Read Sangtam Naga NÜCHEHCHO 17 Bible Online

NÜCHEHCHO 17 - Sangtam Naga bible

NÜCHEHCHO 17

¹Israel yucho shünü Sin akungaselih lanü, ABÜDONGBAnü mülacho la müdüm khüdu lanü khüdu shehmüi li rachicho. Arühnü Refidim la müdongcho, ta hütsüla ayongnung kih mülicho.

²Arühnü jümjüm Mosa te yocho, “Ihrü khyang ayongnung kih khülo” Mosanü lalingcho, “Tuepü nührünü jümjüm yoro? Tuepü ABÜDONGBA thsatsüro?”

³Ta müyurüti xosehchonü mütozah Mosa te jümjüm yocho. “Tuepü ihrü, ihrü tsuzarüti ko ihrü akang kuthsi xoseh süsohnung ihrü Ijip lanü nüchehcho?”

⁴Mosanü ABÜDONGBA te khahkhah kihchi yocho, “Ihnü hiri nengdang tu nguchinung? Arühnü Ih kengsehnung thsale.”

⁵ABÜDONGBAnü Mosa te yocho, “Nü yola Israel zirü khürü nüng, ko müyurü bekhu püte. Nühnü Nile la xüpba ja tsü bieng.

⁶Ihnü Sinai zong la nü jingte lung khüdu michah yanung. Lung chah xüpm, ko hütsüla nü müyurüti yongsohnung kih pohchehnung.” Hütsüta Mosanü Israelrü bete nguchicho.

⁷Hütsüba müdüm te Masa ko Meriba dsicho, tunüo Israelrünü, “ABÜDONGBA Ihsa te mülio? pü yo, jümjüm abi thsatsücho.”

⁸Refidim la Amalekrünü ro Israelrü mahcho.

⁹Mosanü Joshua te yocho, “Nyitsarü khürü throcheh atu wü Amalekrü te khatasohng. Ihnü akhang chah tsü Tsingrangbanü binung yoba I ja tsü bipü yanung.”

¹⁰Joshuanü Mosanü yocho roh-i, Mosa, Aron ko Hur azong la tsü küdude, arühnü Amalekrü te khatanung wücho.

¹¹Mosanü akheh dhimüsu yazah, Israelrünü kohcho, ta khode akheh dhichonang, Amalekrünü koh rocho.

¹²Khode Mosa kheh kyahcho, Aron e Hur nyühnü lung hiro abi pümsohcho, hütsüpü anyünü nyü züdu yingcheh abi müshüm yapü akheh dhiyeh yacho.

¹³Hütsüta nguchi Joshuanü Amalekrü sehchi kohcho.

¹⁴Hütsüpü ABÜDONGBAnü Mosa te yocho, “Akoh hi lümkehnung nengdang vakha la thrahng. Amalekrü tsü Ihnü sehchi changjünungepü Joshua te young.”

¹⁵Hütsüla Mosanü Bholu khüdu külüpcho ko hütsü te, “ABÜDONGBA tsü I Nisan” pü dsicho.

¹⁶Abinü yocho, “ABÜDONGBA nisan tsü athseng dhimüsung. ABÜDONGBAnü Amalekrü nyüm achangka müli khatanung.”