Read Sangtam Naga JOB 29 Bible Online

JOB 29 - Sangtam Naga bible

JOB 29

¹Jobnü thali chonung dikehcho.

²Tsingrangbanü dhengyeh liba bekhyah I kangsü khüdupi hütsü roh-i thali linyüle.

³Hütsüde lede Tsingrangba I te licho, ko Ih amarürah khu tsehde avisa jücho.

⁴Hütsüri nyümong Ih pungrohiro licho, ko Tsingrangba te kehta libanü I kukhi tsungti licho.

⁵Hütsüde Akohbong Tsingrang I te licho, ko tsuzarü apümnü Ih mükangti licho.

⁶I misü ko mizanü nyikih thangchi jücho, ko olive singdong lungrah la mii zicho.

⁷Yangdi la azibarü shimükhongde, Ihsü arüh yola pümcho,

⁸dhrezarütinü Ih ngude shehkhujücho, ko azirütinü jengreng jo yacho.

⁹Amülung la langnürütinü chota yacho zahcho;

¹⁰ko adirütinüsü sahmüthsa licho.

¹¹I ngurü ko I yu yuchirü apümnü, I nguchicho nengdang atsa du chocho.

¹²Ailümrünü rühchide Ihnü arüh trocho; khütamüthsarü mürürü Ihnü trocho.

¹³Suro müchürünü Ih secho, ko Ihnü chomilarü khyang atsikeh jücho.

¹⁴Ihnü lede yuje ko tsa du nguchicho.

¹⁵Nahtohrü nengdang I nahtse, ko jingjahrü nengdang I jing thsacho.

¹⁶Mürürü nengdang Ih arüh au, ko chongcha la lirü shirü lahpi Ih yacho.

¹⁷Amütsarü tase Ihnü thsangnyangjücho, ko arüh khehla dhsümthserü khümchocho.

¹⁸Ih kutsüp linung ko kuh lanü tbachi sünung Ihnü lede longdicho.

¹⁹Ih ara kih la liba ko jengza chah yingkih kehba singdong kyo licho.

²⁰Lede apümnü Ih secho ko khodesü Ih tase müzeh mülicho.

²¹Ihnü athsüchi yu yode, müyurünü sahmüthsa nyicho;

²²Ihnü chokade arüh ayonung tu mülicho. I yu tsü tsingkih kyo zürangcho,

²³luthsarünü chisi kyang tsing khyüchocho kyo atümungnü hütsü khyüchocho.

²⁴Arüh alongdi mülide, Ihnü arüh chah mitbho münyükehjücho; I romih atsingse tsünü arüh suhzehsohcho.

²⁵Ihnü nüchicho ko yukhajücho; yangthsarünü abi rothsarü nücho kyo, Ihnü arüh nücho, arüh lümtpahnah lide Ihnü tbachijücho.