Read Sangtam Naga NÜCHEHCHO 24 Bible Online

NÜCHEHCHO 24 - Sangtam Naga bible

NÜCHEHCHO 24

¹ABÜDONGBAnü Mosa te yocho, “Nüh, Aron, Nadab, Abihu ko Israel zirü arüh nyühre Ih yang azong la tsü kürung; ko ashu lanü I te mükhukeh mübüng.

²Süsü münüpü nü müleng I shündhün rung. Müyurülü azong la tsü tükürosoh.”

³Mosanü wü müyurü te ABÜDONGBAnü yocho yu ko yuzeng apüm yocho ko müyurünü müjang yocho, “ABÜDONGBAnü yocho lüpcho ihrünü nguchinung.”

⁴Mosanü ABÜDONGBA yuzeng apüm thrahyohcho. Nyangnyü khüu mütoh azong jingdümpi bholu khüdu külüpcho ko Israel hung müipi nengdang lung dhüre-anyüh khyümcho.

⁵Hütsüpü abinü dhrezarü khürü mütheh ABÜDONGBA khyang kangmübü trüp mübücho ko kanglungrü khürü lümkhata kangmübü jücho.

⁶Mosanü kanglungrü shüh tsü changsho khyo mütpah-tbhü la yohcho ko changsho-o tsü bholu chah tungkehjücho.

⁷Hütsüpü Azengtacho yuzeng vakha tsü khyo müyurü te athsengnü khicho. Arühnü yocho, “Ihrünü ABÜDONGBA yocho nyinung ko Abinü mülacho lüpcho nguchinung.”

⁸Hütsüpü Mosanü mütpah-tbhü la ashüh tsü khyo müyurü chah xahkehjücho. Abinü yocho, “ABÜDONGBAnü nührü te azengchota külüpba tsü hiba ashüh hinü shingtire.”

⁹Mosa, Aron, Nadab, Abihu ko Israel zirü arüh nyühre tsü azonglang küducho

¹⁰ko arühnü Israel Tsingrang tsü ngucho. Ajing pohki safir lung khengba tsü ning kyo apuleh licho.

¹¹Tsingrangbanü hiri Israel langnürüti müthsakehjücho; arühnü Tsingrangba ngucho ko arühnü müjang tsuyongcho.

¹²ABÜDONGBAnü Mosa te yocho, “Azonglang Ih yang kürung ko nüh hila lide, Ihnü nü khyang müyurü te thülanung yuzeng apüm thrahcho lungtpah anyüh jünung.”

¹³Mosa ko abi trorü Joshua nyüh rungnümcho ko Mosanü Amüsa zong chah tsü küdunung dikehcho.

¹⁴Mosanü azirüti te yocho, “Ihrü müthalide nührü hila ying. Hila nührü yola Aron e Hur nyüh lile; hütsüeko khiyu chürokhang anyüh yang wüng.”

¹⁵Mosa Sinai khang chah tuwücho ko nyükhinü shütipehcho.

¹⁶Azongchah tsü ABÜDONGBA ahechi jürocho. Israelrü nahte atsingse tsü azong chah michang truyacho kyo ngucho.

¹⁷Nyükhinü azong tsü nyümong dhüroh shüticho ko dhünyeh nyümong nyükhi la tsünü ABÜDONGBAnü Mosa dsicho.

¹⁸Mosanü azong lang tsü nyükhi yang wücho. Abi hütsüla nyümong yüre romang yüre licho.