Read Sangtam Naga NÜCHEHCHO 5 Bible Online

NÜCHEHCHO 5 - Sangtam Naga bible

NÜCHEHCHO 5

¹Hütsüpü Mosa e Aron nyühnü Farao yanglang wünü yocho, “ABÜDONGBA, Israel Tsingrangnü yore, ‘Lipilih la arühnü I nengla thsüti linung nengdang, I müyurüti wüsohng’ ”

²Yangthsabanü tsingdhengcho, “ABÜDONGBA tsü süo?” “Tuepü Ihnü abi yu nyi Israelrü tsisohnung? ABÜDONGBA tsü Ihnü mümüdhe; Ihnü Israelrü mütsisohnung.”

³Mosa e Aron nyühnü lalingcho, “Ibrirü Tsingrang apu jangjang ihrü te mishako. Ihrü Tsingrang ABÜDONGBA khyang kangmübü jünung lipilih lang wünung ihrü khyang nyümong asang mülajüng. Ihrünü hütsü münguchikhang, rümra mahkhang khatanü ihrü süsohnung.”

⁴Faraonü Mosa e Aron nyüh te yocho, “Tuepü nührünü nyitsarüti arüh nguchi lanü nümüiro? Ayurüti tsü nguchi lang wüsohng!

⁵Nührü nyitsarü Ijiprü tenü adronguba suhchehko. Ko ade nührünü münguchinyüre!”

⁶Hütsü nyümong tsünü Yangthsabanü ayurü nyahrü ko Israelrü anüchirü te yuzengjo yocho:

⁷“Adelü lihtah lung külüpnung manying tüjü. Arüh jangjang wü hütsü khyübülungsohng.

⁸Ta lihtah lung tsü khüdusü mükyühchopü akhichocho ajeng akhulang roh-i külüpsohng. Arüh nguchinü münguchixahrübae, hütsünü arüh Tsingrang khyang kangmübü jünung wüsohngpü mütozah Ih longmüzire.

⁹Nyitsarü hiri alaa müpahseh nguchisohnung nguchi alaa jüng, hütsüpü du arühnü arahkheh yu nyinung müpahnung.”

¹⁰Achotsü ayurü nyahrü ko anüchirütinü wünü Israelrü te yocho, “Yangthsabanü nührü khyang adelü manying müchixinung yoko.

¹¹Nührübürü jangjang wünü khyübülungnung, ta lihtah lung akhichocho tsülü asusuh külüpnung yore.”

¹²Hütsünü müyurütinü Ijip lih jeng manying yangchinung wücho.

¹³Ayurü nyahrütinü akhulang manying jüde külüpcho doi lihtah lung tsü külüpm pü arüh khütang khingcho.

¹⁴Ijiprü anyahrütinü Israelrü anüchirüti sürü nguchi dhengyehnung yohpücho arüh chah lahcho. Arühnü yocho, “Tuepü nührünü akhulang külüpcho doi lihtah lung mükülüpro?”

¹⁵Hütsüde anüchirütinü wü Yangthsaba te jümjüm yocho, “Adibong! Tuepü nühnü ihrü chah hita nguchiro?

¹⁶Ihrü khyang manyinglü müjüpü, lihtah lunglü akhichocho külüpnung yuzeng jüre! Ko ade ihrü chah lahre, ko hütsü nü müyurü mülang lile.”

¹⁷Yangthsabanü lalingcho, “Nührü ayungsüh ko münguchinyüre, hütsü khu wünü ABÜDONGBA khyang kangmübü jünung nührü wüsohng pü I te kihchire.

¹⁸Ade nguchilang wüng! Nührü khyang manying müjünung, ta lihtah lunglü akhudi doi külüpm.”

¹⁹Akhulang roh-i nyümong mükhu lihtah lung tsü akhichocho külüpnungbaepü anüchirüti te yochonü, arüh athsangthsi la licho lümchehcho.

²⁰Arüh tsichi yade, arüh yingyacho Mosa e Aron nyüh mütohcho.

²¹Arühnü Mosa e Aron nyüh te yocho, “ABÜDONGBAnü nührü nguchi nguko ko Yangthsaba ko abi thsazirünü ihrü thrünyisohcho shulüm nühjü khingchinung. Ihrü kyüsehsohnung nühjünü arüh khyang arahkheh khehyüm jüko.”

²²Hütsüde Mosanü ABÜDONGBA yang thali ropü yocho, “ABÜDONGBA, tuepü Nühnü nü müyurü mükhimücho bichiro? Tuepü Ih hila müthehcho?

²³Yangthsaba yanglang nü nengdang chotanung Ih wükotinü, abinü arüh khütang mütsa bichire. Ko arüh tronung Nühnü tu münguchire!”