Read Sangtam Naga NÜCHEHCHO 37 Bible Online

NÜCHEHCHO 37 - Sangtam Naga bible

NÜCHEHCHO 37

¹Bezalelnü Amüsa Singdi tsü akacia singnü ashenglang kyaa 4, adilang kyaa 2 ko athsenglang kyaa 2 külüpcho.

²Abinü hütsü amichah ko ayonglang ko amükang apüm tsü hon-nü münohcho.

³Abinü hütsü dhinung shulüm hon-nü imüshi müyü chah khüulang anyüh ko khüulang anyünü hamkehcho.

⁴Abinü adhinung akhau hon-nü münohti akacia singnü külüpcho,

⁵ko khüulang singdi la imüshi la tsü tohrangcho.

⁶Abinü ahüptising hon amüthsinü ashenglang kyaa 4 ko adilang kyaa 2 külüpcho.

⁷Ko hon-nü kengcheh cherubim anyüh,

⁸ahüptising achang achangkalang külüpcho. Arüh tsü ahüptising chah tsü khüdu kang mülukehcho.

⁹Cherubim tsü anyüh dhengkehta ko ahüptising tsü anyüh aqonü phati külüpcho.

¹⁰Abinü tsingthsang tsü akacia singnü ashenglang kyaa 3, adilang kyaa 1½ ko athsenglang kyaa 2 külüpcho.

¹¹Ko hütsü hon amüthsinü münohticho ko hütsü mükang hon-nü abemong la münohcho.

¹²Abinü abemong mükang tsü kuthrung 3 külüpcho ko hütsü mükangmüla hon-nü abemong tsü münohcho.

¹³Abinü hütsü hon-nü adhising imüshi müyü chah hamkehcho.

¹⁴Tsingthsang dhinung akhau yohji imüshi tsü abemong shündhün amükang yohcho.

¹⁵Abinü akhau tsü akacia singnü külüpcho ko hon-nü münohcho.

¹⁶Abinü tsingthsang nengdang shingtbhürü tsü hon amüthseng: yongkha amübü bichinung tbhü, shing, alih füh ko mütpah-tbhü külüpcho.

¹⁷Abinü hon amüthsengnü dsimüdongsing tsü külüpcho. Ajing ko adong tsü hon-nü kheng külüpcho; yungpi mülongchicho zeh khüdu kang mülukehcho.

¹⁸Ajengza dhüroh khüulangnü asang ko khüulangnü asang chürosohcho.

¹⁹Ajengza dhürohdingnü almond yungpi picho kyo yungpi mülongchicho zeh külüpcho.

²⁰Dsimüdongsing adong tsü almond picho kyo yungpi müyü mülongchi kehcho.

²¹Ajengza asang-sang pohki tsü anu chisohcho.

²²Mülongchiba, ajengza ko dsimüdongsing tsü hon amüthsengnü kheng külüpcho adong khüdu du thsacho.

²³Abinü dsimüdongsing chah tsü dsi dhünyeh külüpcho ko kamünyüp ko mihtru tbhü hon dunü külüpcho.

²⁴Abinü dsimüdongsing ko hütsü chah kehbati külüpnung hon amüthsi süreh 35 khyücho.

²⁵Abinü müchiji tahnung bholu khüdu akacia singnü külüpcho. Hütsü adi-asheng sako, ashenglang kyaa 1½, adilang kyaa 1½ ko athsenglang kyaa 3 thsacho. Jongnah müyüdinglang adhengkehsing tsü füpüm khüdu roh-i du licho.

²⁶Abinü abemi ko müyüdinglang ko adhengkehsing ko achang mükang hon dunü ko hon-nü abemong münohcho.

²⁷Abinü hütsü nengdang dhiji hon-nü imüshi anyüh külüpcho ko abemong pohki anyüding lang akhau yohnung hamkehcho.

²⁸Abinü akhau tsü akacia singnü külüpcho ko hon-nü münohcho.

²⁹Abinü Amüsa amüyühnung tuji ko ayohrütacho axümlichi müchiji külüpcho.