Read Sangtam Naga NÜCHEHCHO 25 Bible Online

NÜCHEHCHO 25 - Sangtam Naga bible

NÜCHEHCHO 25

¹ABÜDONGBAnü Mosa te yocho,

²Israelrü te I khyang amübü jünung young. Nyitsarü müipinü tu jünyüro hütsü khyüchoung.

³Hiri amübü tsü: hon, taripi ko imüyeng;

⁴shü anana, apuleh, anyahrüm ko anbühshü amoh; miza nbühnü kyahcho shü,

⁵mizapung nbüh amoh la chongcho; shuküp atsa; akacia sing;

⁶dsi nengdang dsikih; amüyühnung axümlichi kehba müchiji;

⁷Amungthriba Bebü jengki la yohnung ko Drengkhüm yohnung Karnelian ko thsidi lung.

⁸Ih arüh yola linung nengdang müyurünü I khyang Amüsa Shükuh khüdu thsabae.

⁹Hiba Shükuh ko hütsüla sehyahba tsü Ihnü ngusohcho roh-i du yohng.

¹⁰“Singdi khüdu akacia singnü ashenglang kyaa 4, adilang kyaa 2 ko athsenglang kyaa 2 külüpm.

¹¹Hon amüthsengnü ayonglang ko amilang müshütieng ko mükangmüla abe khüm.

¹²Hon-nü khehyümsing müyü ajing müyü müipi anyüding imüshi anyüh-nyüh hamkehng.

¹³Akacia singnü akhau külüpm ko hon-nü hütsüri müyühtieng

¹⁴ko singdi anang anyüding lang imüshi la tsünü khakhu tohyohchüng.

¹⁵Ko akhau tsü imüshi la tsü tohyohchüng ko tükhyücheh.

¹⁶Ihnü nü khyang jünung liba lungtpah anyüh khüila yuzengti thrah liro, hütsü singdi la tsü yohng.

¹⁷“Hon amüthsengnü ahüptising khüdu ashenglang kyaa 4 ko adilang kyaa 2 külüpm.

¹⁸Ko ahüptising anyüding lang achangka la tsü cherubim anyüh athsingcho hon-nü külüpm.

¹⁹Achang anyüding lang khüdu-khüdu ko ahüptising te tsü afü khüdu thsanung thsa külüpm.

²⁰Cherubim aqo kehba anyüh tsü aqo kinü singdi ahüpti tsü kitisohng. Cherubim anyüh tsü ahüptising khu abe pitasohng.

²¹Singdi la tsü lungtpah anyüh tsü yohng ko chingtieng.

²²Hütsüla ahüpti michah, yuzeng singdi tsü cherubim anyüh kahla tsünü Ihnü nüh shirünung ko Israelrü khyang yuzeng jünung.”

²³“Tsingthsang khüdu akacia singnü ashenglang kyaa 3 adilang kyaa 1½ ko athsenglang kyaa 2 külüpm.

²⁴Hon amüthsengnü hütsü müshütieng ko hon-nü abe khüm.

²⁵Fühbhi khüdu adilang kuthrung asang külüpm ko hütsü mükang hon-nü abe khüm.

²⁶Hon-nü khehyümsing müyü külüpm ko ajing changka müyü la tsü yohng.

²⁷Tsingthsang akhau yohba amüshi tsü amükang shündhün yohng.

²⁸Akacia singnü akhau tsü adhising külüpm ko hon-nü münohtieng.

²⁹Yongkha amübü jünung nengdang tbhü, shing, füh ko mütpah-tbhü külüpm. Hiri apüm hon amüthsengnü külüpm.

³⁰Tsingthsang tsü yuzeng singdi bete yohpünung ko tsingthsang chah tsü lede I khyang mübücho Amüsa hümthse kehnungbae.

³¹“Dsimüdongsing khüdu hon amüthsengnü külüpm. Amüdongsing ko adong tsü hon-nü keng; yungpi asehyahcho mülongchicho ko ava arüh khüdu du thsasohng.

³²Ajengza khüulang asang khüulang asang chürosohng.

³³Ajengza dhüroh müipi chah almond yungpi mülongchicho ko api müshüh kyo sehyahcho yungpi asang-sang yohng.

³⁴Dsimüdongsing chah tsü almond yungpi amülongchicho api müshüh kyo sehyahcho yungpi müyü sehyahng.

³⁵Ajengza anyüh müipi pohki amülongchicho khüdu yohng.

³⁶Amülongchicho, ajengzati ko dsimüdongsing tsü khüdu kang hon amüthsengnü hamchehng.

³⁷Dsimüdongsing nengdang tsü dsi dhünyeh külüpm ko belang thring tsü vinungthsa arüh müdong.

³⁸Dsi tahkehsing she ko tbhü tsü hon amüthsengnü külüpm.

³⁹Dsimüdongsing ko apa thsütah tsü hon amüthseng süreh sangrepü münga khyo külüpm.

⁴⁰Hütsüri Ihnü nührü te azong chah ngusohcho roh-i müzah külüpm.