Read Sangtam Naga NÜCHEHCHO 9 Bible Online

NÜCHEHCHO 9 - Sangtam Naga bible

NÜCHEHCHO 9

¹ABÜDONGBAnü Mosa te yocho, “Farao yang wüng ko abi te Ih Ibrirü Tsingrang ABÜDONGBAnü hita yoreding, ‘Ih mübünung nengdang I müyurü wüsohng.

²Adesü nühnü arüh müwüsohpü tphahlikhang,

³Ihnü nü kanglungrü apüm— kuri, gadu, ut, misü, San ko miza chah adrünung asüba dhsara müthehnung.

⁴Ihnü Israelrü ko Ijiprü kanglungrü papa changchehjünung, ko Israelrü kanglungrü khüdusü müsünung.

⁵ABÜDONGBAnü alihla hi nguchinung atu bekhyah throchehko’ ”

⁶Nyümong khüu tsü ABÜDONGBAnü achocho kyo nguchicho; ko Ijiprü kanglungrü apüm sücho, ta Israelrü yolü kanglungrü khüdusü müsücho.

⁷Atikehcho nengdang Yangthsabanü tsingdhengcho, ko Israelrü kanglungrülü khüdusü müsü pü abi te yocho. Ta abi hong alaa zinü müyurüti tsü mütsisohcho.

⁸Hütsüpü ABÜDONGBAnü Mosa e Aron nyüh te yocho, “Taa lanü tavi müyo-o kang bieng; ko hütsü Farao bete Mosanü nyübong la sohmüthehng.

⁹Hütsü Ijip lih apüm shujengnung ko apümlang hütsü kii kangnung ko nyitsarü kanglungrü apüm chah hütsü mathsa kangnung.”

¹⁰Achotsü anyünü tavi aza bipü Yangthsaba bete yacho; ko Mosanü hütsü nyübong la shuh müthehde hütsünü kii chürosohcho, hütsü khu nyitsarü ko kanglungrü chah mathsa kangcho.

¹¹Amongrütinü Mosa bete müyachehcho, tunüo arühsü aparü Ijiprü kyo kiinü tsüticho.

¹²Ta ABÜDONGBAnü Farao hongzi kangsohcho ko ABÜDONGBAnü yocho kyo, Faraonü Mosa e Aron nyüh te münyicho.

¹³Hütsüde ABÜDONGBAnü Mosa te yocho, “Atunyang mütoh wü Farao shirüng, ko abi te ABÜDONGBA, Ibrirü Tsingrangbanü hita yoreding: ‘Ih mübünung nengdang I müyurü wüsohng.

¹⁴Adelü Ihnü nü thsazirü ko nü müyurüti du mah, ta nüpu mii khingchinung, hütsüpü du Ih kyo limih la süsü müle pü müdhenung.

¹⁵Ihnü nüh ko nü müyurü chah thsaranü xüpnung I kheh dhimüsurelang, nührü sehseh changpehba thsako.

¹⁶Ta nü te I zii ngusohnung, ko limih apüm la I neng müdhesohnung Ihnü nü akang yohpücho.

¹⁷Ta ade yingcheh nü hongzi I müyurü mütsisohre.

¹⁸Atu hiba bekhyah Ijiprü yukheh la khodesü mütikehdhengcho shurü sühsohnung.

¹⁹Ade akang ko lüpcho jungchah licho khangtipünung yuzeng jüng. Jungchah liba nyitsarü ko kanglungrü michah shurü sühnung ko arüh apüm sünung’ ”

²⁰ABÜDONGBAnü yocho la tsü Yangthsaba thsazirü khürünülü drücho ko ayurü ko kanglungrüti khangtipücho.

²¹Ta aparülü ABÜDONGBA yu la nangkhi müjü arüh ayurü ko kanglungrüti jungchah du yohpücho.

²²Hütsüde ABÜDONGBAnü Mosa te yocho, “Nü kheh tsü ninglang dhimüsung, ko Ijip lih apümlang nyitsarü, kanglungrü ko rangmü la singdonglidong apüm chah shurü sühnung.”

²³Achotsü Mosanü aja tsü ninglang dhimüsucho, ko ABÜDONGBAnü alih la ningki, shurü ko tsingchi jürosohcho.

²⁴ABÜDONGBAnü apümlang shurü ko ningmüla tsingchi zeh khütang sühsohcho. Ijiprü yukheh la hiba hi adangchi amütsauba tikehcho.

²⁵Ijip lih apüm la shurü tsünü jungchah licho lüpcho nyitsarü, ko kanglungrü changsohcho. Rangmüla singdonglidong lüpcho kengsehcho.

²⁶Israelrü liba Goshen lih la du shurü tsü mürocho.

²⁷Yangthsabanü Mosa e Aron nyüh dsinü yocho, “Ade Ihnü amünyi shitpahko; ABÜDONGBA yuje-e, Ih ko I nyitsarütinü thsamehko.

²⁸ABÜDONGBA te kihchijüng! Ningki ko shurü sühchonü ihrü kükyüko! Ihnü nührü tsisohnung; adelü nührü hila mülinung.”

²⁹Mosanü abi te yocho, “Ihnü yangdi lanü chüduyeng ABÜDONGBA te I kheh dhimüsu dangkhidangnangjünung. Ningkiba zahnung ko nührünü alimih hi ABÜDONGBA yoepü tsüpnung shulüm shurü sühkanung.

³⁰Ta ade yingcheh nüh ko nü thsazirütinü ABÜDONGBA Tsingrang müdrü pü Ihnü müdhele.”

³¹Müyahdong ko lüdi thsangnyangcho, tunüo lüdi nyi licho ko müyahdong tsü mülongchi licho.

³²Ta lihtohlü müthsangnyangcho, tunüo hütsülü aka nyire.

³³Mosanü Yangthsaba tenü za yangdi lanü chüdupü ABÜDONGBA te akheh dhimüsu dangkhidangnangcho. Hütsüde ningki, shurü ko tsing zahpehcho.

³⁴Khode atikehcho tsü Faraonü ngucho, abinü thali amünyi shitpahcho. Abi ko abi thsazirüti tsü lede kyo arüh hongzi kangcho,

³⁵ko ABÜDONGBAnü Mosa khu tsehleh yocho kyo, Yangthsabanü Israelrü tsü mütsisohcho.