Read Sangtam Naga NÜCHEHCHO 33 Bible Online

NÜCHEHCHO 33 - Sangtam Naga bible

NÜCHEHCHO 33

¹ABÜDONGBAnü Mosa te yocho, “Nüh ko nühnü Ijip lanü nüchehrütinü hiba müdüm hi pehjüng ko Ihnü Abraham, Isak, Jakob ko arüh trah khyang jünung nyengchoba lih yang shemüsung.

²Nührü nyahnung Ihnü ninglang riwürü khüdu müthehnung ko Ihnü Kananrü, Amor-rü, Hit-rü, Perizrü, Hivrü ko Jebusrü iipehjünung.

³Nyikih ko thsakukih pohba lih lang wüng. Ta nührü yola Ihlü müronung, tunüo nührü ahongzi nyitsarü du ko lang la Ihnü nührü changjünung kohle.”

⁴Khode müyurünü hi yuchicho, arühnü longri tracho ko hütsütinü arühnü thsidi jengki mülahcho.

⁵Tunüo ABÜDONGBAnü Mosa te yocho, “Israelrü te young, ‘Nührü ahongzi nyitsarüti lile. Ih azachah dusü nührü yola wükhang, Ihnü nührü riri changjünung. Ade nührü thsidi jengki phungchehng ko nührü te tu nguchinung Ihnü dhrongchehnung.’ ”

⁶Hütsüta arühnü Sinai zong pehjüpü khanglanglü, Israelrünü thsidi jengki mükhyücho.

⁷Khodederü Israelrünü amüdongji müsunang, Mosanü Amüsa Shükuh tsü hiwünü hütsü tenü za thsacho. Hütsü te Shükuh pü dsicho ko sünü ABÜDONGBA te chotanyüro abinü hütsü yang wücho.

⁸Khodederü Mosa hütsüla chüdunang, müyurütinü Mosa hütsüla müzüdude palu trahtri lanü dheng yacho.

⁹Mosa züduko khanglang, nyükhi dongdi jüro Shükuh trahtri la tsü licho ko ABÜDONGBAnü Mosa te nyükhi la tsünü chotacho.

¹⁰Müyurünü nyükhi dongdi tsü trahtri yingte nguyeng, arühnü mükhukeh mübücho.

¹¹Nyitsarünü shangrü te chotacho kyo ABÜDONGBAnü Mosa te romih dhsükehta chotacho. Hütsüpü Mosanü amüdongji lang thalicho, ta abi te trotarü Nun tsurü Joshualü Shükuh la tsü licho.

¹²Mosanü ABÜDONGBA te yocho, “Nühnü hiri nyitsarü hütsüba lih yang nüngpü I te yoba tsü yuje, ta I yola sü rosohnung Nühnü müyo. Nühnü Ih dee tsa müdhele ko I chah longlangre ko yoko.

¹³Hütsütakhang, Ihnü Nüh dikeh mütozah Nüh künyangsohnung I te Nü lümchung young. Adesü hiba yucho hi Nüpu yo thsanung throchehcho Nühnü lümchehng.”

¹⁴ABÜDONGBAnü yocho, “Ih nührü yola wünung ko Ihnü nührü khyang akoh jünung.”

¹⁵Mosanü lalingcho, “Nüh ihrü yola mürokhang, ihrü hilanü tüshemüsusoh.

¹⁶Nüh ihrü yola mürokhang, Nü müyurü ko I te Nühnü künyangrepü khüta bürünü müdhenung? Nüh ihrü yola liba tsünü limih la ihrü tsü pathsaepü bürünü müdhenung.”

¹⁷ABÜDONGBAnü Mosa te yocho, “Nühnü yocho roh-i Ihnü nguchinung, tunüo Ihnü nüh dee tsa müdhele ko Ihnü nü chah longlangre.”

¹⁸Hütsüde Mosanü kihchicho, “I te Nü ahechi ngusohng”

¹⁹ABÜDONGBAnü lalingcho, “Ihnü I ahechi nü bete ngusohnung ko nü te Ih Amüsa neng müdhesohnung. Ih, ABÜDONGBA ko Ihnü throchehrü michah Ihnü amüi ko yanglilüm ngusohre.

²⁰Ihnü nü khyang I romih müngusohnung, tunüo sünüsü Ih ngupü akang linung mükoh,

²¹ta hila I müshüm lung hi michah nüh yanung kohle.

²²I ahechi lahkhu tside, Ihnü lung la tsü akhi khüdu la nüh yohpünung ko Ih mülahkhu tside I khehnü nüh yatinung.

²³Hütsüpü Ihnü I kheh khyükhunung ko nühnü I khangtung ngunung, ta I romilü müngunung.”