Read Sangtam Naga NÜCHEHCHO 26 Bible Online

NÜCHEHCHO 26 - Sangtam Naga bible

NÜCHEHCHO 26

¹“Amüsa Shükuh ayonglang tsü akitising shü anana dhüre, apuleh, anyahrüm ko shunbüh shü amohnü kyahcho yohng. Hütsüri la cherubim xüyohng.

²Akung müipi adi-asheng sako du thsasohng, ashenglang khehap mükyüpü keh ko adilang khehap müyü.

³Kung münga tsü khüdu kang xürütaang ko anyingcho münga tsüsü hütsü roh-i xüng.

⁴anyüding la amilang abemong la tsü apulehnü khüm.

⁵Akhudiba kung la ayo rüyohnung akhi dhünyang ko akhüu kungkha la tsüsü akyota akhi dhünyang külüpm.

⁶Ko kung anyüh tsü khüdu kangsohnung shulüm hon-nü koyeh dhünyang külüpm.

⁷“Shükuh lüptinung miza nbühnü külüpcho shü kung dhüre-kheh külüpm.

⁸Apüm tsü akihchocho ashenglang khehap sangre ko adilang khehap müyü sako du thsasohng.

⁹Arüh kung münga khüdu kang xürütaang ko apa dhüroh tsü kung khüdu kang xürütaang. Ko Shükuh belang thring tsü shü adhüroh-uba tsü nüpkehchüng.

¹⁰Akung khüdu la abemong la tsü akhi dhünyang ko akhüu kung la tsünü akhi dhünyang vieng.

¹¹Imüyengnü koyeh dhünyang külüpm ko kung anyüh tsü khüdu du kangsohnung ayo rüyohji la tsü koyeh tsü yohng.

¹²Ko anyingcho achangsho tsü Shükuh akhanglang kichahchüng.

¹³Ashenglang anyingcho khehap khüdu tsü Shükuh khüu-khüulang lüptinung.

¹⁴“Alüptising apa anyüh, amichah lüptinung shulüm mizapung küp amoh la chongcho ko apa tsü shuküp atsa mii külüpm.

¹⁵“Shükuh singtpah akacia singnü külüpm.

¹⁶Atrüp singtpah müipi tsü ashenglang khehap dhüre ko adilang khehap khüdupü achangsho,

¹⁷ko anyüh müchikehtanung külüpm. Shükuh tsü hiroh-i du külüpm.

¹⁸kihjing lahpi shulüm singtpah mükyü

¹⁹ko hütsüri singtpah müipi müdongkehnung taripinü akhengji yüre külüpm.

²⁰Shükuh kihku lahpi shulüm singtpah mükyü külüpm

²¹ko taripinü akhengji yüre, singtpah khüdu nengdang akhengji anyüh-nyüh külüpm.

²²Nyüzüdu lahpi Shükuh akhanglang nengdang singtpah dhüroh külüpm,

²³ko ajongnah shulüm singtpah anyüh.

²⁴Hiri ajongnah singtpahti tsü akhengdi chah müchikehtanung ko amungthriba chah lahkehsohnung.

²⁵Adelü singtpah keh taripinü külüpcho dhüre-dhüroh, singtpah müipi anyüh-nyüh.

²⁶“Akacia singnü azihsing dhüre-münga külüpm, Shükuh la khüu langthring nengdang münga,

²⁷ko akhüu lang nengdang münga ko akhanglang nyüzüdu lahpi singtpah münga.

²⁸Alongla azihsing tsü, singtpah lanü awüm küdupü, Shükuh achangka khüdu lanü khüdu chihsohng.

²⁹Singtpah tsü hon-nü münohng ko azihsing tsü hohyehnung shulüm hon amüshi la tsü yohng ko hütsüsü hon-nü münohtieng.

³⁰Ihnü azong chah nührü te ngusohcho kyo Shükuh tsü thsaang.

³¹“Akitising khüdu shü anana, apuleh, anyahrüm ko shunbüh shü amoh zeh külüpm. Ko hütsüla cherubim yah xüyohng.

³²Hütsü hon-nü münohcho akacia sing kuhbi müyü taripi münohcho adong müyü la ahohyehsingnü hohyeh kipüng.

³³Shükuh yonglang tsü ahohyehsing chungcho la tsü akitising tsü yohng. Ko akitising khanglang tsü yuzeng singdi tsü yohpüng. Akitising tsünü Amüsa müdüm lanü Amüsauba Müdüm chongsahng.

³⁴Yuzeng singdi tsü haptieng.

³⁵Amüsaba müdüm dongkhu kihku langthring tsingthsang tsü müdong ko kihku langthring Dsimüdongsing tsü müdong.

³⁶“Ko Shükuh trahtri nengdang akitising tsü shü anana, apuleh, anyahrüm ko shunbüh amohnü sehyah xüyohng.

³⁷Hiba akitising nengdang, hon-nü münohcho ko hon-nü külüpcho ahohyehji chah ngakeh akacia singnü külüpm. Ko hiri kuhbi nengdang imüyengnü amüdongsing münga külüpm.