Read Sangtam Naga JOB 11 Bible Online

JOB 11 - Sangtam Naga bible

JOB 11

¹Amükhyu yu hiri sünüsü mülalingnung do? Khütang chochonü nyüh khüdu langjünung mah-o?

³Job, nü yu mülengchehnungepü lümrü mah-o? Nü müthsamünyü yu tsünü ihrü yu müchochehsohnung mah-o?

⁴Nühnü yoba tsü yuje-epü nühnü lümre; Tsingrangba jingte nüh amüsaepü nühnü lümre.

⁵Nü yu Tsingrangbanü lalingsohnyüle!

⁶Abinü nü te arang lümlong yonung; Nyitsarü amüdhenü müchihnung dee asoh khürü lile. Nü chah lengcho tenü akyühchoba Tsingrangbanü khingchire.

⁷Tsingrangba dicho ko tase tsü nühnü kiidhengchehnung do?

⁸Ning tsü Tsingrangba nengdang akihzah müle, ta hütsü nühnü müchihnung la lile. Tsingrangbanü asü lih müdhele, ta nühnü hütsü mümüdhe.

⁹Tsingrangba diba tsü limih tenü amüzau, ko kihdi tenü adiu.

¹⁰Tsingrangbanü nüh rang yukha lang norokhang, sünü Abi yatinung?

¹¹Tsingrangbanü amii müliba nyitsarü müdhele; arüh münyi nguchi apüm Abinü ngure.

¹²Rangmü gadu rahseh kangde, adohrü lümpisa kangnung.

¹³Job, nü lasih müchong yohpüng, Tsingrangba te nü kheh dhimüsung.

¹⁴Nü kukhi lanü amünyi ko amüthsalang khyükhung.

¹⁵Hütsüpü drengdreng ko müsi mülah limih la lieng.

¹⁶Hütsüde nü lümlong lanü nü chongcha apüm changnung, kihmülüm khu tsipü adelü mülümkehcho kyo,

¹⁷Nü akang tsü nyüthung la nyüthsa tenü avisau kangnung, ko akang la amarürah-uba bekhyah tsü anyangnyü kyo vinung.

¹⁸Nüh khümcho alongdi li linung; Tsingrangbanü nüh tsungtinung ko akyahshang jünung.

¹⁹Nühnü nü rorüh müdrünung; adrongnü nü te arüku chingnung.

²⁰Ta amütsarülü lümdhama dhengmükangnung, ko atsichehnung lang mülepü müdhenung. Asüba ronung du tsü arüh alongdi linung.