Read Sangtam Naga JOB 31 Bible Online

JOB 31 - Sangtam Naga bible

JOB 31

¹Ihnü khodesü lazalarü chah mükhyah müdhengnung yuchümko.

²Akohbong Tsingrangbanü Ihsa chah tu nguchiro? Nyitsarü nguchi ngang Abinü tu jüro?

³Abinü amüthsalang nguchirü yang achangba ko athsangnyang müthehre.

⁴Tsingrangbanü I nguchi lüpcho müdhele; I mütrahcho müipi Abinü ngure.

⁵Ihnü khodesü mütsa münguchi ko khodesü bürü mükihyochü pü Ihnü yuchümre.

⁶Tsingrangba khyang yuje ahosingla tsü Ih ho-dhengsohng, ko Abinü Ih khüta yuje hütsü ngunung.

⁷Ihnü yujeba lang la tsünü ximülakhang, mahkhang amünyi khyang Ih rangsohkhang, ko I kheh amünyi la thsangkhang,

⁸I tsahma thsangnyangsohng, mahkhang I yuthsahchehcho tsang tsü bürü khyang tsusohng.

⁹Ihnü kurümrü nitpü mükhyah likhang, ko arüh kuhjonglang rang yingkhang,

¹⁰I nitpünü aparü adhrerü khüdu khyang chongkyasohng, ko aparü adhrerü khüdu yüpji la yüpsohng.

¹¹Hütsütari amütsalü asünü khangnung.

¹²Hütsü athsangnyangba, I licho apüm trüp-pehba mümehmi michang kyo lile.

¹³I kulirü khüdunü longmüso Ih nyümde, Ihnü abi yu nyicho ko abi tsa bichicho.

¹⁴Ihnü hütsüta müthsakhang Tsingrangba khüta shirünung? Tsingrangbanü yukhanung rode Ihnü Abi te tu yonung?

¹⁵I külüpba Tsingrangbanü I kulibasü külüpcho.

¹⁶Khodesü Ihnü ailümrü mütropü müle chomilarü khodesü chongcha müpehjü

¹⁷mahkhang Ih tsupü mürürü khüdu yangseh müpehjü.

¹⁸I kangli ayung arüh xükümcho.

¹⁹Jengki mii mülihchehba ailümrü shirüde,

²⁰Ipu san chahnü khyüchocho shunbüh shü Ihnü jücho. Hütsütade abinü alasih apümnü Ih secho.

²¹Yukhachah tsü Ihnü kohnungepü müdhe mürürü khüdu kihyochüpü likhang,

²²I kheh khyahsahjüng; I pünurü chahnü hütsü lohsahjüng.

²³Tunüo Ihnü Tsingrangba akhingchi drüchonü, khodesü hütsütari münguchi.

²⁴Ihnü khodesü kuthsi chah mülonglang,

²⁵mahkhang I licho la mümüthseh.

²⁶Ihnü khodesü nyü ko hütsü atsingse mahkhang chonu ko atsah atsati mümübü.

²⁷Hütsüri khyang jengreng jo I kheh müthsüpnü khodesü Ih münümülasoh.

²⁸Hütsütari amünyi tsü asünü khangnung; hütsünü Akohbong Tsingrang mükhyüchore.

²⁹I rorüh chongchade, mahkhang arüh achangba mütohde, Ihnü khodesü mükünyang.

³⁰Arüh süsohng pü dangkhidangnang Ihnü khodesü amünyi müshitpah.

³¹Ihnü lede shirü künyang khyüchocho I te nguchirü apümnü müdhele.

³²Shitsehrü I kuhla nüyohcho, ko khodesü arüh jungchah müyüpsoh.

³³Aparünü arüh münyi müyümre, ta Ihnü khodesü mümüyüm.

³⁴Nyitsarünü chonung Ihnü khodesü mülümxü, Ihnü khodesü sahmüthsa kuh yonglang müpüm tunüo arühnü mülangjünung Ihnü drücho.

³⁵Ihnü choba hi sünüsü münyinung do? yutse müipi tsü yuje-epü Ihnü yuchümre. Akohbong Tsingrangnü I te lalingsohng. I rorünü Ih nyüm hiroba yu tsü Ihnü ngunungthsa thrahchorelang,

³⁶Ihnü hütsüri künyangseh I pakyarü chah hohlahnung ko I thah chah kuthri kyo thrinung.

³⁷Ihnü nguchicho lüpcho Tsingrangba te yonung, ko Abi jingte I thah tsungmüsunung.

³⁸Ihnü thsaba luh tsü abüdongrü chahnü Ihnü kengcho khyükhang,

³⁹hütsü lanü chürocho tsuyongnung tsupü anguchirü kongsehsohkhang,

⁴⁰litoh ko lüdi mülih, hütsüla za ko zeng chürosohnung. Job yu changkacho.