Read Sangtam Naga NÜCHEHCHO 34 Bible Online

NÜCHEHCHO 34 - Sangtam Naga bible

NÜCHEHCHO 34

¹ABÜDONGBAnü Mosa te yocho, “Akhudi jüba lungtpah kyo anyüh hamchehng ko nühnü lahrüpba lungtpah chah kehba yuti Ihnü hütsü michah thrahnung.

²Atunyang rungnüm ko Ih shirünung Sinai zong akhang chah tsü kürung.

³Nü yola süsü müküronung; azong la tsü süsü khüde mürachinung; ko azong jingdümpi la tsü miza mahkhang misü tusü yangtsu türachisoh.”

⁴Achotsü Mosanü lungtpah anyüh hamchehcho ko nyangnyü khüu tsü mütoh, ABÜDONGBAnü yocho kyo hütsü hipü Sinai azong chah tsü küducho.

⁵ABÜDONGBA nyükhi la jüro hütsüla abi te yacho ko ABÜDONGBA Amüsa neng müdhesohcho.

⁶Hütsüpü ABÜDONGBAnü abi bete lahkhucho ko züdecho, “Ih ABÜDONGBA, amüi ko yanglilümnü jeng, zah zii müchüroba, amüi amülah ko longlangchehba Tsingrang.

⁷Ihnü shang hajar adrong nengdang anyengchocho yohpüre ko amütsa ko amünyi mülang pehjüre; ta Ihnü tpurü münyi nengdang arüh tsurü ko shümtsurü shang müyü chii khingchinung.”

⁸Hütsüde Mosanü zah alih la hapkeh mübücho.

⁹Abinü yocho, “ABÜDONGBA, yuje Nühnü I chah longlangkhang, Nüh ihrü yola rung pü Ihnü Nü te kihchire. Nyitsarü hiri lasih amüküp lile, ta ihrü mütsa ko münyi mülang pehjüng ko ihrü Nüpu müyurü kang khyüchoung.”

¹⁰ABÜDONGBAnü Mosa te yocho, “Ihnü ade Israelrü te azengtaba khüdu külüpre. Ihnü limih la khüdesü ko tu yucholasü münguchidhengcho thsayahiya arüh bete nguchinung. Ih, ABÜDONGBAnü khütoh-i nguchinung liro hütsü nyitsarü atümungnü ngunung, tunüo Ihnü nührü nengdang adrünung khüdu nguchinung.

¹¹Ihnü chünye jüba yuzengti nührünü bichieng. Nührü wüde Ihnü Amor-rü, Kananrü, Hit-rü, Perizrü, Hivrü ko Jebusrü iipehjünung.

¹²Nührü mütrahrangba yucho te anyengchotaba tu tükülüp, tunüo hütsü nührü nengdang dhsürü kangnung.

¹³Hütsü mülih, arüh bholu mapnahjüng, arüh amüsa dongditi tphahtsujüng, ko tsingrang Ashera kyothri kyühnahpehjüng.

¹⁴“Apa tsingrang tu tümübü, tunüo Ih, ABÜDONGBA nahmoh Tsingrang lile.

¹⁵Bürü yucho te tu azengtaba tükülüp, tunüo khode arühnü arüh tsingrang mübonang ko kangmübü jonang, arühnü nührüsü dsiyohnung ko arüh tsingrang khyang mübüba tsuyongnungnü nührü thsatsünung.

¹⁶Nührü tsuzarünü arüh yangpilarü khingkurü khyünung ko arühnü arüh kyothri tsingrang mübüsoh I te yuje müchosohnung.

¹⁷“Idhsenü tsingrang tükülüp ko tümübü.

¹⁸“Bhüpza müyohba Hümthse thsüti bichieng. Ihnü mülacho kyo, Abib choo la nyümong dhünyeh bhüpza müyohcho tsung, tunüo hütsüba choo la nührünü Ijip pehjücho.

¹⁹“Aukhurü atümung ko kuh kanglungrü akhu mütrüba apung apüm I yo lile,

²⁰ta gadu akhu mütrübalü amülih sanza khüdu jüpü lihchehng. Nühnü hütsü mülihchehkhang, ahong xisahjüng. Tsuzarü aukhurü atümung lihchehng. “Amübü mübipü süsü Ih yang türo.”

²¹“Nyümong dhüroh nührü nguchi nguching, ta dhünyeh nyümong tsülü machide mahkhang maxade thsanye nührünü tünguchi.

²²“Nührü maxanung dikehde luh rahkeh thsüti tsü mung ko nührünü maxakhangpü zahkeh Thsüti tsü mung.

²³“Kang la asangpi, nührü adhrerü atümung Ih, ABÜDONGBA, Israel Tsingrang mübünung rung.

²⁴Ihnü nührü müngu yuchoti iipehpü nührü lih jasohpü khanglang, thsüti asang mung bekhyah sünüsü nührü yucho mahnung müdhrongnung.

²⁵“Nührünü I khyang kangmübü jüde bhüpza yohba hümthse amübü tüjü. Phungkhu Thsüti la khyücho kanglungrü shuh nyangnyü khüu yingcheh tüyohbü.

²⁶“Kang mükhu nührü chisicho lanü ayingsih ABÜDONGBA kuh lang hirung. “Sanza mahkhang mizaza atpa nyikih lanü tüchong.”

²⁷ABÜDONGBAnü Mosa te yocho, “Yu hiri thrahchoung, tunüo hiri yu chah jükehpü Ihnü nüh ko Israelrü te azengtaba külüpre.

²⁸Hütsüla Mosanü ABÜDONGBA te tu mütsumüyongpü nyümong yüre romang yüre licho. Ko abinü lungtpah chah tsü azengtaba yu, Yuzeng Dhüre tsü thrahcho.

²⁹“Khode Sinai zong lanü Yuzeng Dhüre tsü hipü Mosa jowücho, aromih chah ahechi kehcho, tunüo abi ABÜDONGBA te chotacho; ta apunülü hütsü mümüdhecho.

³⁰Aron ko nyitsarü atümungnü Mosa chah dhengkehcho ko aromih chah ahechi ngucho ko arühnü abi shündhün wünung drücho.

³¹Ta Mosanü arüh dsicho ko Aron ko yucho la azibarü atümung abi yanglang wücho ko Mosanü arüh te chotacho.

³²Hütsüpü khanglang Israelrü apüm abi mükang shibülungcho ko ABÜDONGBAnü abi khyang Sinai zong chahnü jüba Yuzengti tsü Mosanü arüh khyang jücho.

³³Mosanü arüh te chotakade, abinü shünü aromih müshüticho.

³⁴Khodederü Mosanü ABÜDONGBA Shükuh la chotanung wücho, abinü kumüshüba tsü lümthrucho. Khode abi chüronang, Israelrü te yonung mülacho apüm abinü arüh te yolicho,

³⁵ko arühnü abi romih chah ahechi ngucho. Hütsükolü abi thali ABÜDONGBA te chotanung müwüyingcheh aromih müshütipü licho.”