Read Sangtam Naga NÜCHEHCHO 18 Bible Online

NÜCHEHCHO 18 - Sangtam Naga bible

NÜCHEHCHO 18

¹Mosanü Ijip lanü Israelrü nüchehde khüta Tsingrangbanü Mosa ko müyurü te nguchicho, hütsüri apüm Midianrü bebüba Mosa aku Jethronü yuchicho.

²Achotsü abinü Mosanü pehjo tsicho anitpü Zippora,

³ko atsurü Gershom ko Eliezer norojücho. (Mosanü yocho, “Limih asi la Ih shuparü khüdue”; hütsünü atsurü khüdu Gershom dsicho.

⁴Abinü hisü yocho, “Iu Tsingrangnü Ih rükuko ko Faraonü Ih müpsehnung lanü khümchoko;” hütsünü abinü anyüuba atsurü neng Eliezer dsicho.)

⁵Jethronü Mosa nitpü ko atsurü anyüh nüpü Amüsa zong la Mosa liyaba akungaselih lang rocho.

⁶Arüh tsehlepü abinü yuva jücho,

⁷hütsünü Mosanü abi mütohnung wücho, ajingchah mükhukeh abi chah müthsüpcho. Arühnü khüta lirünang tsingtapü Mosa Shükuh la tsü züducho.

⁸Mosanü Jethro te Israelrü khümchonung shulüm Tsingrangbanü Farao ko Ijiprü te tu nguchicho hütsüri apüm yocho. Abinü adesü lang la müyurüti thsamütsa mütohcho ko ABÜDONGBAnü khümchocho nengdangsü yocho.

⁹Jethronü hiri apüm yuchide abi dee künyangnü yocho,

¹⁰“Farao ko Ijiprü kheh lanü nührü khümchobong ABÜDONGBA seing: Apu müyurü ayurü suro lanü khümchocho ngang, ABÜDONGBA seing.

¹¹ABÜDONGBA tsü tsingrangti apüm tenü adiubaepü Ihnü ade müdheko, tunüo abinü hi Ijiprünü Israelrü sehchi bichide nguchicho.”

¹²Hütsüpü Jethronü Tsingrangba khyang trüp mübünung shulüm kangmübü hirocho; ko Aron ko Israel zirü atümungnü mübüba khüdu kang Amüsa tsuyong tsunung abi yola wücho.

¹³Nyümong khüu tsü müyurüti kahla yukhanung anyangnyünü ma Mosa müdengcho.

¹⁴Khode Jethronü Mosa nguchi hütsü doi ngucho, abinü tsingdhengcho, “Müyurü nengdang nüh hidoi nguchiba hi tuo? Müyurü nü mükang anyangnyünü ma yasohpü, tuepü nü müleng dunü yukharo?”

¹⁵Mosanü lalingcho, “Müyurünü Tsingrangba lümcho müdhenung Ih yang rochonü Ihnü hi nguchinung kangre.

¹⁶Khode nyüh anyüh yujinang arühnü Ih yang rore ko Ihnü arüh sü yujenang hütsü khajüre, ko Ihnü arüh te Tsingrangba amülaba ko yuzeng dore.”

¹⁷Hütsüde Jethronü yocho, “Nühnü nguchiba hi athsalang mah.

¹⁸Nüpu ko hiri nyitsarüsü kyahpehnung. Hi nü mülengnü nguchinunglü dirale.

¹⁹Ade Ihnü nü te lümlong khürü jonung ko Tsingrangba nü te zehnung. Nühnü müyurü nengla Tsingrangba te arüh yuji hiwünung athsalang.

²⁰Nühnü arüh te Tsingrangba amülaba donung ko arüh khüta linung ko tu nguchinung hütsü thülabae.

²¹Ta hütsü chah lahkeh, nühnü nguchikohrü khürü throcheh müyurü yola langnürü kangsohng: Nyüh hajar, thsih, dhünyang ko dhüre michah langnüsohng. Arüh tsü Tsingrangba drüba, longlangchehba ko pohsa mükhyüba nyitsarü thsabae.

²²Arüh tsü lede nengdang müyurüti yukharü thsasohng. Arühnü khiyu athsahti apüm nüh yang hironung, ta khiyu anümnüm apüm arüh jangjang khanung. Hütsüta arühnü nü bhamüling changta nü nengdang ayingyau kangnung.

²³Tsingrangbanü mülacho roh-i nühnü hita nguchikhang, nüpusü mükyahnung ko müyurüsü arüh yu khapü kuh lang wünung.”

²⁴Mosanü Jethro athsüchiba khyücho

²⁵ko Israelrü apüm yolanü nguchi kohrüti throchehcho. Abinü arüh hajar, thsih, dhünyang ko dhüre michah anüchirü throcho.

²⁶Arühnü müyurü nengdang lede shulüm yukhaba nguchi, khiyu athsah Mosa yanglang hirocho, ta anümnümti arühbürü jangjang khacho.

²⁷Hütsüpü Mosanü Jethro te aza yu yocho ko Jethronü kuh lang thali tsicho.