Read Sangtam Naga NÜCHEHCHO 22 Bible Online

NÜCHEHCHO 22 - Sangtam Naga bible

NÜCHEHCHO 22

¹“Nyüh khüdunü misü khüdu mahkhang san khüdu fo müpseh mahkhang itsukhang, abinü misü khüdu mülih misü münga ko san khüdu mülih san müyü sahnung.

²Abi fühcho ngang abinü sahnung. Abi tusü mülikhang, afühcho sahnung shulüm apu tsü ayurü kang inung.

³Abinü fühcho kanglungrü tsü misü nye, gadu nye mahkhang san nye adesü apu kuhla akangnü ngulikhang, abinü khüdu mülih anyünü sahnung.

⁴“Aführü khüdu amala kuh rohphoh yade rangkhang, abi müpsehnye mülang mülinung. Ta hütsü anyümong tikehkhang, abi müpsehba mülang linung.

⁵“Nyüh khüdunü abi kanglungrü müthehchü bürü luh ko shükusiluh la tsusohkhang, abinü apu luh mahkhang shükusiluh lanü münohjünung athsalang.

⁶“Nyüh khüdunü aluh la michang thsürang ko hütsü müroh wünü bürü luh la tsahmarü mahkhang mabhüm tahkhang; abinü hütsü münohjünung athsalang.

⁷“Nyüh khüdunü kurümrü thsi mahkhang thsidi kohro zahkehjüde abi kuh lanü fotsikhang, ko afübong tsü rangchehkhang abinü anyüshinü alaa sahnung.

⁸Ta aführü tsü mürangchehkhang, ayohpüba apu tsü bholu lang abinü bürü yo tsü müfü pü yuchümnung noronung.

⁹“Kuthsi nengdang yuji apüm la, misü, gadu, san, jengki, mahkhang achahcho kohro masü nengdang, arohtaba nyüh anyüh tsü bholu lang nowünung. Sü mülangnang abinü akhüuba khyang anyüshinü alaa sahnung.

¹⁰“Nyüh khüdunü bürü yo gadu, misü, san mahkhang apa kanglungrü kangjüde, kanglungrü tsü sükhang mahkhang lerohpehkhang mahkhang fotsikhang ta yuzi mülikhang,

¹¹abinü bholu lang wünü abinü bürü yo kanglungrü tsü müfü pü yuchümbae. Kanglungrü tsü fühcho müthsakhang, abüdongba tsünü akohsha rangbae, ko akangjüba khyang tsü müsahsohbae.

¹²Ta kanglungrü tsü fotsisohkhang abinü münohbae.

¹³Rangmü kanglungrünü mükahsehkhang yuzi nengdang atsunying tsü hirung, rangmü kanglungrünü mükahsehcho nengdanglü abi khyang mümünohsohnung.

¹⁴“Nyüh khüdunü aparü kanglungrü khüdu nyakhang ko hütsü abüdongba mülide lerohpehkhang mahkhang sükhang, abinü hütsü sahnung.

¹⁵Ta hütsü abüdongba lide tikehkhang, abinü hütsü müsahnung. Kanglungrü tsü amülihcho thsakhang, hütsü angang tsünü müsuhnung.

¹⁶“Nyüh khüdunü amüthsengcheh mümüxingcho lazarü khüdu kihcho abükyü te yüpkhang, abinü abi angang sahng ko abükyü khyübae.

¹⁷Ta aunü abi kuhla müxengsohkhang, abinü lazatpü amii au khyang jüng.

¹⁸“Khingkurü sünü azi-among nguchiro abükyü süsohng.

¹⁹“Adhrerü sünü kanglungrü te mükhongnang abi süsohng.

²⁰“ABÜDONGBA chah khu sünü apa tsingrang khyang kangmübü jünang abi süsohng.

²¹“Shuparü khüdu nyüpmüseh mahkhang sehchi tübichi; nührü mii khüdupi Ijip lih la shuparü thsa lichoepü lümchehng.

²²Chomilarü mahkhang mürürü nyüpmüseh tübicho.

²³Nührünü arüh khingchikhang, Ih ABÜDONGBAnü arühnü I te züdede Ihnü nyijünung,

²⁴ko I zichüronü khata la nührü kyüsehnung. Nührü nitpürüti chominung ko nührü tsuzarü au müli kangnung.

²⁵“Nühnü ailümrü khyang thsi nyajükhang, thsi nyajürü kyo arüh chahnü ajehyoh tükhyü.

²⁶Nühnü arüh pümkhüm yuzi roh-i khyüjükhang, nyü müzüdude abi khyang hütsü jülieng,

²⁷tunüo abi püh lüpnung hütsü jingjinge. Abi müpinung apa tu licho? Abinü I te züdenung ko Ihnü lalingnung, tunüo Ih yanglilüm lile.

²⁸“Tsingrangba mütsa tücho, ko nührü langnürü tüchokehchola.

²⁹“Nührü shih, Di ko olive tuji lanü amübü tüzingli. “Nührü aukhuba I khyang jüng.

³⁰Nührü misü ko nührü santi la akhu mütrüchoti jüng. Akhu mütrüba apung tsü atpa te nyümong dhünyeh lisohng, ko akeh nyümong tsü I khyang amübü jüng.

³¹“Nührü I amüsa nyitsarü lile, hütsüeko rangmü kanglungrünü mükahsehcho kanglungrü shuh tütsu; hütsü füza khyang jüng.