Read Sangtam Naga NÜCHEHCHO 6 Bible Online

NÜCHEHCHO 6 - Sangtam Naga bible

NÜCHEHCHO 6

¹Ko ABÜDONGBAnü Mosa te yocho, “Ade Ihnü Yangthsaba chah tu nguchinang nühnü ngunung. I müyurü tsisohnung Ihnü abi khingnung. Ajüje abinü abi lih lanü arüh tsisohnungthsa Ihnü abi khingnung.”

²Tsingrangbanü Mosa te chota yocho, “Ih ABÜDONGBA.

³Ihnü Abraham, Isak ko Jakobrü te Akohba Tsingrang roh-i mishako, ta Ihnü Ipu jangjang arüh khyang I Amüsa neng mümüdhesoh.

⁴Ihnü arüh te arüh shirü thsa liyaba Kanan lih tsü arüh khyang jünungepü azengtaba külüpko.

⁵Ade Ijiprünü Israelrü ayurü kangsohcho, ko arüh rühchicho Ihnü yuchiko, ko Ihnü azengtacho lümchehko.

⁶Hütsüeko Israelrü te hita young, ‘Ih ABÜDONGBA; Ihnü nührü Ijiprü khehla ayurü suro lanü khümchonung ko lehchehnung. Ihnü arüh adrünungnü khingchinung Ih akohba kheh dhimüsunung ko Ihnü nührü khümchonung.

⁷Ihnü nührü Ipu nyitsarü kangsohnung ko Ih nührü Tsingrang kangnung. Ko Ihnü nührü Ijiprü ayurü suro lanü nüchehde, nührünü Ih nührü Tsingrang ABÜDONGBA epü müdhenung.

⁸Ihnü Abraham, Isak ko Jakobrü te nyengchoba lih lang nührü noronung; ko hütsü nührü yo thsanung Ihnü nührü khyang jünung. Ih ABÜDONGBA.’ ”

⁹Mosanü hi Israelrü te yocho, ta arühnü münyicho, tunüo arüh khura ayurü kangsohchonü arüh alongdi müli kangpehcho.

¹⁰Hütsüde ABÜDONGBAnü Mosa te yocho,

¹¹“Wüng ko Farao te Israelrü abi lih pehjüsohng pü young.”

¹²Ta Mosanü lalingcho, “Israelrünü mii I te münyikhang, I roh-i amüxüpchehrü te khüta Faraonü nyinung?”

¹³ABÜDONGBAnü Mosa e Aron nyüh te yocho, “Israelrü ko Ijip Yangthsaba te Ijip lanü Israelrü nüchehnung nühjü khyang Ihnü yuzeng jükoding.”

¹⁴Jakob tsurü aukhuba Reuben tsurü müyü licho: Hanok, Pallu, Hezron ko Karmi; arüh neng tsünü arüh jümü hung ngusohre.

¹⁵Simon tsurü dhüroh licho: Jemuel, Jamin, Ohad, Jakin, Zohar ko Kananlarü tsurü Shaul; arüh neng tsünü arüh jümü hung ngusohre.

¹⁶Levi tsurü asang licho: Gershon, Kohat ko Merari; arüh neng tsünü arüh jümü hung ngusohre. Levi kang 137 licho.

¹⁷Gershon tsurü anyüh licho: Libni ko Shimei ko arüh chahnü trahchocho adrong licho.

¹⁸Kohat tsurü müyü licho; Amram, Izhar, Hebron ko Uziel. Kohat kang 133 licho.

¹⁹Merari tsurü anyüh licho: Mahli ko Mushi. Levi hung ko arüh chahnü trahchocho tsü hiri licho.

²⁰Amramnü au ani Jokebed khyücho, ko abükyünü Aron e Mosa nyüh nümüsucho. Amram kang 137 licho.

²¹Izhar tsurü asang licho: Kora, Nefeg ko Zikri.

²²Uzielsü atsurü asang licho: Mishael, Elzafan ko Sithri.

²³Aron-nü Aminadab tsulatpü ko Nashon nirü Elisheba khyücho: Abükyünü Nadab, Abihu, Eleazar ko Ithamar nümüsucho.

²⁴Kora tsurü asang licho: Assir, Elkana ko Abiasaf; arüh tsü Kora trah changsho jümürü kangcho.

²⁵Aron tsurü Eleazarnü Putiel tsulatpü khyücho ko abükyünü Finehas nümüsucho. Hiri tsü Levi trah la tsutputi michah athahti licho.

²⁶Aron e Mosa nyüh tsü khüdupi ABÜDONGBAnü, “Ijip lanü Israel nüchehng” pü yoba nyüh tsü thsacho.

²⁷Farao te Israelrü müthehchüng pü yoba nyitsarü tsü hinyi licho.

²⁸Ijip la ABÜDONGBAnü Mosa te chota

²⁹yocho, “Ih ABÜDONGBA. Ihnü nü te yocho apüm Farao te young.”

³⁰Ta Mosanü yocho, “Ih amüxüpcheh-epü nühnü müdhele; khüta Faraonü I te nyinung.”