Read Sangtam Naga NÜCHEHCHO 39 Bible Online

NÜCHEHCHO 39 - Sangtam Naga bible

NÜCHEHCHO 39

¹Arühnü shü apulu, anyahrüm ko shunbüh amohnü bebürü Amüsa Müdüm la dikehde khyünung ahechi jengki külüpcho ABÜDONGBAnü Mosa te yocho kyo arühnü Aron khyang bebü jengki külüpjücho.

²Arühnü bebürü jengki tsü shü anana; apulu, anyahrüm ko shunbüh shü amoh ko hon shenü külüpcho.

³Arühnü hon atpah-atpah hamchehcho ko jengpa-jengpa müjüpnahpü shü anana, apulu, anyahrüm ko shunbüh shü amoh la kyahyohcho.

⁴Bebü jengki chah tsü müshüshüpsohnung pünurü chah rürangsing anyüh xükehcho.

⁵ABÜDONGBAnü Mosa te yocho roh-i, she alang sakonü nana kyahcho. Kihrümsing tsü bebürü jengki chah xükehtacho.

⁶Arühnü karnelian lung tsü külüpcho ko hon tpah chah tsü tangkehcho; ko hütsü chah Jakob tsurü dhüre-anyüh neng thrahkehcho.

⁷ABÜDONGBAnü Mosa te yocho roh-i, Israel hung dhüre-anyüh neng thrahkehba tsü bebü jengki pünurü chah rürangsing la tsü hohkehcho.

⁸Arühnü drengtang tsüsü bebü jengki külüpcho shenü ayah xüyoh külüpcho.

⁹Hütsü adi-asheng sako ko anyüh thalüpcho ashenglang kuthrung 9 ko adilang kuthrung 9 licho.

¹⁰Arühnü hütsü chah thsidi lungnü achung müyü xükehcho, akhudiba chung la ruby, topaz ko karnet;

¹¹anyüu chung la emerald, safire ko diamond;

¹²asangu chung la turquoise, agate ko amethyst;

¹³ko amüyüu chung la beryl, karnelian ko jasper xükehcho. Hiri tsü hon tpah chah tangkehcho.

¹⁴Hiri lung dhüre-anyüh müipi la tsü Israel hung dhüre-anyüh amüdhethsa, Jakob tsurü dhüre-anyüh neng thrahyohcho.

¹⁵Drengtang nengdang arühnü hon amüthseng rangshü chehcho kyo ixilih külüpcho.

¹⁶Arühnü hon-nü trüpthri anyüh ko hon imüshi anyüh külüpcho ko hiba imüshi anyüh tsünü drengtang athahlang achangka la tsü chingkehcho.

¹⁷Arühnü hon rangshü anyüh tsü imüshi anyüh chah tsü müthsükehcho

¹⁸ko apa achang anyüh tsünü hiwü bebü jengki belang pünurü rürangsing la tsü rüyohcho.

¹⁹Arühnü hon-nü imüshi anyüh külüpcho ko bebü jengki ko drengtang apohki nango lang achang chah tsü chingkehcho.

²⁰Arühnü adesü hon-nü imüshi anyüh külüpcho ko hütsü bebü jengki pünurü chah rürangsing ajinglang belang ko rungrüm thah te chingkehcho.

²¹ABÜDONGBAnü Mosa te yocho roh-i, arühnü dreng imüshi tsü müshüshüpsohnung rangshü apulunü bebü jengki chah tsü chingkehcho.

²²Bebü jengki michah khyüba Pümkhüm apüm tsü shunbüh shü apulunü xücho.

²³Athah yohnung akhi tsü mürohrüpsohnung anyüpili nüpnü xücho.

²⁴ABÜDONGBAnü Mosa te yocho roh-i, arühnü ajinglang abemong mükang tsü shü anana, apulu ko shunbüh shü amohnü tsanümsih yahthri ko hon amüthsengnü drengdreng müthsangta mükingcho.

²⁷ABÜDONGBAnü Mosa te yocho roh-i, arühnü Aron ko atsurüti khyang fükhüm,

²⁸kuyühsing, phümthri,

²⁹ko shü anananü shüra khüdu, apulu, anyahrüm ko shunbüh shü amoh xüyohnü sehyah xüjücho.

³⁰Arühnü amüthseng hon-nü müsachehcho Amüsa amüdhethsa atang jengki külüpjücho ko hütsü chah, “ABÜDONGBA khyang müsachehcho,” pü tühkehcho.

³¹Ko ABÜDONGBAnü Mosa te yocho roh-i, kuyühsing belang apulu rangshünü müthsükehcho.

³²ABÜDONGBA liba Shükuh la nguchi apüm achangkathsa thümcho. ABÜDONGBAnü Mosa te yocho roh-i, Israelrünü lüpcho tsü nguchicho.

³³Arühnü Mosa yang Shükuh ko kohro apüm: ahohyehsing, singtpah, azihsing, kuhbi ko akhengji;

³⁴sanpung küp amoh la chongcho alüptising; alüptising shuküp atsa; ayatiba akitising,

³⁵lungtpah zehba Amüsa Singdi, akhau ko ahüptising,

³⁶tsingthsang ko hütsüla thsütahti apüm ko amübü jücho hümthse;

³⁷hon amüthsengnü külüpcho dsimüdongsing, dsi ko kohro apüm, ko dsi nengdang michangkih;

³⁸hon bholu; müyühjüba tuji; axümlichi müchiji; Shükuh trahtri akitising;

³⁹imüyeng bholu ko yejang, akhau ko hütsüla thsütah apüm; mütpah-tbhü ko akhyangji;

⁴⁰kekhüm akitising ko kuhbi ko akhengji; kekhüm trahtri akitising ko rangshü, ahamkesing; Shükuh la bichiba apüm;

⁴¹Amüsa Müdüm la bebürünü khyüba ahechi jengki, bebüba Aron ko atsurüti nengdang Amüsa jengki hiri hirocho.

⁴²ABÜDONGBAnü Mosa te yocho roh-i, Israelrünü nguchi apüm nguchicho.

⁴³Mosanü lüpcho tsü dhengcho ko arühnü apüm tsü ABÜDONGBAnü yocho roh-i nguchicho ngucho. Achotsü Mosanü arüh müwajücho.