre. Nührünü hümthse ruhnyücho chünyenü ruhng ko ngüpnyücho chünyenü ngüpm. Anyingcho tsü atu nengdang riki yohpüng.”

²⁴Mosanü yuzeng jücho kyo, anyingcho tsü nyümong khüdu yingcheh yohpücho; hütsü müthsangnyangcho mahkhang müsi müzüducho.

²⁵Mosanü yocho, “Hi chünye tsung, tunüo chünye hi Amünyümong, ABÜDONGBA khyang müsachehcho kyahshang nyümong lile, ko dongkhu nührünü atsunung tu müngunung.

²⁶Nyümong dhüroh nührünü tsang khyübülungnung, ta dhünyeh-u nyümong tsü, kyahshang nyümong, tusü müngunung.”

²⁷Adhünyeh nyümong tsü khürünü tsang khyübülungnung wücho, ta arühnü tu müngucho.

²⁸Hütsüde ABÜDONGBAnü Mosa te yocho, “Nü müyurütinü khüdoi nyahli I yocho münyinung?

²⁹Ih, ABÜDONGBAnü akyahshang nyümong khüdu jüre, hütsünü adhüroh nyümong tsü nührü khyang nyümong anyüh nengdang kükyo tsang jüre hütsü lümkehng. Dhünyeh nyümong tsü nyitsarü mükhu abi khüde linang hütsüla abi kuh müpehjüpü lieng.”

³⁰Hütsünü dhünyeh nyümong tsü müyurünü nguchi münguchicho.

³¹Israelrünü hiba atsuba te tsü Manna pü dsicho. Hütsü singtse athru khüdu kyocho ko atsunung thsakukih yoh külüpcho hümthse kyocho.

³²Mosanü yocho, “ABÜDONGBAnü Ihsa Ijip lanü nüchehde akungaselih la Ihsa khyang atsunung jüba tsang tsü Ihsa shümtsurü khyang ngusohnung shulüm; Ihsanü manna tsü khürü riki yohpüng pü Abinü yuzeng jüre.”

³³Mosanü Aron te yocho, “Alihfüh khüdu hiro, hütsüla manna tbhü anyüh yohng, ko Ihsa shümtsurü nengdang ABÜDONGBA liba la tsü yohpüng.”

³⁴ABÜDONGBAnü Mosa khyang yuzeng jücho kyo, Aron-nü hütsü Yuzeng Singdi bete yohpücho.

³⁵Israelrünü arüh ro Kanan la li yingcheh, kang yüre manna tsucho.

³⁶(Hütsütade ahosing khüdu tsü liter mükyü doi lile.)