Read Sangtam Naga JOB 39 Bible Online

JOB 39 - Sangtam Naga bible

JOB 39

¹Nühnü shuhu mütrücho mümüdheo? Shümüshü aza mütrücho münguo?

²Arüh aza khüdoi nyahli hiro mümüdheo? Arüh mütrünung bekhyah mütsüp-o?

³Arüh aza münung hümkehcho ko aza thsacho nühnü mümüdheo?

⁴Rangmü la arüh aza zire; arühnü tsipehre ko thali mürore.

⁵Rangmü gadu khyang sünü nyüje jücho? Sünü arüh lehcheh rachisohro?

⁶Ihnü lipilih tsü arüh kuh kangsohcho, ko shüh licho la arüh lisohcho.

⁷Yangditi lanü za wü arüh lire, ko sünüsü arüh rahseh münguchisohre.

⁸Arüh tsuyong chah tsü azong lih, arühnü hütsüla rangva yangchi tsure.

⁹Thsüzalanü nührü khyang nguchijünung do? Abinü misü kuhla tsü romang khüdu dusü yüpchehnung mah-o?

¹⁰Nühnü abi rangdüshü khüdunü hohpü luh xüchehsohnung do? mahkhang nü luh la mükheh khüdu tphahjünung do?

¹¹Nühnü abi tase chah dümpinung ko nü khyang amülah nguchijünung longdirü mah-o?

¹²Nü khyang maxajo ko pungkhyang lang fürü hibülungjünung longdirü do?

¹³Ostrich uza qo tsünü khüta züzah füro? Ta ostrichnü kih uza kyo mümongcheh.

¹⁴Ostrich uzanü alih adhsanü shüpsohnung alih la akyü kyüre.

¹⁵Hütsü jingnü dhrümnahjünung ko kanglungrünü thsangnyangjünungepü abükyünü mümüdhe.

¹⁶Abükyünü hütsü abükyü kyüepü mülüm, ko amükangla kyo pehkopü mülümre.

¹⁷Ihnü abükyü dohsohcho ko abükyü khyang lümlong müjü.

¹⁸Ta khode abükyünü shangnang, kuri ko hütsü chah pümba münyüjüre.

¹⁹Job, kuri tase hitoh-i zeh külüpba ko ahong la anbüh kehsohba tsü nühnü mah-o?

²⁰Khengqu kyo tsohba ko abi khongchonü nyitsarü mütiba tsü nühnü mah-o?

²¹Arühnü angah la longphiseh tsohchire; arüh re apümnü khata lang shangre.

²²Arühnü adrüba tsü tunang mümüdhe, tu nohshengnü arüh müdselicheh.

²³Arüh chah pümrü thsunohrü tsü nyü la mülachi tsingtsing müpkehtare.

²⁴Rihlong chüro dhridhri, kuri tsünü bekhu shangre, Rühti mehde, longlüm müyachehre.

²⁵Rühti meh müipi arüh khongre; arüh amünyethsa müwüe, arühnü khata xümre, ko anüchirünü züde yuzeng jücho arühnü nyichehre.

²⁶Müdinü kihjing lahpi aqo kide, khüta mongnung hütsü nü chahnü nyichocho mah-o?

²⁷Müdinü azong athseng chah asüp shünung nü chahnü yuzeng yingnung mah-o?

²⁸Abinü lungdhong athsengu chah abi kuh külüpre ko akhang amüjoh tsü abi roshengvi külüpre.

²⁹Hütsü chahnü lango mapseh tsunung ashu ko amünyeh la khengyengre.

³⁰Asücho me te müditi shibülungre, ko müdi zatinü ashüh tsü yongre.