Read Sangtam Naga NÜCHEHCHO 28 Bible Online

NÜCHEHCHO 28 - Sangtam Naga bible

NÜCHEHCHO 28

¹“Nümung Aron ko atsurüti, Nadab, Abihu, Eleazar ko Ithamar dsibülung. Ko arühnü bebürü kang Ih dikehnungthsa müyurü tenü khasah zasohng.

²Nümung Aron, pathsa ahechi ko atsah tsasohnung shulüm bebürü jengki külüpjüng.

³Ihnü lümlong jüba sihthrirü atümung dsibülung ko I dikehbala pathsa müsacheh khakhuchüjünung shulüm Aron jengki xünung young.

⁴Arüh te jengki hiri xünung young. Drengkhüm, ariri jengki, khümri, ayahxüyohcho fükhüm, kuthri ko shüra khüdu. Nümung Aron bebürü kang ko atsurütinü Ih dikehnungthsa arüh khyang bebürü jengki külüpjüng.

⁵Hiri xünung arühnü apuleh, anyahrüm, shunbüh shü amoh ko shü anana xüng.

⁶“Arühnü ariri jengki tsü apuleh, anyahrüm, shunbüh shü amoh, shü anana, hon shenü sehyah xüsohng.

⁷Drengdrengsohnung achang anyüdinglang pünurü chah dongzihyo chingkehng.

⁸Ariri jengki chah tsü akyahcho rungrüm khüdu kehsohng.

⁹Karnelian lung anyüh chah Jakob tsurü dhüre-anyüh neng tsü,

¹⁰asurocho azitungnü khüdu la dhüroh ko khüdu la dhüroh thrahyohng.

¹¹Thsidi lung külüprü khüdu khyang lungtpah anyüh la tsü Jakob tsurüti neng tsü thrahpü hon-nü külüpcho la tsü müdongsohng.

¹²Israel hung dhüre-anyüh amüdhethsa ariri jengki dongzihyo la tsü yohng. Ih, ABÜDONGBAnü I müyurü lede münbüchünung nengdang, Aron-nü arüh neng tsü abi pünurü chah dhisohng.

¹³Hon-nü amüdongkehsing anyüh külüpm

¹⁴ko hon amüthsengnü ixilih chehcho anyüh külüp hütsü chah chingkehsohng.

¹⁵“Yukhade khyünung amungthriba Bebüba khyang drengkhüm khüdu külüpm. Hütsü ariri jengki xüba kohro ko axüyohba akyokyonü külüpm.

¹⁶Hütsü müthung mübhi sako ko anyüpili nüpnung, ashenglang kuthrung 9 ko adilang kuthrung 9 thsaang.

¹⁷Hütsü michah thsidi lung chung müyü xükehng; akhudiba chung la ruby, topaz ko jarnet;

¹⁸anyüuba chung emerald, safire ko diamond;

¹⁹asangu chungla turquoise, agate ko amethyst;

²⁰ko chung müyüu la, beryl, carnelian ko Jasper lungti thsaang. Hiri tsü hon-nü müdongkehsohnung.

²¹Hiri lung dhüre-anyüh müipi chah tsü Israelrü hung amüdhethsa Jakob tsurüti neng thrahkehng.

²²Drengkhüm nengdang tsü hon amüthsengnü ixilih khüdu chehpü külüpm.

²³Drengkhüm achehlang jongnah chah rakehnung hon imüshi anyüh külüpm,

²⁴ko hon ayo anyüh tsünü imüshi anyüh chah tsü chingkehng.

²⁵Ko apa ayo anyüh tsünü apa chah chingkehng ko ariri jengki dongzihyo belangthring chingkehng.

²⁶Hütsüpü hon imüshi anyüh külüpm ko ariri jengki chah tsü thahpo drengkhüm ayonglang tsü chingkehng.

²⁷Adesü hon imüshi külüpnü ariri jengki dongzihyo belang rungrüm shündhün apohki tsü chingkehng.

²⁸Drengkhüm tsü rungrüm michah ngakeh müshüshüpnungthsa drengkhüm imüshi tsü ariri jengki imüshi chah tsü chingkehng.

²⁹“Khode Aron Amüsa müdüm la züdunang, Ih, ABÜDONGBAnü, I müyurü lümkehnung shulüm, abinü Israel hung neng thrahcho drengkhüm tsü lahnung.

³⁰Aron-nü I yanglang rode hütsü hinung shulüm, drengkhüm la tsü Urim ko Thummim tsü yohng. Hütsü lede Israelrü nengdang I lümcho tsitsanung abinü hiba drengkhüm tsü yohng.

³¹“Ariri jengki michah khyüba bongri-pümkhüm tsü apüm shunbüh shü apulehnü xünungbae.

³²Hütsü athah nengdang akhi tpehsohng ko hütsü mürohrüpsohnung shulüm anyüpili nüpnü abemong tsü khüm.

³³Fükhüm ajinglang abemong mükangmüla tsanümsih yahthri apuleh anyahrüm amohmüru ko hon-nü mülihta drengdreng külüpm.

³⁵Aron-nü hiba jengki hi abi bebü nguchi nguchide khyünung. Khode abi Amüsa müdüm la ronang ko pehjonang, tringtring yuva tsü yuchinung ko abi mümüpsehnung.

³⁶“Hon amüthsengnü lah khüdu külüpm ko hütsü chah tsü hita thrahkehng ‘ABÜDONGBA khyang müsachehcho’.

³⁷Ko hütsü kuthri bete tsü ayo apulehnü chingkehng.

³⁸Ko hütsü Aron-nü akikhang chah müthsühkeh, hütsü khu Israelrünü amünyi shitpahnye, hiba amübü jücho la Ih, ABÜDONGBAnü khyüchonung.

³⁹“Aron fükhüm ko kuthri shü anananü adesü shüra khüdu ayah xüyohnü külüpm.

⁴⁰“Ko Aron tsurüti nengdangsü jengreng ko tsah tsasohnung fükhüm, shüra ko kuthri rungnümjüng.

⁴¹Hiri jengki tsü nü mung Aron ko atsurüti khyang khyüsohng. Hütsüpü arühnü bebürü kang Ih dikehnung shulüm pathsa khacheh olive tujinü müyühjo müsachehjüng.

⁴²Arüh fü mümishanung shulüm arüh khyang kihrüm lanü mükhoh chii phümthri xüjüng.

⁴³Aron ko atsurütinü arüh mümüpsehsohnung shulüm Shükuh la rode ko bholu te dikehde lede hiba jengki hi khyüng. Hi lede nengdang Aron ko abi trah shulüm yuzeng linung.