Read Sangtam Naga NÜCHEHCHO 36 Bible Online

NÜCHEHCHO 36 - Sangtam Naga bible

NÜCHEHCHO 36

¹“Bezalel, Oholiab ko ABÜDONGBAnü lümlong jürü anguchirü atümung, Amüsa Shükuh thsanung lüpcho müdherü ABÜDONGBAnü yocho roh-i du tsü arühnü nguchibae.”

²Mosanü Bezalel, Oholiab ko ABÜDONGBAnü anguchinung lümlong jürüti ko atronyürüti atümung dsicho ko arüh te nguchi dikehnung yocho.

³Arühnü abi chahnü Amüsa Shükuh thsanung shulüm Israelrünü amübü khyübülungcho apüm khyüchocho. Ta nyangnyü mükhu Israelrünü Mosa yang arüh amübü hirojücho.

⁴Hütsüde axangcheh anguchirütinü wü Mosa te yocho,

⁵“ABÜDONGBAnü nguchinung yoba thsütah tenü alaa müyurütinü khyübülungle.”

⁶Achotsü Mosanü adelü Amüsa Shükuh nengdang amübü jüba zahnung müyurü te yuzeng jücho; hütsü tinü müyurünü müjücho.

⁷Khüdoi khyübülungcho hütsü nguchi nengdang kükyüpü alaa licho.

⁸Anguchirü yola alaa axangchehrütinü ABÜDONGBA Shükuh tsü thsacho. Arühnü hütsü ananashü, apulu, anyahrüm ko shunbüh amoh zeh akyahcho akung dhürenü külüpcho ko Cherubim yahthri xüyohcho.

⁹Akung atümung tsü ashenglang khehap mükyüpü keh ko adilang khehap müyü-yü licho.

¹⁰Arühnü kung münga-nganü xürüta kung adidi anyüh kang külüpcho.

¹¹Arühnü kung anyüding la amilang tsü apulunü abemong la arüyohji külüpcho.

¹²Arühnü akhudiba kung la tsü arüyohji dhünyang yohcho ko anyüuba kung la tsüsü akhüu tsü kyonü dhünyang yohcho.

¹³Arühnü hon-nü ahohyehsing dhünyang külüpcho ko akung anyüh tsü khüdu kang xürütacho.

¹⁴Hütsüpü arühnü Shükuh lüptinung shü kung dhüre-kheh miza nbühnü külüpcho.

¹⁵Arühnü apüm tsü ashenglang khehap sangre, ko adilang khehap müyü-yü külüpcho.

¹⁶Arühnü kung münganü kung khüdu ko kung dhüroh kang xürütacho.

¹⁷Arühnü khüdu bemong la arüyohji dhünyang ko akhüu bemong chah dhünyang xükehcho.

¹⁸Ko arühnü alüptising tsü khüdu du kangsohnung kung anyüh tsü imüyeng ahohyehsing dhünyang külüpcho.

¹⁹Arühnü amichah phatinung anyüh, khüdu sanpung küp amoh la chongpü ko khüdu shuküp atsa nü külüpcho.

²⁰Arühnü Shükuh nengdang akacia singnü müchongkhüti müdongcho.

²¹Singtpah müipi athsenglang khehap dhüre, ko adilang khehap khüdupü achangsho,

²²ko singtpah tsü khükhahsohnung mübhilangnü akhau anyüh yohcho.

²³Kihjing lahpi nengdang singtpah mükyü

²⁴ko singtpah khüdu pohki akhengsing anyüh-nyüh shulüm taripinü külüpcho atiyehji yüre yohcho.

²⁵Shükuh kihku lahpi nengdang singtpah mükyü külüpcho ko singtpah müipi pohki akhengsing anyüh-nyüh shulüm

²⁶taripinü külüpcho atiyehji yüre külüpcho.

²⁷Shükuh khanglang nyüzüdulang nengdang singtpah dhüroh

²⁸ko jongnahti shulüm singtpah anyüh külüpcho.

²⁹Hiri jongnah singtpahti tsü akhengji chahnü küdu amungthriba chii hamkehtacho. Singtpah anyünü jongnah anyüh chürosoh hütsü roh-i külüpcho.

³⁰Hütsüla singtpah khüdu pohki akhengji anyüh-nyüh shulüm singtpah keh ko taripinü külüpcho atikehji dhüre-dhüroh licho.

³¹Arühnü akacia singnü azihsing dhüre-münga külüpcho, Shükuh khüulang thring atrüp nengdang münga,

³²ko khüulang thring nengdang münga ko akhanglang thring nengdang münga.

³³Alongla zihtiba tsü Shükuh khüulangnü khüulang chii licho.

³⁴Arühnü singtpah tsü hon-nü münohcho ko azihsing ramehnung shulüm hon-nü imüshi külüpcho ko hütsürisü hon-nü münohcho.

³⁵Arühnü anana shünü akitising apulu, anyahrüm ko shunbüh shü amohnü kyahcho ko hütsü chah cherubim xüyohcho.

³⁶Arühnü Akacia singnü kuhbi müyü akitising romehnung hon-nü münohpü, ko hon-nü külüpcho koyehji yohcho. Hütsüpü kuhbi romehnung arühnü taripinü akhengji müyü külüpcho.

³⁷Shükuh trahtri nengdang shü anana, apulu, anyahrüm ko shunbüh shü amoh xüyoh sehyahpü akitising khüdu külüpcho.

³⁸Kuhbi bemi ko idong tsü hon-nü münohcho ko kuhbi nengdang imüyengnü akhengji münga külüpcho.