Read Sangtam Naga NÜCHEHCHO 38 Bible Online

NÜCHEHCHO 38 - Sangtam Naga bible

NÜCHEHCHO 38

¹Trüp mübüji abinü akacia singnü bholu khüdu külüpcho. Hütsü adi-asheng phülaridunü, khehap münga, ko athsenglang khehap asang thsacho.

²Bholu te khüdu du kangsoh abinü jongnah müyüding athahlang tsü adhengkehji külüpcho. Abinü hütsüri apüm imüyengnü müshüticho.

³Abinü bholu thsütah apüm külüpcho: aruhfüh, michüthsohlung, mütpah-tbhü, shumütsa ko michühfüh. Hiri apüm imüyengnü külüpcho.

⁴Abinü imüyengnü yejang khüdu külüpcho ko hütsü bholu pohki yohcho. Ko hütsünü bholu awüm chihcho.

⁵Abinü adhising imüshi müyü külüpcho ko jongnah müyü la tsü yohcho.

⁶Abinü akacia singnü adhising akhau külüpcho ko hütsü imüyengnü müshücho

⁷ko bholu anyüding lang imüshi la tsü tohyohcho. Ko bholu tsü singtpahnü akoh külüpcho.

⁸Abinü ABÜDONGBA liba trahtri la dikehlarü khingkurü tsahrising tsünü imüyeng mütpah-tbhü ko arüh müdongkehji külüpcho.

⁹ABÜDONGBA liba Shükuh kekhüm nengdang abinü ananashünü akitising külüpcho. kihjinglang lahpi akitising tsü ashenglang khehap thsih khüdu,

¹⁰imüyeng kuhbi mükyü, akhengji imüyeng mükyü ko taripinü külüpcho ahohyehji ko idong zeh licho.

¹¹Kekhüm tsü kihku lahpi tsüsü akyota licho.

¹²Nyüzüdu lahpi akitising ashenglang khehap dhünyang, akhengji dhüre zeh kuhbi dhüre taripinü külüpcho ahohyehji ko idong zehnü licho.

¹³Nyüchürolang, azüduji tsüsü adilang khehap dhünyang licho.

¹⁴Azüduji müipi la akitising khehap dhüre-münga akhengji ko kuhbi asang-sang licho.

¹⁶Kekhüm mükang akitising tsü ananashünü külüpcho.

¹⁷Kuhbi abemi tsü imüyengnü külüpcho ko ahohyehji ko idong ko athahlang tsü taripinü müshücho. Kekhüm mükang kuhbi apüm tsü idong chah tsü rahkehcho.

¹⁸Azüduji la akitising tsü shü anana, apulu, anyahrüm ko shunbüh shenü kyahcho la ayah xüyoh külüpcho. Hütsü ashenglang khehap mükyü ko athsenglang khehap münga azüduji la akitising kyo licho.

¹⁹Hütsü imüyeng akhengji müyü chah kuhbi müyünü thüyeh licho. Ahohyehsing, abemi khyütiba ko idong tsü taripinü külüpcho.

²⁰Shükuh nengdang ahamyehsing ko kekhüm mükang apüm tsü imüyengnü külüpcho.

²¹Hila ABÜDONGBA liba Shükuh khüde Yuzeng Dhüre thrahcho lungtpah anyüh tsü yohpücho ko kuh thsade idhse khyücho thrahbülungcho lile. Hi Mosanü chingcho ko bebüba Aron tsurü Ithamar pohki nguchirü Levirünü nguchicho.

²²Juda hung lanü Hur shümtsurü Uri tsurü Bezalelnü ABÜDONGBAnü yocho lüpcho nguchicho.

²³Abi trorü Dan hung lanü Ahisamak tsurü Oholiab tsü ahamyohrü, athrirü ko anana shü, apulu, anyahrüm ko shunbüh amoh kyahrü thsacho.

²⁴ABÜDONGBA khyang Shükuh nengdang müsachehjücho hon apümnü ahocho süreh hajar khüdu thsacho.

²⁵Ahung mono khicho lanü taripi ahocho süreh 3, 430 thsacho.

²⁶Hi mono khiba la zehrü atümungnü palu jehcho khyübülungcho licho. Mono khiba la tsü kang mükyüpü amilang nyüh lakh dhüroh, hajar asang, thsih müngapü dhünyang licho.

²⁷Taripi süreh 3400 tsü Amüsa Shükuh ko akitising akhengji thsih khüdu nengdang ko akhengji müipi süreh 34 bichicho.

²⁸Ko anyingcho taripi süreh 30 tsünü Bezalelnü idong, kuhbi nengdang ahohyehji ko abemi khyütiba külüpcho.

²⁹ABÜDONGBA khyang müsacheh khyübülungba tsü imüyeng süreh 2, 425 thsacho.

³⁰Hütsünü abinü Shükuh la züduji akhengji, imüyeng bholu ko yejang, bholu thsütah apüm,

³¹kekhüm mükang ko azüduji ko Shükuh hohyehji hiri apüm külüpcho.