Read Sangtam Naga NÜCHEHCHO 21 Bible Online

NÜCHEHCHO 21 - Sangtam Naga bible

NÜCHEHCHO 21

¹“Israelrü khyang yuzeng hiri jüng:

²Nühnü Ibrirü ayurü khüdu lihkhang, abinü nüh kang dhüroh dikehnung. Adhünyeh-u kang tu ajülinung mükehpü abi müthehng.

³Abi nü yurü kangde kuh mükangepü licho thsakhang, abi tside anitpü mününung; ta abi nü yurü kangde kuh kangpü licho thsakhang, abinü anitpü abi yola no tsinung.

⁴Abi abüdongbanü anitpü khyüjükhang ko abükyünü tsuzarü thsakhang, khingkutpü ko atsurüti tsü abüdongba yo kangnung ko amüleng du tsinung.

⁵Ta ayubong tsünü abi abüdongba, anitpü ko atsurüti müicho mishakhang,

⁶abi abüdongbanü abi amübü kuh lang nowünung. Hütsüla abi tsü trahtri te mahkhang trahtri kuhbi chah ngakeh yasohnung ko anangku tphehjünung. Hütsüta akang ayung abi abüdongba yurü kangnung.

⁷“Nyüh khüdunü atsulatpü ayurü thsanung ikhang, adhrerü ayurü roh-i tsü abükyülü mümüthehnung.

⁸Abükyü tsü khürü te anitpü thsanung ikhang, ko akhanglang mükhyünyükhang, abükyü au te thali inung; abinü shuparü khyang müh-ichehnung, tunüo abinü abükyü mütsa bichiko.

⁹Nyüh khüdu atsurü khyang jünung ayularü khüdu lihkhang, abinü abükyü tsü atsulatpü khüdu kyo bichieng.

¹⁰Nyüh khüdunü anitpü anyüu khyükhang, abinü akhutpüh tsüsü akhulang kyo tsuyongba, jengki ko athsalang jüng.

¹¹Abinü hiri anguchinung abükyü te münguchikhang, abinü abükyü müthehng ko tu tüching.

¹²“Sünü nyüh khüdu lahnang ko müpsehnang abi tsü süsohnung.

¹³Ta hütsü thsamehcho thsakhang, abinü Ihnü throchehjünung yangdi khüdu lang rang tsibae ko hütsüla abi khümcho linung.

¹⁴Ta khode nyüh khüdu rihlong chüro ko ahsa aparü khüdu müpsehnang, abilü I bholu yang akhümcho yangchi shangnye süsohnung.

¹⁵“Sünü au mahkhang atpa lahnang abi süsohnung.

¹⁶“Sünü ainung thsalenye mahkhang ayurü roh-i yohpünungnye nyüh khüdu rangtsinang abi süsohnung.

¹⁷“Sünü au mahkhang atpa chokehcholanang, abi süsohnung.

¹⁸“Nyüh anyüh yübütapü khüdunü aparüba chah akhehnü shingkhang mahkhang lungnü lahkhang, ta mümüpsehkhang, abi mükhingchinung. Lerohpeba tsü chongnong chah yüpnungthsa müthsakhang,

¹⁹ko akhanglang ja bipü rachichehkhang, alahba tsünü abi füthsa ayung nyükheh münohjünung ko mükyangde rükunung.

²⁰“Nyüh khüdunü ayurü khingkurü nye adhrerü nye, nyüh khüdu chah ajanü lahkhang ko hütsüla tsünü sükhang, abi khingchinung.

²¹Ta nyümong khüdu mahkhang anyüh müsükhang, abüdongba tsü mükhingchinung. Abi kuthsi changba tsü akhingchi akükyüe.

²²“Adhrerü khürü yübütade fü müdengcho khingkurü khüdu chah thsakehjüpü azarü tsü pehkhang, ta abükyü tsülü tu müdhsakehkhang, yukharünü khacho aichi khingkutpü anii tsünü khüdoi khangnyürünang thsakehjüba te tsü khangnung.

²³Ta khingkutpü tsü mii thsakehkhang, akhingchi tsü akang mülih akang,

²⁴nah mülih nah, ha mülih ha, kheh mülih kheh; jing mülih jing,

²⁵atahba mülih atahba, mathsa mülih mathsa ko alahcho mülih alahba.

²⁶“Nyüh khüdunü adhrerü nye khingkurü nye ayurü khüdu nah la thsakehjo hütsü thsangnyangkhang, anatse ngang jünung mülih, abi tsü lehcheh müthehnung.

²⁷Abinü aha shingpehjükhang, aha ngang jünung mülih abi tsü lehcheh müthehnung.

²⁸“Misüpung khüdunü nyüh khüdu khusehkhang, abi tsü lungnü kengsehnung ko ashu tsü mütsunung; ta abüdongrü tsülü mükhingchinung.

²⁹Ta misüpung tsü nanathsa nyitsarü khuhkhang ko abüdongrü müzahsohpü thali khürü khusehkhang, hütsü kengsehnung ko abüdongba tsüsü süsohnung.

³⁰Ta, abüdongba tsü apu akang rochehnyükhang abinü meh ajeng sahnung.

³¹Misüpungnü dhrezarü mahkhang lazarü khusehkhang, hütsü roh-i nguchinung khangnung.

³²Misüpungnü ayurü mahkhang ayularü khüdu khusehkhang, abüdongrü khyang tsü misü abüdongba tsünü taripi sangre jünung ko misü tsü kengseh pehnung.

³³“Nyüh khüdunü shukuh khyüticho pehkhang mahkhang jupü hütsü mükhyütikhang, ko hütsüla misüpung mahkhang gadu shohyohkhang,

³⁴abinü kanglungrü ngang tsü jüng. Abinü abüdongrü khyang thsi tsü jünung ko ame tsü khyünung.

³⁵Nyüh khüdu misüpungnü aparü misüpung khüdu khusehkhang anyünü akang liba misü tsü ieng ko thsi tsü chang; ko shuh me tsüsü anyüh changtaang.

³⁶Ta misü hütsünü lede khuhcho müdhenye ko abüdongrünü hütsü mühohchingkhang, asücho mülih akang liba misü tsü jünung, ta ame tsü abi khyünung.