Read Sangtam Naga NÜCHEHCHO 35 Bible Online

NÜCHEHCHO 35 - Sangtam Naga bible

NÜCHEHCHO 35

¹Mosanü Israelrü atümung dsibülungpü arüh te yocho, “ABÜDONGBAnü nührü te hi nguchinung yore:

²Nührü nguchi nguchinung nyümong dhüroh lile, ta dhünyeh nyümong tsülü Ih, ABÜDONGBA khyang müsachehba akyahshang nyümong lile. Sünü hütsü nyümong lango dusü nguchinang, abilü süsohnung.

³Amünyümong nührü kuhla michang mii tüthsa.”

⁴Mosanü Israelrü atümung te yocho, “ABÜDONGBAnü hita yuzeng jüre:

⁵ABÜDONGBA khyang amübü khüdu jüng. Hütsüta nguchinyürü müipinü hon, taripi, mahkhang imüyeng;

⁶anana shü, apulu, anyahrüm ko shunbüh amoh shü; miza nbühnü külüpcho shü,

⁷sanpung küp amoh la chongcho; shuküp atsa; akacia sing;

⁸dsi nengdang michangkih; müyühjüba tuji nengdang axümlichi, axümlichi müchiji;

⁹karnelian ko Amungthriba Bebüba ariri jengki ko drengrüm la sehyahnung thsidi lung hiri amübü jüng.”

¹⁰“Nührü yola axangcheh anguchirü atümung rung ko ABÜDONGBAnü mülacho lüpcho nguching.

¹¹Shükuh, achongtiba ko amilang chongtiba, akoritaba ko akhümticho, alahtising ko dongdi ko akhengji;

¹²Yuzeng Singdi, adhising, ahüptising ko akitising;

¹³tsingthsang, adhising ko thsütah kohro lüpcho; mübücho hümthse;

¹⁴atsingse nengdang dsimüdongsing ko hütsüla thsütahti; michangkih zeh dsi;

¹⁵müchiji tahji bholu ko adhising; amüyühsing tuji, axümlichi müchiji; Shükuh trahtri kitising;

¹⁶amübü tahji bholu, imüyeng yejang ko hütsüla thsütahti; mütpah-tbhü ko ajing;

¹⁷kekhüm akitising ko dongditi ko müdongji, kekhüm trahtri kitising;

¹⁸Shükuh ko kekhüm nengdang ahamsing ko rangdüshü;

¹⁹ko bebürünü Amüsa müdüm la dikehnung züdude khyüba ariri jengki, Aron bebürü ko atsurüti khyang.”

²⁰Hütsüde Israelrü atümung shishocho,

²¹ko sürünü amüküp mübü jünyücho arühnü ABÜDONGBA khyang Shükuh nengdang amübü hirocho. Arühnü mübüba la thsütah apüm ko bebü jengki nengdangsü hirocho.

²²Ajünyürü, khingkurü adhrerü atümungnü shü mükaji, nangmüshi, imüshi, lah ko hon thsidilung adhangpi hirocho ko hütsüri ABÜDONGBA khyang müsachehjücho.

²³Anana shü, apulu, anyahrüm mahkhang shunbüh shü amoh; miza nbüh shü; sanpung küp amoh la chongcho; shuküp atsa sürü khehla licho arühnü hiri hirocho.

²⁴Sürünü taripi ko imüyeng jüchehcho arüh amübü ABÜDONGBA khyang hirocho ko Akacia sing lirü atümungnü thsütah nguchi nengdang hütsüri jücho.

²⁵Axangcheh khingkurütinü arühnü thsangyangcho shünana kyahba she ko she apulu, anyahrüm ko shunbüh she hiri jücho.

²⁶Arühnü miza nbühnüsü she külüpcho.

²⁷Azirütinü amüsa ariri jengki ko drengrüm la mükingkehnung karnelian ko apa thsidi lung,

²⁸ko axümlichi ko dsi nengdang michangkih ko axümlichi müchiji jücho.

²⁹Hütsüta Israelrünü amüküp mübü ABÜDONGBA nguchi nengdang abinü Mosa te mülacho roh-i hirojücho.

³⁰Mosanü Israelrü te yocho, “ABÜDONGBAnü Juda hung lanü Hur shümtsurü ko Uri tsurü Bezalel throchehko.

³¹Tsingrangba ziinü abi jengjücho ko abi khyang asithsa, akoh ko yahthri nguchi-nguyang nengdang anyicheh,

³²hon, taripi, ko imüyeng nguchi la asithsa jücho.

³³Thsidi lung hamcheh chungkehnung; singyah thrinung; ko yahthri nguchi-nguyang lüpcho nengdang lümlong jüko.

³⁴ABÜDONGBAnü abi ko Dan hung lanü Ahisamak tsurü Oholiab khyang aparü tesü hiba nguchi donung lümlong jüko.

³⁵Anyüh khyang atührü, athrirü ko shünana, apulu anyahrüm ko shunbüh amoh ko shü apa kyahrünü nguchiba adhangpi nguchichehnung lümlong jüko. Arühnü lüpcho nguchichehcho ko axangcheh athrirü licho.