Read Sangtam Naga NÜCHEHCHO 30 Bible Online

NÜCHEHCHO 30 - Sangtam Naga bible

NÜCHEHCHO 30

¹“Bholu khüdu müchiji tahnung akacia singnü külüpm.

²Hütsü ashenglang kyaa 1½ ko adilang kyaa 1½ ko athsenglang kyaa 3 khyüng. Müyüding lang adhengnung tsü khüdu kyo thsaang.

³Amilang müyüdinglang ko adhengkehlang tsü hon amüthsengnü khyütieng, ko abemong tsü hon amüthsengnü khyütieng ko abemong tsü hon-nü mükangmüla yohng.

⁴Abemong anyüding lang pohki tsü adhinung akhau külüpm.

⁵Hiri akhau tsüsü akacia singnü külüpm ko hon-nü münohtieng.

⁶Hütsüpü hiba bholu tsü Yuzeng singdi bete kipüba mihlang tsü yohpüng. Hütsüla Ihnü nührü shirünung.

⁷Nyangnyü mükhu khode Aron ro dsi tsü rungnümnang, abinü müchiji axümlichi hütsü chah tsü tahnung.

⁸Abinü anyüzehlang dsi tahkehdesü hütsü roh-i du thsanung. Hiba müchiji tahba hi aronung shang apüm la mütozah bichinung.

⁹Hiba bholu chah amümülacho müchiji, kanglungrü mübü mahkhang fürü amübü tusü tümübü ko hütsü michah yongkha amübü tu tütungkehjü.

¹⁰Kang la khüdupi Aron-nü münyi nengdang kangmübü jücho kanglungrü shüh khyo hütsü müyüdinglang müyühjo bholu tsü ayah müsa müsachehng. Hiba hi aronung shang apüm la bichieng. Hiba bholu hi Ih ABÜDONGBA khyang müsacheh khakhuchüjüng.”

¹¹ABÜDONGBAnü Mosa te yocho,

¹²“Nühnü khode Israelrü mono khidhengnang, hütsü khidhengba shikhe asüba tunüsü müchihnung shulüm nyitsarü müipinü apu akang nengdang I khyang angang jüng.

¹³Mono khicho la zehrü müipinü achingcho ahochocho shekel achangsho jüng. Nyitsarü müipi I khyang hi amübü khüdu roh-i jüng.

¹⁴Mono khiba la khiyohrü atümung, hütsü kang mükyü ko amilang, arühnü hiba thsi hi I khyang jüng.

¹⁵Palu akang nengdang angang hi jüde linye alaa müjünung ko iilümnye müchi müjünung.

¹⁶Thsi hi Israelrü chahnü dhrieng ko Shükuh thsütah la bichieng. Hiba hi arüh akang nengdang amüthsüh linung ko Ihnü arüh tsungtinung münbüchünung.”

¹⁷ABÜDONGBAnü Mosa te yocho,

¹⁸“Mütpah-tbhü khüdu imüyengnü amüdongsing keh külüpm. Ko hütsü Shükuh e bholu nyüh kahla müdong, ko hütsüla kih tungyohng.

¹⁹Aron ko atsurütinü shükuh lang mübünung müwüde;

²⁰arüh jingkhehrü thsüthong. Hütsükhang arüh müsüsohnung.

²¹Arüh müsünung shulüm arühnü arüh jingkhehrü mütsahng. Hiba yuzeng hi arüh ko arüh shümtsurüti nü lede yohpünung.”

²²ABÜDONGBAnü Mosa te yocho,

²³“Axümlichi yola atsauba axümlichi kih süreh dhüroh, shingsheng, axümlichi süreh asang, axümlichi rüh süreh asang,

²⁴ko Kassia süreh dhüroh (apüm akihchocho). Olive tuji liter müyü,

²⁵ko axümlichi yohnü amüyühba Amüsa tuji külüpm.

²⁶Ko hütsünü Shükuh, yuzeng singdi,

²⁷tsingthsang ko shingtbhürü, dsimüdongsing ko thsütahti, müchiji tahji,

²⁸kangmübü tahji ko apa thsütahti ko mütpah-tbhü amüdongji zeh khyüng.

²⁹Kohro hiri hiroh-i müsachehng ko arüh khüdupinü Müsa linung, ko hütsü chah sünü ko tunü thahpünang abi Amüsaba tsünü thsakehjünung.

³⁰Hütsüpü Aron ko atsurüti I dikehba la bebürü nguchinung müyühjo khachehthroung.

³¹Ko Israelrü te young, ‘Hiba Amüsa müyühjüba tuji hi aronung shang apüm la I dikehba la bichieng.

³²Hütsü ashusha nyitsarü chah tungkehnung mükoh, ko hi iithsanung tübichi. Hi Amüsa ko nührünü hi Amüsa kyo bichieng.

³³Sünü hi kyo külüpnang mahkhang bebürü müthsaba khürü chah hi bichikhang, abilü I nyitsarü khüdu kyo mükhichinung!’ ”

³⁴ABÜDONGBAnü Mosa te yocho, “Axümlichi müipi lanü akihchocho khyüchehng; Stakte, Onika, Galbanum ko müchiji amüthseng.

³⁵Hiri yohrütanü müchiji külüpm. Müthseng ko müsasohnung mih yohrütang.

³⁶Changsho asongsong kang dong, ko hütsü Shükuh la hiwü Yuzeng Singdi bete xahng. Hiba müchiji hi khüdupinü Müsa bichieng.

³⁷Nührübürü nengdang axümlichi külüpde hi külüpba iithsa tükülüp. Ko hütsü I khyang müsachehjücho Amüsa kohro kyo bichieng.

³⁸Khürünü abürü shulüm axümlichi hütsü kyo külüpkhang, abilü I müyurü khüdu roh-i Ihnü mükhichinung.”