Read Sangtam Naga NÜCHEHCHO 31 Bible Online

NÜCHEHCHO 31 - Sangtam Naga bible

NÜCHEHCHO 31

¹ABÜDONGBAnü Mosa te yocho,

²“Ihnü Juda hung lanü Hur shümtsurü ko Uri tsurü Bezalel throchehko

³ko I ziinü abi jengjüko. Ihnü abi khyang lümlong thoh ko yahthri nguchi-nguyang apüm

⁴sihthsa tühnung ko hütsüri hon, taripi ko imüyengnü külüpnung;

⁵ko chungkehnung thsidi lung hamnahnung; singyah thrinung ko apa yahthri nguchi lüpcho nengdang lümlong jüko.

⁶Dan hung lanüsü, abi yola nguchisohnung Ahisamak tsurü Oholiab throchehko. Ihnü mülacho apüm nguchichehsohnung nengdang aparü khehsehthsarü khyangsü Ihnü akohnung lümlong jüko:

⁷Ih liba Shükuh, Yuzeng Singdi ko hütsü hüpji, Shükuh la liba kohro apüm,

⁸tsingthsang ko shingtbhürü, hon amüthseng dsimüdongsing ko hütsü te thsütahti, müchiji tahnung bholu,

⁹kangmübü tahba ko shingtbhürü, mütpah-tbhü ko amüdongji,

¹⁰Aron ko atsurüti bebürü thsa dikehde khyünung ariri jengki,

¹¹amüyühnung tuji, ko Amüsa Müdüm nengdang axümlichi müchiji. Hiri apüm külüpde, Ihnü nü te mülacho kyo arüh khyang nguchisohng.”

¹²ABÜDONGBAnü Mosa te yocho,

¹³Israelrü te young, “Ih kyahshang nyümong, Sabath nyümong mung, tunüo, ABÜDONGBAnü nührü I müyurü thsanung throchehchoepü aronung shang apüm la hi amüdhethsa linung.

¹⁴Nührünü Sabath nyümong mung, tunüo hi Amüsa lile. Sünü hütsü thsangnyangnang, ko hütsü nyümong nguchinang, abi süsohnung.

¹⁵Nührü nengdang nguchinung nyümong dhüroh lile, ta dhünyeh nyümong tsülü I khyang müsachehjo akyahshang nyümong lile. Sünü hütsü nyümong lango dusü nguchinang abi süsohnung.

¹⁶Israelrünü hiba nyümong hi azengtacho amüdhethsa yohpünungbae.

¹⁷Hi Israel ko I kahla lede nengdang amüdhethsa linung, tunüo, Ih ABÜDONGBAnü ninglih nyümong dhüroh thricho ko dhünyeh nyümong nguchi zahcho ko kyahshangcho.”

¹⁸Khode Tsingrangbanü Sinai khang chah Mosa te chotakacho abi khyang Tsingrangba Apunü thrahcho Yuzeng lungtpah anyüh jücho.