Read Sangtam Naga JOB 34 Bible Online

JOB 34 - Sangtam Naga bible

JOB 34

¹Nührü khütang lümlong azeh, khütang athsehthsa; ade I yu nyieng.

³Nührünü müyahdhengdenü tsuyongnung atsa müdhere, ta yulü yuchichonü mümüdhere.

⁴Hütsü müdhenung Ihsa chah kehle.

⁵Jobnü abi achomükeh pü yore, Tsingrangbanü abi khyang yuje tsü müjürepü yore.

⁶Abinü yocho, “Khüta Ihnü arahkheh chonung ko Ih mülangepü yonung? Ih asünungthsa lerohpehko, ta Ih amünyi müle.”

⁷Nührünü Job hi kyo nyitsarü müngudhengo? Abinü khodesü Tsingrangba müdrüre.

⁸Abinü amütsarü te shangrü thsare ko münyirü yola mükhongre.

⁹Tsingrangba lümcho nguchinung tu athsütah mülepü abinü yore.

¹⁰I yu nyieng, nührü anyichehrüti! Akohbong Tsingrangnü amüthsalang nguchinung do?

¹¹Abinü palu nguchi ngang jiyüre ko palu aleng bichire.

¹²Akohbong Tsingrangnü amünyi münguchire; Abinü khodesü ko sütesü yuje mücho münguchire.

¹³Tsingrangbanü Abi zii tsü khürü chahnü ngucho mah-o? Khürünü Abi limih dhengyehnung yohpücho mah-o?

¹⁴Tsingrangbanü akang sah tsü khyülikhang,

¹⁵akang lirü apüm sünung ko thali alih kangnung.

¹⁶Ade I yu nyieng, nührü lümlong likhang.

¹⁷Nührünü Amüsaba Tsingrangba mülangjürü ang? Abinü yuje tsü thrünyirepü lümrü do?

¹⁸Khode yangthsarütinü adongmücho mahkhang mütsanang, Tsingrangbanü arüh mülangjüre.

¹⁹Abinü yangthsarü mükhümre, mahkhang ailümrü sehti alirü mükhümre, tunüo Abinü atümung thricho.

²⁰Nyüh khüdu dhrongyengnü aromang sopehnung kohle; Tsingrangbanü nyitsarü chah xüpre ko arüh changpehre; Abinü kheh müzehpü akurahrü müpsehre.

²¹Abinü nyitsarü mütrah müipi dhengyehre.

²²Tsingrangba chahnü münyirü rangnungthsa amarürah tu müle.

²³Nyitsarünü wü Abi yu khasohnung Tsingrangbanü bekhyah kihsah yohpünung müdhsüdah.

²⁴Langnürüti pehpü arüh mülih thronung Abinü yuzi yangchinung müdhsüdah.

²⁵Tunüo arüh nguchi Abinü müdhele; Abinü arüh pehre ko hütsü romangnü arüh thümjüre.

²⁶Apümnü ngunungthsa Abinü münyirü khingchire,

²⁷tunüo arühnü Abi khanglang müwüre ko Abi amülaba pehjüre.

²⁸Arühnü ailümrü khing Tsingrangba te züdesohre, ko arüh adsiba Abinü yuchire.

²⁹Tsingrangbanü tusü münguchi nye sünüsü Abi mümülangjücheh. Abinü aromih rangkhang, nyitsarü chongchanung.

³⁰Yuchotinü tu nguchinung mükohnung, Tsingrangba mütsüprü akhingchirünü arüh michah yangthsanungde.

³¹Job, Tsingrangba te mülang müching-o? Ko thali amünyi müshitpahnung münyingcho-o?

³²Nü thsamehcho ngusohnung mütsing-o? Ko amünyi münguchinung müchecho-o?

³³Nühnü Tsingrangba lümcho thsonglipü, nü lümcho Abinü jünung longdirü do? Adhrongchehnung tsü nü müsie, I müsi mah; nü lümcho ihrü te ade young.

³⁴Anyichehrü nyitsarünülü hi hohnung; I yu yuchirü amüdherü apümnü.

³⁵Jobnü hütsü mümüdhechonü chore, ko abinü choba tsü tu adüzü mülepü yonung.

³⁶Jobnü yoba apüm tsü lümdheng; abinü münyirü kyo chocho nührünü müdhenung.

³⁷Abi münyi chah abinü nyümba lahkehre; Ihsa apüm bete abinü Tsingrangba münyüjüre.