Read Sangtam Naga JOB 2 Bible Online

JOB 2 - Sangtam Naga bible

JOB 2

¹Adesü ninglangrünü ABÜDONGBA te shirünung nyümong chii rocho ko arüh yola Satansü zehcho.

²ABÜDONGBAnü abi te tsingdhengcho, “Nüh khüdenü rocho?” Satan-nü lalingcho, “Wüli-roli ko tuwüli-jüroli liba limih lanü rocho.”

³ABÜDONGBAnü tsingdhengcho, “Nühnü I dikehrü Job münguo? Limih la abi roh-i yujechorü ko atsa süsü müle. Abinü Ih mübüre ko amünyi tusü münguchinung müzahre. Tu yuzi mülipü abi thsatsünung nühnü Ih kihchocho, ta Job tsü lede roh-i abübü lile.”

⁴Satan-nü lalingcho, “Nyüh khüdunü akang linung nengdang lüpcho pehjünung.

⁵Ta Nühnü ade abi shutsa la thsakehjükhang, abinü Nüpu betenü chokehcholanung.”

⁶Achotsü ABÜDONGBAnü Satan te yocho, “Dheng, abi nü khehla zehle, abi akang du tükhyü.”

⁷Hütsüpü Satan-nü ABÜDONGBA licho lanü tsicho ko Job fü apüm la mathsa chürosohcho.

⁸Jobnü wü sehnyeh bhümla pümpü amathsa müthrüpchinung alih füh mapnahcho dsi-o thro rocho.

⁹Anitpünü abi te yocho, “Nüh akhudi roh-i du abübü linung ang? Tsingrangba tsü chokehcholaang ko sopehng!”

¹⁰Jobnü lalingcho, “Thoh müzeh yu tücho. Tsingrangbanü atsa jüde Ihsanü künyang khyüchore. Khang Abinü chongcha müthehde tuepü Ihsanü wahro?” Abi hidoi chongcha nye, Jobnü Tsingrangba nyüm tusü müchocho.

¹¹Job shangrüti yola asang tsü Teman yangdi lanü Elifaz, Shua lih lanü Bildad ko Nama lih lanü Zofar licho. Job chongchacho yuchi arühnü wü abi kihchonung dhrongchehcho.

¹²Arühnü ashu lanü Job ngucho, ta abi müdhengchehcho. Khode arühnü chii rocho, arühnü tramüsucho, ko alongrichonü arüh jengki rehnahcho ko lihwü kang hiro nyübong la sohpehcho ko arüh thah chah kangkehcho.

¹³Hütsüpü arühnü yu tpah-o mii müchüropü abi te alih la nyümong dhünyeh romang dhünyeh pümcho, tunüo abi khütoh-i chongchacho hütsü arühnü ngucho.