Read Sangtam Naga NÜCHEHCHO 40 Bible Online

NÜCHEHCHO 40 - Sangtam Naga bible

NÜCHEHCHO 40

¹ABÜDONGBAnü Mosa te yocho,

²“Akhudiba choo akhudiba nyümong la tsü ABÜDONGBA liba Shükuh tsü müdong.

³Hütsüla Yuzeng dhüre zehba Yuzeng Singdi tsü yohng ko hütsü bete akitising yohng.

⁴Hütsüpü tsingthsang tsü hizürung ko hütsü michah thsütahti tsü yohpüng. Hütsüpü dsimüdongsing tsü müdong.

⁵Ko Yuzeng Singdi bete tsü müchiji tahji hon bholu tsü yohpüng ko Shükuh trahtri la tsü akitising yohng.

⁶Shükuh bete tsü amübü tahji bholu tsü yohpüng.

⁷Ko Shükuh ko bholu nyüh kahla tsü mütpah-tbhü yohpüng ko hütsü kihnü jengsohng.

⁸Kekhüm tsü mükangmüla yohng ko trahtri la akitising yohng.

⁹“Hütsüpü Shükuh ko kohroti apüm Amüsa tuji tsü müyühjo müsachehng ko hütsü Amüsa kangnung.

¹⁰Anyüu la bholu ko kohro apüm müyühjo müsachehng, ko Müsa kangnung.

¹¹Mütpah-tbhü ko amüdongkehji tsüsü hütsüta müsachehng.

¹²“Aron ko atsurüti Shükuh trahtri yang norung ko ayah mütsah, mütsahnung young.

¹³Aron khyang bebü jengki khyüsohng, müyühjüng, ko abinü bebürü kang Ih dikehnung shulüm abi müsachehjüng.

¹⁴Atsurüti norung ko pümkhüm khümsohng.

¹⁵Ko arühnüsü bebürü kang Ih dikehnungthsa nührünü au müyühjücho kyo, arühsü müyühjüng. Hütsü roh-i müyühjo throchehba tsünü aronung shang apüm la arüh bebürü thsanung.”

¹⁶ABÜDONGBAnü yocho roh-i Mosanü lüpcho nguchicho.

¹⁷Hütsüta arüh Ijip pehjüpü kang anyüu la akhudiba choo, akhudiba nyümong, ABÜDONGBA liba Shükuh tsü müdongcho.

¹⁸Mosanü akhengba khengcho, singtpah müdongcho, azihsing yohcho ko kuhbi yohcho.

¹⁹ABÜDONGBAnü yocho roh-i, abinü Shükuh michah alüptising phakehcho ko hütsü michah amixi alüptising phakehcho.

²⁰Hütsüpü abinü lungtpah anyüh tsü khyo Yuzeng Singdi la tsü yohcho. Abinü akhau tsü singdi imüshi la yohcho ko hütsü michah hüpticho.

²¹Hütsüpü abinü Shükuh la singdi tsü yohpücho ko ayatiba akitising kicho. Hütsüta ABÜDONGBAnü yocho kyo Yuzeng Singdi tsü khümcho yohpücho.

²²Abinü tsingthsang tsü Shükuh la akitising milang kihku lahpi yohpücho,

²³ko ABÜDONGBAnü yocho kyo amübü jücho hümthse tsü hütsü michah yohpücho.

²⁴Abinü Shükuh la dsimüdongsing tsü tsingthsang kihjing lahpi deta yohpücho,

²⁵ko ABÜDONGBAnü yocho kyo, hütsüla abinü dsi tsü tahkehcho.

²⁶ABÜDONGBAnü yocho kyo, abinü akitising bekhu Shükuh la tsü hon bholu tsü yohpücho,

²⁷ko axümlichi müchiji tsü tahcho.

²⁸Abinü Shükuh trahtri la akitising tsü kicho,

²⁹ko hütsüla akitising bete amübü tahji bholu yohpücho. Hütsü chah tsü ABÜDONGBAnü yocho kyo, abinü trüp mübüba kangmübü ko tsang mübü mübücho.

³⁰Abinü Shükuh ko bholu nyüh kahla mütpah-tbhü yohpücho ko kihnü jengsohcho.

³¹ABÜDONGBAnü yocho kyo, Mosa, Aron ko atsurütinü khodederü

³²Shükuh mahkhang bholu lang tsü züdunang arühnü hütsüla arüh jingkhehrü thsüthohcho.

³³Mosanü Shükuh ko bholu mükang kekhüm yohcho ko trahtri la tsü akitising kicho. Hütsüta abinü nguchi apüm thümcho.

³⁴Hütsüde Shükuh tsü nyükhinü shüticho ko ABÜDONGBA ahechinü kuh tsü jengcho.

³⁵Hütsü khu, Mosanü Shükuh la tsü müzüduchehcho.

³⁶Khode Shükuh lanü nyükhi tsü tsicho, hütsüpü du Israelrü müdüm apa yangchi shehmüicho.

³⁷Hütsüla nyükhi mütsidelü, arühnü arüh müdongji lanü müshehmüicho.

³⁸Arüh shitseh shikhe ayung arühnü anyümong Shükuh la ABÜDONGBA licho nyükhi ko aromang michang trucho ngucho.