Read Sangtam Naga NÜCHEHCHO 19 Bible Online

NÜCHEHCHO 19 - Sangtam Naga bible

NÜCHEHCHO 19

¹Israelrünü Refidim pehjücho ko arüh Ijip pehjüpü choo asangu akhudiba nyümong la, arühnü Sinai akungaselih ro chihcho.

²Hütsüla arühnü Sinai khang jingdümpi müdongcho,

³ko Mosanü Tsingrangba te shirütanung azong lang tuwücho. ABÜDONGBAnü azong la tsünü abi dsicho ko Jakob trah, Israelrü te yonung yocho:

⁴“Ih, ABÜDONGBAnü Ijiprü te tu nguchicho ko müdinü aqo la aza bipü mongcho kyo Ihnü khüta nührü nücho, ko nührü hila Ih yang norocho nührünü nguko.

⁵Adelü nührünü I yochonyi I te azengtacho bichikhang, nührü I nyitsarü khung kangnung. Limih apüm I yo ko nührü I athrochehcho müyurü,

⁶I nengdang pathsa müsachehcho ko bebürünü kyo nührünü Ih dikehnung.”

⁷Achotsü Mosanü jowü müyurü yola langnürüti müjang dsibülung ABÜDONGBAnü mülacho apüm yocho.

⁸Ko müyurü apümnü müjang lalingcho, “ABÜDONGBAnü yocho apüm ihrünü nguchinung,” ko hütsü Mosanü ABÜDONGBA te yocho.

⁹ABÜDONGBAnü Mosa te yocho, “Ihnü nü te chotacho yuva müyurünü yuchi ade tinü nü chah yudsisohnung, Ihnü nüh yang nyükhi acheh la ronung.” Müyurünü lalingba tsü Mosanü ABÜDONGBA te yocho,

¹⁰ko ABÜDONGBAnü abi te yocho, “Müyurüti yang wüng ko mübünung nengdang chünye ko atu nyüh palu jangjang müsachehng pü young. Arühnü arüh jengki müsasohng

¹¹ko zihdu tsü rungnüm. Hütsü nyümong müyurü apümnü Ih ngunungthsa Ih Sinai zong chah jüronung.

¹²Nyitsarünü mülahkhunung azong tsü mükang luhrü yohng, ko azonglang mütuwünung, mahkhang hütsü amünyeh müwünung arüh te young. khürünü hütsüla jing mütrahrangkhang, abilü süsohnung;

¹³sünüsü müthapüpü lungnü müpsehnung, mahkhang tbüdengnü kyasehnung. Hi nyitsarü ko kanglungrü anyüding nengdang linung; arüh tsü süsohnung. Ta khode rühti mehnang, müyurüti azonglang tuwünung.”

¹⁴Hütsüpü azong lanü Mosa jürocho ko müyurü te mübünung rungnümnung yocho. Achotsü arüh jengki müsacho,

¹⁵ko Mosanü arüh te yocho “Zihtu nengdang rungnüm ko hiba shikhe khingkurü te tümükhong”

¹⁶Asangu nyümong nyangnyü tsü, ningkinü ko ningmülanü, azong chah tsü nyükhi khütang cheh chürocho ko rühti yuva arangcheh yuchicho. Hütsüla lirü atümung dronü dhridhricho.

¹⁷Mosanü Tsingrangba shirünung arüh nüpü wünü azong jingdümpi yacho.

¹⁸Sinai zong apüm mikhunü shüticho, tunüo hütsü chah ABÜDONGBA michang la jürocho. Mikhu tsü mihloh mikhu kyo tuwücho, ko nyitsarü atümung drümüyangcho.

¹⁹Rühti yuva tsü adiu adiu kangcho. Mosanü chotacho ko Tsingrangbanü ningki lanü lalingcho.

²⁰ABÜDONGBA Sinai khang chah jürocho ko akhang chah tsü Mosa dsikehcho.

²¹Mosanü küducho ko ABÜDONGBAnü abi te yocho, “Jowüng ko müyurü te Ih dhengnung rode luhrü tsü mükhunung müzahsohng; arühnü khukhang, arüh adrong sünung.

²²Bebürüsü Ih amünyethsa rorüh jangjangthsa müsachehng, mahkhang Ihnü arüh khingchinung.”

²³Mosanü ABÜDONGBA te yocho, “Müyurünü turonung mükoh, tunüo Nühnü azong tsü Amüsa kangsoh hütsü mükang luhrü yohko.”

²⁴ABÜDONGBAnü lalingcho, “Jowüng ko nü yola Aron no kürung. I yanglang turode bebürü ko müyurütinü luhrü tsü tükhu, mahkhang Ihnü arüh khingchinung.”

²⁵Ko ABÜDONGBAnü tu yocho hütsü Mosanü jowü müyurü te yocho.