Read Sangtam Naga NÜCHEHCHO 29 Bible Online

NÜCHEHCHO 29 - Sangtam Naga bible

NÜCHEHCHO 29

¹“Aron ko atsurüti I dikehba la bebürü nguchi nengdang müsachehde nührünü hita nguching. Lapha mükeh misüpung aza khüdu ko sanpung anyüh khyüng.

²Litoh hüm atsauba bichieng, ta bhüpzalü tübichi ko hümthse khürü tuji la ko khürü tuji müzehpü ko khürü olive tuji yohpü tangnü külüpm.

³Nührünü misüpung ko sanpung anyüh I khyang kangmübü jüde hütsüri tsü loh la yohpü I khyang mübüng.

⁴“Aron ko atsurüti Shükuh trahtri yang norung ko arüh tsü ayah mütsah mütsahsohng.

⁵Hütsüpü Aron khyang bebürü jengki fükhüm, ariri jengki, khümri, drengkhüm ko rungrüm khyüsohng.

⁶Abi chah kuthri tsü yohjüng ko ‘ABÜDONGBA khyang müsachehcho’ pü thrahba tsü müthsükehjüng.

⁷Hütsüpü tuji khyo abi thah chah tungkehjo müyühjüng.

⁸“Atsurüti norung ko fükhüm tsü khümsohng;

⁹arüh kihrüm shürasohng ko arüh thah la kuthri thrijüng. Hütsüta nührünü Aron ko atsurüti müsachehng. Arüh ko arüh shümtsurütinü bebürü kang lede Ih dikehnung.

¹⁰“Shükuh bete misüpung tsü norung ko athahchah Aron ko atsurüti khehnü thahpüsohng.

¹¹Shükuh trahtri la tsü ABÜDONGBA bete misüpung tsü kyüsehng.

¹²Misüpung shüh tsü khyonü müyungzanü bholu jüh chah tsü müyühng. Ko anyingcho ashüh tsünü ajinglang tsü tungzieng.

¹³Hütsüpü, bohnying müshüba asu apüm, amüsi atsauba, akhüling anyüh ko amüshüh hütsüri tsü khyo I khyang amübü roh-i bholu chah tsü trüpm,

¹⁴ta misüpung ashutsa, aküp ko axü tsülü dongkhu tahng. Hi bebürü münyi hitsiba mübü lile.

¹⁵“Sanpung khüdu khyüng ko Aron e atsurü khyang athahchah arüh khehnü thahpüsohng.

¹⁶Kyüsehng, ko ashüh tsü khyo bholu müyüding lang tungkehjüng.

¹⁷Sanpung tsü zangzang khanahng; abohnying ko ajing tsü thsüthong, ko athah ko apa shuh michah yohng.

¹⁸Ko üpümshünü bholu chah tsü tsang mübü roh-i trüp mübüng. Hiba amübü axümlichi tsünü Ih künyangsohre.

¹⁹“Ko müsachehba la bichiba, Sanpung akhüuba tsü hirung ko Aron e atsurüti khehnü athahchah thahpüsohng.

²⁰Hütsü kyüsehng, ko ashüh khürü khyo Aron e atsurüti tsalang nangku khi la, tsalang kheh müyungkutrehdi ko arüh tsalang jing müyungkutrehdi la tungkehsohng ko anyingcho shüh tsü bholu jongnah müyü apümlang tungkehjüng.

²¹Ko bholu chah tsünü khürü ko tuji aza khyo Aron ko atsurüti chah ko arüh jengki chah xahkehjüng. Hütsüta abi, atsurüti ko arüh jengki tsü I khyang müsachehre.

²²“Sanpung asu, amüying asu; abohnying müshüba, amüsi atsauba, akhüling anyüh amüshüh zehpü, ko tsalang aphüm khyüchehng.

²³I khyang mübücho hümthse loh la tsünü; ahung müipi lanü hümthse khüdu-khüdu khyüchehng: tuji müyohcho khüdu ko tuji yoh külüpcho khüdu ko tsangnü külüpcho khüdu.

²⁴Hiri apüm Aron ko atsurüti khehla yohjüng ko hütsü pathsa jiyü khüdu roh-i I khyang müsacheh jüng.

