Read Sangtam Naga JOB 22 Bible Online

JOB 22 - Sangtam Naga bible

JOB 22

¹Tsingrangbanü bichinungthsa, amüdherü yola khürü lirü mah-o?

³Nührünü athsalang nguchiba tsünü Tsingrangba jingchorü do? Mahkhang nührü tsaba tsünü Abi rükurü do?

⁴Nühnü Tsingrangba drücho khu Abinü nüh yübo thsatsürü mah.

⁵Mah! Hütsü nühnü münyi dira shitpahchonü; hütsü nühnü amünyi hütsütoh-i nguchicho ngang.

⁶Nü jünirü khyang nü te teeba thsite sahsohnung, abi tbhüdeng yohpüjüpü nühnü abi jengki hitsijücho.

⁷Akyahrü khyang nühnü kih müdi, ko ayangrü khyang tsang müdüp.

⁸Alih apüm khyünung nühnü nü tase ko nü jengreng bichiko.

⁹Nühnü chomilarü mütrocho du mah, ta mürürü chahnü kengcho ko sehchi bichiko.

¹⁰Hütsünü ade nü mükang zeng thsapüle, ko dhrongyengnü nüh dropehre.

¹¹Marürah-ra kangchonü nühnü müngure, ko kihmülümnü nüh mülümphare.

¹²Tsingrangba amungthriba la pümpü, athseng la thsanye, chenghiti chah müdhengchahchürü ang?

¹³Hütsüta nye nühnü yorü, “Tsingrangbanü tu müdhero? Abi nyükhi la rang lile, Abinü khüta Ihsa yukhanung?”

¹⁴Nyükhi acheh tsünü Abi müngunungepü nühnü lümre, Abi ningkong la rachide.

¹⁵Amütsarü tsehba lang la tsü tsehnung nühnü dhrongchehcho mah-o?

¹⁶Arüh akyang müchie, kihmülümnü woh tsicho.

¹⁷Hütsüri tsü Tsingrangba mükhyüchorü, ko Abinü arüh chah tu münguchinung lümbarüti tsü licho.

¹⁸Ta müwajüba tsü Tsingrangbanü. Amütsarü lümlong tsü Ihnü münyichehre.

¹⁹Nyitsarü atsa künyangre, ko achomükehrü münyüre, arühnü amütsarü khingchi ngude.

²⁰Amütsarünü khyübülungcho apüm changjücho, ko anyingcho tsü michangnü trüp-pehcho.

²¹Job, ade Tsingrangba te yangtsa külüpm, ko Abi te arorüh kyo tübichi; hütsükhang Abinü nüh müwajünung.

²²Abi adoba tsü khyüchoung, Abi yu nü lasih la yohpüng.

²³Ho, Abi yang longlüm ximüla rung, ko nü kuhla nguchiba amünyiti apüm pehjüng.

²⁴Nü hon tsayohchü pehng; nü hon amüthseng tsü yongkhi akung la pehng.

²⁵Akohbong Tsingrang tsü nü hon thsaang, ko Abi tsü nü nengdang sühpüba taripi kangsohng.

²⁶Hütsüde nühnü Tsingrangba chah longlangnung ko Abi tsü nü akünyang pohchehji kangnung.

²⁷Nühnü kihchide, Abinü lalingnung, ko nühnü yuchüm tsü yohpünung.

²⁸Nühnü nguchicho apüm la akoh ngunung, ko nü lang la atsingse vinung.

²⁹Tsingrangbanü amüthsehrü tphahchore, ko alonglümrü khümchore.

³⁰Abinü nüh khümchonung, nüh achomükeh likhang, nühnü athsalang du nguchikhang.