Read Sangtam Naga JOB 28 Bible Online

JOB 28 - Sangtam Naga bible

JOB 28

¹Taripi juji lixang lile; Hon müluchah müdüm lile.

²Alih yonglangnü idhse juchehre, ko lung lanü imüyeng müluchehre.

³Nyitsarünü amarürah asoh-uba chii züdure. Arühnü alih yonglang chii yangchire. Ko amarürah la lung jure.

⁴Nyitsarü liba lanü ashu mahkhang jingnü müchicho la, nyitsarünü alih xang ju züdure. Hütsüla arühnü nayingseh nguchire lihkhi la tsü rangshü chah marehre.

⁵Alih lanü tsuyongba chürore, ta hütsü yonglanglü trüpnahre.

⁶Alih pohki lung la tsü Safir zehre. Ko lihpi tsü hon du zehle

⁷Lixang lang wüba lang tsü müdinü müngure, hütsü khu hogon-nü mümongkhure.

⁸Hütsüba lang anaying la tsü kihkhünying mahkhang tu kangdi mülahkhu.

⁹Nyitsarünü lungzi tsü jure, Azong tsü aranü mükhapehre.

¹⁰Arühnü lung la tsü juphoh züdude, arühnü thsidi lung ngure.

¹¹Arühnü kih zehba chii jure, ko rang liba tsü mishare.

¹²Ta lümlonglü khüdenü ngunung? Anyichehba tsü khüdenü nyichonung?

¹³Lümlong nyitsarü yola müngunung; Sünüsü hütsü yuje amii mümüdhe.

¹⁴Kihjü ko kihdi asohnü yore, lümlong tsü hütsü lasü müngunung.

¹⁵Hütsü hon ko taripinü mülicheh.

¹⁶Hon amüthseng ko thsidi lungnü mii hütsü amii müchüronung.

¹⁷Hütsü hon tenü awüba, hon müdongsing ko atsauba tsahrising tenü awüba.

¹⁸Lümlong amii tsü koral longzi, ririlung mahkhang bhürüm tenü awüba.

¹⁹Topaz lung atsauba mahkhang hon amüthsengnü lümlong amii te mükitacheh.

²⁰Khang, khüdenü lümlong roro? Anyichehba tsü khüdenü nyichonung?

²¹Akang liba tunüsü hütsü ngunung mükoh, Uzanüsü hütsü ngunung mükoh.

²²Asüba ko achangbanüsü achochicho du yuchichoepü yore.

²³Tsingrangba dunü lang tsü tsüple, Lümlong nguji tsü Abinü du müdhele.

²⁴Tunüo Abinü alih changka chii ngure, Ning pohki lüpcho ngure.

²⁵Nyübong khyang zii jüde, ko kihdi tsü khütoh-i thsanung hütsü kihsah jüde,

²⁶Khode Abinü tsing tsü khüde ronung yuzeng jücho, ko ningpoh-ningki khüde tsehnung shulüm lang thrijüde.

²⁷Hütsüde Abinü lümlong tsü ngucho ko hütsü amii müdhecho. Hütsü nengdang Abinü amülaba jücho.

²⁸Ko Abinü nyitsarü te yocho, “Dheng, ABÜDONGBA jengreng drüba, hütsü lümlong; ko amünyi tenü ximülanung tsü anyichehba.”