Read Sangtam Naga JOB 30 Bible Online

JOB 30 - Sangtam Naga bible

JOB 30

¹Ta adelü Ini müchirünü mii Ih münyüjüre! Arüh tpurü hütsütoh-i tulamüyohchonü, san nyahba I füza mii münyahsohcho.

²Re tsipehcho hütsüri chahnü Ih tu jingchonung?

³Arüh dira iilüm yangkongchonü, amala, rangmü la ko apehcho lih la arühnü singying akungcho mükohcho.

⁴Arühnü rangmüla singdong rohcheh hütsüri tsucho, amükyü dengham ying mii tsucho.

⁵Atümungnü arüh mütichi iipehcho, aführü chah mohkehjücho kyo.

⁶Arüh lungkoh la, lungrah la xang züducho ko akhi la linung kangcho.

⁷Rangmü la arühnü kanglungrü kyo khongcho, ko singtrung pohki tsübülung licho.

⁸Tula müyohrü, akhyüchah mülirü mülung! Arüh alih lanü iipehko.

⁹Ade arühnü ro Ih münyodhengre; Ih tu mah ta arüh münyüdong khüdu du.

¹⁰Arühnü Ih mükhimüngu bichire; I tenü arüh deenü atsauepü lümre, ko arühnü ro I romih chah müchohkehjüre.

¹¹Tunüo Tsingrangbanü Ih re müzeh ko atrorü müli külüpjüko, arühnü arüh rihlong apümnü Ih nyümre.

¹²Hiri mülungnü Ih mütozah nyümre; arühnü Ih shangsohre; achangka la Ih changsohnung arühnü lümtrümko.

¹³Ih tsichehnung arühnü yatiko ko Ih changjünung müküpre; ko arüh yatirü süsü müle.

¹⁴Arühnü I rangji akhi la shiyohre, ko I chah dhrümchi zürore;

¹⁵Ih adrübanü jengko; I neng atsa nyübong kyo fotsire, ko I amüwa nyükhi kyo tsire.

¹⁶Ade Ih asürüe; I chongcha akyangba tu müle.

¹⁷Ama la I rüh apüm tohre; tsunahba adhsa münyehlire.

¹⁸Tsingrangbanü I hong lanü rangre, ko I jengki zümnahjüre.

¹⁹Abinü chongbong la Ih dümyohchüre; Ih athrünyi tenü tu papa mah.

²⁰Ihnü Nü te dsire, O Tsingrang; ta Nühnü khodesü mülaling, Ihnü kihchide, Nühnü münyi.

²¹Nühnü Ih mümüi bichire; Nü zii apümnü Ih dhsümthsere.

²²Nühnü nyübong khyang Ih fotsisohre; tsingxinyübong la Ih thsangchehsohre.

²³Ih asünung nowürepü Ihnü müdhele, akang lirü nengdang ajehjücho yang.

²⁴Tuepü ngahseh lirü khüdu khingchiro? Chingkichingnangnung chah khu apa tu münguchichehba nyitsarü khüdu.

²⁵Müyurü chongcha la lide Ihnü mütratrocho do? ko thsangthsirü nengdang thsa mülümcho do?

²⁶Ihnü akünyang ko atsingse longdicho, ta achangba ko amarürah du rocho.

²⁷Alümxü ko adhsanü Ih rehnahko; Ih nyümong mükhu chongcha alaa rore.

²⁸Nyü müthsa chah amarürah la Ih rachire; Ihnü müyurü betenü yapü arüku chingre.

²⁹I yuva tsü alongyü ko anaying, shirung mahkhang ostrich uza khongcho yuva kyole.

³⁰I küp nyah kangre; Ih füthsanü trüpre.

³¹Khüdupi akünyang khi yuchicho, ta ade meshü metra du yuchire.