Read Sangtam Naga JOB 33 Bible Online

JOB 33 - Sangtam Naga bible

JOB 33

¹Ko ade, Job, Ihnü yoba hi longi nyieng.

²Ihnü tu lümro hütsü yonung rungnüm lile.

³I yu apüm yuje, ko Ihnü yuje tsü chore.

⁴Tsingrangba nbünü Ih külüpcho ko I khyang akang jücho.

⁵Nühnü kohkhang I yu laling. Nü yu alalingba rungnüm.

⁶Tsingrangba jingte Ihjüding sako du, Ihjüding lishenü külüpcho.

⁷Hütsünü nüh Ih drünung tu müle; Ihnü nü te müshutanung.

⁸Nühnü hita chocho Ihnü yuchiko:

⁹“I müthsameh; Ihnü tu amüthsalang münguchi. Ih achomükeh ko amünyi lanü za lile.

¹⁰Ta Tsingrangbanü Ih khingchinung amütangnung yangchire, ko Ih arorüh roh-i bichire.

¹¹Abinü I jing la ixilih yohjüko; I lang apüm Abinü dhengyehre.”

¹²Ta Ihnü nü te yore, Job, nüh amüthsalang. Tsingrangba tsü apüm tenü adiuba.

¹³Nyitsarü longmüsü mülalingcho nengdang, tuepü nühnü Tsingrangba mülangjüro?

¹⁴Tsingrangbanü loli loli chonye, Sünüsü Abi yu münyi.

¹⁵Ama la nyitsarü yüpjode, Tsingrangbanü melang ko müngucheh la chotare.

¹⁶Abinü arüh khyang Abi yu nyisohre, ko Abi amüzahnung yunü arüh drüsohre.

¹⁷Arüh amünyi müshitpahsohnung Tsingrangbanü chotare, ko müthsehnung lanü khümchore.

¹⁸Abinü arüh müchangsohnung; arüh asü lanü khümchonung.

¹⁹Tsingrangbanü thsangnang mütheh ko adhsanü afü jengsohnü nyitsarü müchongchijüre.

²⁰Athsangnangrü be mükyo kangre, ko tsuyongba atsauba mii müdhengnyüre.

²¹Abi fü adeng kangre; nühnü abi rüh apüm ngure,

²²abi asü lih lang wünung kangre.

²³Kümüdeo ninglang riwürü khüdu abi tronung ronung, Tsingrangba riwürü hajar yolanü, Abinü nyitsarü khyang arüh nguchi lümchehsohre.

²⁴Yanglilüm riwürünü yonung, “Abi lehcheh müthehng! Abi asü lih lang müzüdunung. Abi mülih hila ritsa lile.”

²⁵Abi fü thali anu kangnü, ko rezehnung;

²⁶abinü kihchide, abi te lalingnung; abinü akünyangnü Tsingrangba mübünung. Tsingrangbanü abi nengdang thali küdangjünung.

²⁷Abinü müyurü yola yonung, “Ihnü amünyi shitpahko. Ihnü athsalang münguchi, ta Tsingrangbanü Ih rikiko.

²⁸Abinü Ih asü lih lang wünung lanü Ih khümchoko, ko Ih ade akang lile.”

²⁹Tsingrangbanü hiri apüm loli nguchire;

³⁰Abinü nyüh khüdu akang khümchore, ko akang akünyang jüre.

³¹Ade, Job, Ihnü yoba hi nyieng; nü yu tücho ko I khyang chosohng.

³²Ta nüh ayonung lango likhang, Ihnü hütsü nyinung; Ihnü künyangseh nüh yuje-epü khyüchonung.

³³Hütsüta mahkhang, sahmüthsa I yu nyieng, ko khüta lümzehnung Ihnü nü te donung.