Read Sangtam Naga JOB 19 Bible Online

JOB 19 - Sangtam Naga bible

JOB 19

¹Tuepü nührü yunü Ih hitoh-i khingchiro?

³Bekhyah mükhu nührünü Ih müthsamünyüre, nührünü Ih mükhimünguba nengdang ashahsü müshahre.

⁴Ihnü thsamehsü linye, hütsünü nührü thsakehjürü do?

⁵Nührü tsü I tenü atsauepü nührünü lümre, ko I chongcha hi I thsamehcho ngangepü nührünü khichire.

⁶Hi Tsingrangba khehthsiepü nührünü müngure ang? Ih xohsohnung Abinü zeng thsapüjücho.

⁷Abi nguchi nengdang Ihnü nyüm yacho, ta sünüsü münyire; Yuje nengdang züdecho, ta sünüsü müyuchire.

⁸Tsingrangbanü lang tsü müptiko, ko Ihnü hütsü mükhuchehre; Abinü I lang amarürah la rangko.

⁹Abinü I kuthsi apüm hitsiko, ko I neng thsangnyangjüko.

¹⁰Apümlangnü Abinü Ih khingchire. Abinü I alongdi rohchehjüko ko müku süsohnung pehjüko.

¹¹Tsingrangbanü Ih nyüm rihlong chürore; Abi rorüh amütsauba te kyo Ih bichire.

¹²Ih mahnung Abi rothsarü müthehre; arühnü I shükuh mükang threhju jure.

¹³Tsingrangbanü I jünirü khyang Ih thrüchahchüpehsohko; Ih müdherü te adelü Ih shirü kangko;

¹⁴I tsutpurü ko shangrü müle.

¹⁵I kuhla kangba shirütinü Ih nbüchopehko; I kulilarütinü Ih shirü ko shuparü khüdu roh-i khichi bichire.

¹⁶Ihnü kulirü khüdu dside, abinü I te mülalingre; Ih troungpü kihchipü mii Ih mütrore.

¹⁷I nitpünü mii I bela xümcho khu müyachehre, ko I jünirütinü mii I shündhün mürore.

¹⁸Azarütinü Ih ngude Ih müthsamünyo münyüjüre.

¹⁹I shangrükhungtinü mii Ih thrünyi dhengre; Ihnü khütang müibatinü mii Ih nyümre.

²⁰I rüh aküpdunü münati lile; haririnü I kang tsicheh lile.

²¹Nührü I shangrüti! I te chomang! Tsingrangba khehnü Ih khülusohko.

²²Tsingrangbanü kyo tuepü nührünü mii Ih dhsümthsero? Ih khingchicho hinü nührü long münyüp ang?

²³Khürünü dusü I yu hiri lümcheh vakha khüdu la thrah müyohpüpü!

²⁴Mahkhang I yu hi lung la chiikoh müyohpüpü ko lede nengdang thrah yohpüsohnyüle.

²⁵Ta Ihnü müdhe ninglang khürü lile, achangka la arühnü ro Ih khümnung.

²⁶I küp hi thsaranü tsukhangpü khanglang nye, Ipu fü hinü Ihnü Tsingrangba ngunung.

²⁷Ipu nahnü Ihnü Abi ngunung, ko Abi shirü müthsanung. Ih müsi mümülahcho, tunüo nührünü yocho,

²⁸“Ihsanü khüta abi khingchinung?” Nührünü Ih khingchinung yuzi yangchicho.

²⁹Ta ade, nohsheng drüng, amünyi chah Tsingrangba rihlong hiroba nohsheng, hütsüpü du yukharü khüdu lilepü nührünü müdhenung.