Read Sangtam Naga NÜCHEHCHO 23 Bible Online

NÜCHEHCHO 23 - Sangtam Naga bible

NÜCHEHCHO 23

¹“Tsupohyupoh tüthsa ko arahkheh yuzi ya athsamehrü khüdu tütro.

²Sühdilangrünye amüthsalang nguchide mahkhang yuje kyühmülanung yuzi yacho la arüh tüiwü.

³Ailümrü nyüh khüdu yukhade tsah tüdheng.

⁴“Nü rorüh misü mahkhang gadu chahcho ngukhang, abi yang nüli wüjüng.

⁵Abi gadu khenü niiseh yüpjo ngukhang, nühnü abi nümüsu yasohng; lahkhu du tütsi.

⁶“Ailümrü khüdu yukhachah yade, abi tünyüm.

⁷Arahkhehnü tümülangjü ko achomükeh nyüh khüdu tüsüsoh, tunüo hütsütari amütsa nguchirü Ihnü mülangjünung.

⁸Pohsa tükhyü, tunüo pohsanü nyüh khüdu nahtohsohre ko achomükeh müyurü athsalang khyümülajüre.

⁹“Shuparü tünyüpmüseh; shuparü suro tsü nührünü müdhele, tunüo Ijip la nührüsü shuparü thsa licho.

¹⁰“Kang dhüroh nührünü luh thsanü hütsü lanü chürocho khyübülung.

¹¹Ta dhünyeh-u kang tsü luh tüthsa ko hütsü lanü chürocho tusü tüyangyo. Hütsüla liba tsü ailümrü khyang tsusohng ko anyingcho tsü rangmü kanglungrü khyang yohpüjüng. Nührü shükusiluh ko olive singdongsü hütsüta thsaang.

¹²“Nyükhih la nyümong dhüroh nguching, ta nührü yurüti ko nührü chichah mungrü ko nührü kanglungrü mii kyahshangnungthsa dhünyeh nyümong tsü tu tünguchi.

¹³“Ih, ABÜDONGBAnü nührü te yocho adhangpi nyieng. Aparü tsingrang te tükihchi; arüh neng adangchi mii tüdangchi.

¹⁴“I neng mülahsohnung kang la thsüti asang mung.

¹⁵Nührünü Ijip pehjüba Abib choo tsü, Ihnü nührü te yuzeng jücho kyo nührünü Bhüpza müyohba Hümthse Thsüti mung. Hiba nyümong dhünyeh thsüti la bhüpza yohcho hümthse tusü tütsu. Ih mübünung amübü mübipü khodesü türo.

¹⁶“Nührü maxa dikehde Maxa Thsüti mung. “Nührü shükusih ko singsih luh lanü singsih laade, Mütpahvi thsüti tsü mamüki chah mung.

¹⁷Kang mükhu hiri thsüti asang la nührü adhrerü atümungnü Ih, ABÜDONGBA nührü Tsingrang mübünung rung.

¹⁸“Nührünü I khyang kangmübü jüde, bhüpza yoh külüpcho hümthsenü tümübü. Hiri thsüti la I khyang kangmübü jücho kanglungrü su tsü nyangnyü khüu chii tüyohbü.

¹⁹“Kang mükhu ABÜDONGBA nührü Tsingrang kuh yang nührü fürü akhu xacho hirung. “Sanza mahkhang mizaza atpa nyikih lanü tüchong.

²⁰“Dheng, nührü lang la tsungtinung ko Ihnü rungnümcho müdüm la nührü noronung Ihnü nührü bekhu ninglang riwürü khüdu müthehnung.

²¹Abi yu nyieng ko abinü tonang hütsü nguching. Abi nyüm tüya, abinü mülang müpehjünung, tunüo abi Ihnü müthehcho.

²²Ta nührü abi yu nyi Ihnü yocho lüpcho nguchikhang, nü rorüh apüm nyüm Ihnü khatanung.

²³I riwürü nührü bekhu wünung ko Amor-rü, Hit-rü, Perizrü, Kananrü, Hivrü ko Jebusrü lih lang nührü nowünung ko Ihnü arüh changjünung.

²⁴Arüh tsingrang te tümükhukeh mahkhang tümübü ko arüh mübü yangthsa tükhyücho. Arüh tsingrangti thsangnyangjüng ko arüh amüsa lung-dongdi thsangnyangjüng.

²⁵Nührünü Ih ABÜDONGBA nührü Tsingrang mübükhang, nührü tsang ko kih michah amüwa linung ko dhsara khyümüijünung.

²⁶Nührü lih la khingkurü süsü long lanü müpehnung mahkhang tsuzarü müthsa mülinung. Ihnü nührü kutsüp yohpüjünung.

²⁷“Nührü nyümrü khyang Ih drüsohnung; nührü nyüm khatarü yola lümdhamasohnung ko nührü rorütinü nührü tenü ximüla dro tsisohnung.

²⁸Ihnü nührü rorüti nehsohnung; nührü wüde Ihnü Hivrü, Kananrü ko Hit-rü iipehjünung.

²⁹Ihnü arüh kang khüdu kahla mü-iipehkhangnung; tunüo alih tsü apehcho kangnung ko nührü nengdang rangmü kanglungrü tsü drongra kangnung.

³⁰Hütsüeko alih tsü nührünü mükhyükhangde arüh tsü azikyükyahnü iipehnung.

³¹Ihnü nührü lih luhrü tsü khüulang Agaba kihkong lanü Eufrates Yongkhi chii ko khüulang Mediteranean kihdi lanü lipilih tsü chii jünung. Hütsüla lirü michah Ihnü nührü khyang tase jünung ko nührü wüde nührünü arüh iipehnung.

³²Arüh te mahkhang arüh tsingrang te tu anyengchota tükülüp.

³³Nührü lih la hütsüri nyitsarü tülisoh; arüh lisohkhang, arühnü nührü khyang Ih nyüm amünyi shitpahsohnung. Nühnü arüh tsingrang mübükhang, hütsü nührü nengdang asüba uzathsa linung.”