²⁵Hütsüpü arüh kheh lanü hütsü khyüng ko I khyang tsang mübü roh-i atahba michah bholu chah tsü trüpm. Hiba amübü axümlichi tsünü Ih künyangsohre.

²⁶“Sanpung akhüu tsü khyüng ko I khyang pathsa mübüng. Hiba shudsi hi nührü yo thsanung.

²⁷“Khode bebürü khüdu khachehthronang, müsachehba la bichiba sanpung akhuh ko ajing tsü pathsa I khyang müsacheh bebürü nengdang yohpüjüng.

²⁸Khode I müyurütinü lümkhata mübü jonang, akhuh ko ajing tsü bebürüti nohlüm-e ko hi mümülichi yuzeng lile. Hi Ih ABÜDONGBA khyang müyurü jiyü lile.

²⁹“Aron bebürü jengki tsü khode abi sonang, abi tsurüti khachehthropü khyünungthsa arüh khyang jüng.

³⁰Aron tsurü yola sünü abi bebü mülihnang ko sü Amüsa müdüm la dikehnung Shükuh la züdunang, hiri jengki abinü nyümong dhünyeh khyünung athsalang.

³¹“Aron ko atsurüti khachehthroba la khyüba sanpung shuh tsü khyüng ko Amüsa müdüm la tsü chong.

³²Shükuh la züduba trahtri la tsü loh la nying liba hümthse te tsü tsusohng.

³³Arühnü arüh khachehthroba ayah mülang pehjüba la khyüba shuh tsü tsubae. Hiba tsuyongba hi bebürü dunü tsunung, tunüo hi Amüsa lile.

³⁴Shuh mahkhang hümthse khürü nyangnyü khüu chii mütsukhangkhang, hütsü trüp-pehng: hütsü amütsubae, tunüo hi Amüsa lile.

³⁵“Aron ko atsurüti khachehthroba nguchi Ihnü nührü te mülacho kyo nyümong dhünyeh khyüng.

³⁶Amünyi pehnungthsa nyümong müipi misüpung khüdu kangmübü jüng. Hinü bholu tsü müsachehnung. Hütsüpü hütsü müsasohnung olive tujinü müyühjüng.

³⁷Hiroh-i mütozah nyümong dhünyeh nguching. Hütsükolü bholu tsü khüdupinü müsapehnung, ko sünü ko tunü hütsü thahpünang, abi amüsa ziinü abi lerohpehjünung.

³⁸“Aronung shikhe ayung la nyümong mükhu, kang khüdu za sanza anyüh bholu chah kangmübü jüng.

³⁹Sanza tsü anyangnyü khüdu ko anyüzehlang khüdu kangmübü jüng.

⁴⁰Akhudiba sanza te litoh hüm atsa süreh khüdu la olive tuji amüthseng liter khüdu yohrütang ko yongkha liter khüdunü tungkeh mübüng.

⁴¹Anyüuba sanza tsü anyüzehlang kangmübü jüng ko hüm, olive tuji ko yongkha anyangnyü jücho doinü mübüng. Hi Ih, ABÜDONGBA khyang tsang amübü lile, ko hütsü axümlichi tsünü Ih künyangsohre.

⁴²Aronung shikhe ayung la, hiba trüp mübüba hi I jingte Shükuh la züduba trahtri la mübüng. Hütsüla Ihnü I müyurü shirünung ko nührü te chotanung.

⁴³Hütsüla Ihnü Israelrü shirünung ko I ahechinü hütsü müdüm tsü Müsa kangnung.

⁴⁴Ihnü Shükuh ko bholu Müsa kangsohnung, ko Aron ko atsurüti bebürü kang Ih dikehsohnung pathsa throchehnung.

⁴⁵Ih Israelrü yola linung ko Ih arüh Tsingrang kangnung.

⁴⁶Arühnü Ih tsü ABÜDONGBA arüh Tsingrang sünü arüh Ijip lanü nüchehcho, hütsünü arüh yola Ih linung kohnungepü müdhenung. Ih ABÜDONGBA arüh Tsingrang.