Read Sangtam Naga JOB 4 Bible Online

JOB 4 - Sangtam Naga bible

JOB 4

¹Job, Ihnü chonung nüh mükünyang tüli. Ihnü adelü sahmüthsa mülichehre.

³Nühnü nyitsarü adrong te doko, ko remüzehrü rezehsohko.

⁴Khürü müthikehpü, remüzeh ko kyahseh lide, nü yunü abi thsüchi yasohcho.

⁵Ade nüh chongchanung jehko, ko hütsü nühnü mükoh rangchore.

⁶Nühnü Tsingrangba mübüre ko nü akang la achomükeh; Hütsüeko nühnü longlang alongdi liba thsako.

⁷Ade lümdheng. Amüsarü achangba mütohcho nyüh khüdu yodheng.

⁸Nyitsarünü münyi luh xücho ko amütsa majüh shucho Ihnü nguko; ko ade arühnü amütsa ko amünyi xare.

⁹Tsingxinyübongnü kyo, Tsingrangbanü arihlong chüro arüh changjüre.

¹⁰Amütsarünü khongre ko kihkhünying kyo rengre, ta Tsingrangbanü sahmüthsasohre ko arüh ha xangsohre.

¹¹Mükahseh tsunung tu müliba kihkhünying kyo, arüh süre ko tsuzarü apüm shupishuzare.

¹²Khüdupi arangyu khüdu rocho, ko hütsü Ihnü thri yuchicho.

¹³Müyüpmüso lümkang hütsünü I melang mütsachonü müyüpsehcho kyo, ayüp longmüzijücho.

¹⁴Ih dhridhricho ko adrüchonü Ifü apüm zingchicho.

¹⁵I romih chah atsingse nyübongza fükehcho ko anehchonü I nbüh kyacho.

¹⁶Ihnü lango ya ngucho Ihnü dhengcho; ta hütsü tunang müyocheh. Hütsüde Ihnü anaying la tsünü yuva khüdu yuchicho:

¹⁷“Tsingrangba bete sü yuje liro? Mahkhang Akülüprü bete sü Amüsa liro?

¹⁸Tsingrangbanü ninglangrü dikehrü chah long mülangre; apu ninglang riwürü chah mii mülang dhengchehre.

¹⁹Lihshenü thricho, tsangsoh kyo nyehnah pehba asongsong kangzah khüdu chah Abinü longlangnungepü lümrü mah-o?

²⁰Nyitsarü khüdu anyangnyü akang lire, ta münyüzehde mümüdhepü sopehre.

²¹Abi licho apüm hitsire; abi adesü lümlongnü müdsi süre.”